Xiendlakalo Xa Nkoka Swinene eMatin’wini Ya Munhu
1 Yesu u te emisaveni hi nkongomiso wa Tata wa yena leswaku a ta veka vumbhoni ehenhla ka ntiyiso lowu nga yisaka evuton’wini lebyi nga heriki. (Yoh. 18:37) Vutshembeki byakwe ku ya fika eku feni byi yise ku dzuneka eka Yehovha, byi kwetsimisa vito ra Xikwembu, ni ku nyikela nkutsulo. (Yoh. 17:4, 6) Leswi hi swona swi endleke rifu ra Yesu ri va xiendlakalo xa nkoka swinene ematin’wini hinkwawo ya munhu.
2 Ku sukela eku vumbiweni ka Adamu, ku ve ni vanhu vambirhi ntsena lava a va hetisekile lava tshameke va hanya emisaveni. Adamu a a ri exiyin’weni xo tisa mikateko leyi hlamarisaka eka vana va yena lava a va nga si velekiwa. Ematshan’weni ya sweswo, u xandzukile hi vutianakanyi, a va vangela khombo leri a ri ta hela hi rifu. Loko Yesu a ta, u kombise vutshembeki ni ku yingisa hi ndlela leyi hetisekeke, a pfula ndlela ya vutomi lebyi nga heriki eka hinkwavo lava kombisaka ripfumelo.—Yoh. 3:16; Rhom. 5:12.
3 Ku hava xiendlakalo xin’wana lexi nga ringanisiwaka ni rifu ra Yesu ra gandzelo. Ri cince ndlela ya matimu ya munhu. Ri nyikele xisekelo xa ku pfuxiwa ka magidi ya timiliyoni ta vanhu eku feni. Ri veke masungulo ya Mfumo lowu nga heriki lowu nga ta herisa vubihi ni ku endla misava yi va paradeyisi. Eku heteleleni ri ta ntshunxa vanhu eka xiyimo xihi na xihi xa ntshikilelo ni vuhlonga.—Ps. 37:11; Mint. 24:15; Rhom. 8:21, 22.
4 Leswi hinkwaswo swi hi pfuna ku twisisa xivangelo xa ku va Yesu a letele vadyondzisiwa va yena leswaku va tlangela rifu ra yena hi xiendlakalo xa Xitsundzuxo lembe na lembe. (Lk. 22:19) Hi ku tlangela nkoka wa xona, hi langutele ku hlanganyela ni mavandlha ya Timbhoni ta Yehovha emisaveni hinkwayo endzhaku ka ku pela ka dyambu hi Ravuntlhanu, April 14. Ku nga si fika nkarhi wolowo, swi ta va swi fanerile leswaku hi hlaya swin’we tanihi ndyangu timhaka ta Bibele ta vutomi bya Yesu byo hetelela emisaveni ni ku yimela ka yena ntiyiso hi xivindzi. (Tindzimana leti bumabumeriwaka ti kombisiwile eka 1995 Calendar, April 9-14.) U hi siyele ntila wa ku tinyiketela eka Muvumbi wa hina. (1 Pet. 2:21) A hi tikarhateleni ku rhamba vanghana ni maxaka ya hina, kun’we ni swichudeni swa Bibele ni vanhu van’wana lava tsakelaka, enhlanganweni lowu wa nkoka. Hlamusela leswi nga ta humelela ka ha ri emahlweni ni leswi yimeriwaka hi swifanekiselo.—1 Kor. 11:23-26.
5 Vakulu va fanele ku kunguhata kahle ka ha ri emahlweni ku vona leswaku Holo ya Mfumo yi basile, ya languteka. Ku fanele ku endliwa malunghiselelo ya lava nga ta lunghiselela swifanekiselo. Ku fambisiwa ka swifanekiselo ku fanele ku hleriwa kahle. Swiringanyeto leswi pfunaka swa ndlela leyi hi nga kombisaka xichavo eka Xilalelo xa Hosi swi nyikeriwe eka Xihondzo xo Rindza xa February 1, 1985, tluka 29. Swi ta va swi fanerile swinene loko mavandlha ma hlela ku ndlandlamuxa ntirho wa nsimu masiku ma nga ri mangani ku nga si fika xiendlakalo xolexo ni le ndzhaku ka xona.
6 N’wexemu, nhlayo ya vanhu va 12-288 917 va ve kona emisaveni hinkwayo leswaku va tlangela xiendlakalo lexi xa nkoka. Tanihi leswi ku nga siku ra nkoka swinene ekhalendarini ya hina, hinkwerhu ka hina hi fanele ku va kona.