Ku Hlayisa Vun’we Bya Hina Bya Mfumo
1 Mfumo wa Xikwembu i hulumendhe ya xiviri, leyi nga ni matimba ni vuhosi. A wu ri nhloko-mhaka ya ku chumayela ka Yesu. (Mt. 4:17) Ku dyondzisa van’wana ni ku veka vumbhoni entiyisweni wa Mfumo a ku ri xiphemu xa nkoka xa vutirheli bya Yesu. U hi dyondzise ku khongelela Mfumo ni ku hambeta hi wu lava ku sungula. (Mt. 6:9, 10, 33) Ku tshama hi ri kusuhi na Yehovha ni nhlengeletano ya yena, ku hetisisa ntirho wa hina wo chumayela ni ku tshama hi tihambanisile ni misava swi hi pfuna leswaku hi hlayisa vun’we bya hina bya Mfumo. Hi swiendlo ni marito ya hina, hi kombisa leswaku hi le tlhelweni ra Mfumo.—Yoh. 18:37.
2 Ku sukela hi 1914, Mfumo wu ve wa xiviri eka timiliyoni ta vafumiwa. Vun’we lebyi kombisiwaka hi vafumiwa lava va Mfumo byi hambana swinene ni bya misava leyi avaneke. Hi fanele ku endla Mfumo wu va wa xiviri evuton’wini bya hina leswaku wu va matimba lama hi hlanganisaka. Xana i yini lexi wu endlaka wu va wa xiviri eka hina?
3 Ku fana ni tihulumendhe tin’wana, Mfumo lowu wu ni milawu ya wona. Kambe, wu hambanile ni yin’wana hi leswi milawu ya wona yi humaka eBibeleni. Ku hlaya Rito ra Xikwembu nkarhi na nkarhi swi hi nyika switsundzuxo leswi faneleke swa leswi lavekaka eka hina tanihi vafumiwa va Mfumo. Dyondzo ya munhu hi xiyexe ya tibuku ta hina ni nkongomiso lowu humaka eka “nandza la tshembekaka, wo tlhariha” swi hi pfuna ku tirhisa milawu ya Xikwembu evuton’wini bya hina bya siku na siku. (Mt. 24:45) Loko hi yi tirhisa eka hina vini, Mfumo wu va wa xiviri swinene eka hina, wu hi hlanganisa swin’we eka vumakwerhu bya misava hinkwayo, wu hi endla ndyangu lowu hlanganeke wa vagandzeri ehansi ka vulawuri bya Yesu.
4 Vun’we Bya Ku Chumayela Hi Mfumo: Ntirho wa hina i ku chumayela mahungu lamanene ya Mfumo “ku ya fika emakun’wini ya misava.” (Mint. 1:8) Ku chumayela hi “mbilu yin’we” swa hi hlanganisa tanihi leswi hi lwelaka ku “dzunisa” Yehovha. (Rhom. 15:5, 6) Ku hlanganyela hi ku hiseka ni vatirhi-kulorhi emisaveni hinkwayo, swi tiyisa ripfumelo ra hina naswona swi pfumelela moya wa Yehovha ku va wu tirha eka hina leswaku hi hetisisa ku rhandza ka yena. ‘Ku va ni swo tala swo swi endla entirhweni wa Hosi’ swi hi endla hi ‘tiya swinene, hi nga tsekatseki.’—1 Kor. 15:58.
5 Ematikweni yo tala Sathana u ringeta ku kavanyeta vun’we bya hina hi ku lwisana ni ntirho wa hina wo chumayela. U tirhisa tindlela hinkwato leti a nga na tona leswaku a pfuxa ku avana ni ku vanga timholovo, a ringeta ku hlohlotela ku phikizana ni mpfilumpfilu. (Swiv. 6:19; Gal. 5:19-21, 26) U lava leswaku hi katseka eka minkwetlembetano ya misava hambi ku ri ku hlanganyela etimhakeni ta politiki ni ta ntshamisano. (Yak. 3:14-16) Matsalwa ma hi khutaza ku ala nkucetelo wakwe; handle ka sweswo, u ta hi dya ku fana ni vahlaseriwa vakwe. (1 Pet. 5:8, 9) Xiviri xa ntshembo wa Mfumo a hi fanelanga hi xi pfumelela xi hela etimbilwini ni le miehleketweni ya hina.
6 Ku hlayisa vun’we bya hina swi lava mianakanyo leyinene ni vutlhari lebyi humaka ehenhla. Loko ku va ni ku nonon’hweriwa, ngopfu-ngopfu loko ku katsa vamakwerhu, hi fanele ku kombisa mbhandzu wa moya wo hlayisa ku rhula. Mikhuva ya misava yo tanihi vutikukumuxi, mavondzo ni ku tidzunisa, swi vanga ku avana kutani swi fanele ku hluriwa. (Ef. 4:1-3; Kol. 3:5-10, 12-14) Hi fanele ku hlayisa miehleketo ya hina yi tele hi mianakanyo leyinene ni leyi akaka. Mfumo i wa xiviri evuton’wini bya hina! Kambe hi fanele ku hiseka leswaku hi wu hlayisa hi ndlela yoleyo!—Ef. 6:11, 13.
7 Xiviri xa ntshembo wa hina lowu hlamarisaka wa Mfumo xa hi hlanganisa hi moya wa vun’we lowu nga ta kala wu nga heli.—Ps. 133:1.