Tirhisa Nkarhi Wa Wena Hi Ndlela Leyinene
1 Yehovha u xiyisisa nkarhi. U lava leswaku na hina hi xalamukela nkarhi. Hi ku tirhisa nhlengeletano ya yena u hi pfuna leswaku hi xiyisisa. Nkarhi na nkarhi hi khutaziwa ‘ku endla swo tala entirhweni wa Hosi.’ (1 Kor. 15:58) Hi ndlela leyi, hi nga humelela entirhweni wa Yehovha.
2 Un’wana ni un’wana wa hina u ni ntsengo lowu fanaka wa nkarhi vhiki rin’wana ni rin’wana—tiawara ta 168. Xana hi wu tirhisa njhani nkarhi wa hina? Xana ha swi kombisa leswaku hakunene hi tiva nkarhi lowu hi nga eka wona hi ku ya hi langutelo ra Yehovha? Xana hi kavanyetiwa hi mintirho leyi nga riki ya nkoka?
3 I swa nkoka leswaku hi hleleka kahle. Vo tala va ringeta ku tiendlela nxaxamelo wa leswi nga swa nkoka. Xilo xin’wana ni xin’wana xi vekiwa enxaxamelweni hi ku ya hi nkoka wa xona. Xana leswi swi nga endlisiwa ku yini? Bibele yi ri munhu u fanele ku “ṭakela ntiro hikwawo wa ku tikarata ka yena.” (Ekl. 3:13) Mintirho yin’wana yi ni vuyelo lebyo antswa ku tlula yin’wana. Languta vuyelo lebyi ntirho wun’wana ni wun’wana wu byi tisaka. Xana ku heta ntirho lowu swi ta tisa mimbuyelo leyinene? Xana u ta “ṭakela” ntirho wa ku tikarhata ka wena? Loko swi nga ri tano, swi nga endleka wu ri ntirho lowu nga fanelangiki ku rhangisiwa emahlweni.
4 Evutirhelini Bya Hina: Ha tsaka loko van’wana va fika hi nkarhi eminhlanganweni ya ntirho, va yingisela swiletelo hi vukheta ivi va ya ensin’wini hi ku hatlisa. Ematshan’weni yo rindza hi ta va hi khomekile eku chumayeleni. Swi le rivaleni leswaku Pawulo a a xi xiya swinene xilaveko xa nhleleko lowunene loko a tsala a ku: “Hinkwaswo a swi endliwe hi mukhuva lowo saseka, hi nawu wa kona.”—1 Kor. 14:40.
5 Loko hi ri entirhweni wa le nsin’wini, hi nga tlangisa nkarhi wa nkoka hi minkarhi yo wisa hi nwa kofi. Hambi swi ri tano, loko maxelo ma nga ri manene, ku wisa ku nga hi phyuphyisa ni ku hi pfuna leswaku hi hambeta hi ya emahlweni. Kambe, vo tala, va tsakela ku hambeta va ri karhi va nyikela vumbhoni eka vanhu ematshan’weni yo tshama ni vamakwavo leswaku va nwa kofi hi nkarhi lowu vekeriweke vutirheli. Ku ringanisela swa laveka.
6 “Hambi ri ri gumba, ri tiv̌a mikari ya rona” yo rhurha, naswona vusokoti “byi tihlengeletela mphamo loko ku ṭhov̌eriwa” leswaku byi tilulamisela vuxika, ku vula Bibele. (Yer. 8:7; Swiv. 6:6-8) Laha ku kumeka xivangelo xa ku tirhisa nkarhi hi ndlela leyinene. Na hina hi fanele ‘ku tiva minkarhi ya hina.’ Hi ri karhi hi nga nonon’hwisi swilo ngopfu, hi fanele ku hlayisa nkarhi. A hi fanelanga hi tiva leswi faneleke ku endliwa ntsena kambe ni leswaku swi ta endliwa rini. Hi fanele ku va ni mukhuva wo kunguhata ka ha ri emahlweni, hi ri karhi hi ehleketa hi leswi swi nga ha hi kavanyetaka. Nakambe hi fanele ku tiyimisela ku veka mintirho yin’wana etlhelo leswaku hi ta va ni nkarhi wo endla swilo swin’wana swa nkoka, swo tanihi ku lunghiselela minhlangano ya hina, ntirho wa nsimu ni mintirho yin’wana ya swa le tilweni.
7 Hi fanele ku fana ni Tata wa hina la nge tilweni, Yehovha Xikwembu, loyi a hi dyondzisaka leswaku “šilo šiṅwana ni šiṅwana ši ni nkari wa šona.” (Ekl. 3:1) Hi ku tirhisa nkarhi wa hina hi ndlela leyinene, hi nga ‘hetisisa timfanelo ta ntirho wa hina.’—2 Tim. 4:5.