Tirhisa Nkarhi Wa Wena Khwatsi
1 Hinkwerhu hi ni nkarhi lowu ringanaka vhiki rin’wana ni rin’wana. Nkarhi lowu hi wu tirhisaka eku twariseni ka mahungu lamanene i wa nkoka swinene hikuva i nkarhi lowu hetiwaka entirhweni lowu ponisaka vutomi. (Rhom. 1:16) Hi kombisa ku tlangela ka hina emhakeni leyi hi ku lunghiselela kahle ntirho lowu hleriweke, ku fika hi nkarhi eminhlanganweni ya nsimu ni ku hatlisa hi nghena entirhweni wa nsimu. I swinene ku chumayela ematshan’weni ya ku dya nkarhi hi lo yima. Tanihi leswi Yehovha a hi dyondziseke leswaku “šiṅwana ni šiṅwana ši ni nkari wa šona,” hi fanele hi wu tirhisa khwatsi nkarhi lowu hi wu hleleleke vutirheli.—Ekl. 3:1.
2 Tirhisa Nkarhi Wa Wena Hi Vutlharhi: Hi kuma mikateko yo tala loko hi namarhela swinene xiyimiso xa hina xa ku hlanganyela nkarhi na nkarhi evutirhelini bya nsimu. Hi ntolovelo, vuyelo lebyinene lebyi hi byi kumaka evutirhelini byi fanele byi ringana ni mpimo wa nkarhi lowu hi wu hetaka evutirhelini. Hi ku endla ku cincanyana kutsongo eka xiyimiso xa hina, xana hi nga heta nkarhi lowu engetelekeke entirhweni wa nsimu? Hi xikombiso, endzhaku ko fambisa timagazini hi Mugqivela, swi nga va njhani loko ho heta nkarhi lowu engetelekeke hi endla maendzo yo vuyela? Loko se hi hete nkarhinyana ensin’wini hi Sonto, xana hi nga tlhela hi heta nkarhinyana hi endla maendzo yo vuyela kumbe hi fambisa dyondzo ya Bibele? Xana hi nga engetela ntirho wa hina wa yindlu na yindlu hi ku nyikela vumbhoni exitarateni? Hi ndlela leyi kumbe hi tindlela tin’wana, hi nga swi kota ku antswisa ntirho wa hina.
3 Loko hi ri evutirhelini, hi nga lahlekeriwa hi nkarhi wa risima loko hi nga vi ni vukheta. Ina, loko maxelo ma nga ri kahle, ku wisanyana ku nga hi phyuphyisa naswona ku ta hi pfuna leswaku hi ya emahlweni ni ntirho. Hambiswiritano, ringanisela, hikuva swi nga ha endleka swi nga bohi ku wisa.
4 Emalembeni ya sweswinyana a swa ha olovi ku kuma vanhu emakaya. Leswaku va kota ku langutana ni xiyimo lexi, vahuweleri vo tala va nyikela vumbhoni hi yindlu na yindlu hi nkarhi lowu hambaneke ni wa ntolovelo. Swi nga va njhani loko wo ringeta ku nyikela vumbhoni nindzhenga kumbe nimadyambu loko ra ha vonanyana?
5 A hi swinene ku dya mabulo loko hi ri entirhweni wa le xitarateni. Ematshan’weni ya sweswo, un’wana a yime ekule kutani mi tshinelela vanhu leswaku mi ta sungula mabulo na vona. Xisweswo nkarhi wu ta tirhisiwa hi ndlela leyi humelelaka naswona hi ta kuma ntsako lowu engetelekeke hi ku endla ntirho lowu.
6 Tirhisa Nkarhi Lowu U Wu Kumaka Leswaku U Chumayela: Loko n’wini wa muti a vule leswaku a nga tsakeli, Mbhoni yi kombele ku tiva loko a ri kona un’wana ekaya rero loyi yi nga vulavulaka na yena. Yi sungule bulo ni nhloko ya ndyangu, leyi heteke malembe yo tala yi ri karhi yi vabya naswona hakanyingi a yi nga koti ku endla nchumu. Ntshembo lowu andlariweke eRitweni ra Xikwembu wu endle leswaku a tlhela a tsakela vutomi. Hi xihatla u sungule ku antswa, u ye eminhlanganweni eHolweni ya Mfumo naswona a a byela van’wana ntshembo wakwe lowuntshwa!
7 Makwerhu wa xisati la nga muntshwa u tirhise xiringanyeto xa ku ya entirhweni wa nsimu ka ha sale awara emahlweni ka Dyondzo ya Buku ya Vandlha. EMutini wo sungula, u kume nhwanyana wa 13 wa malembe hi vukhale loyi a yingiserisiseke ivi a teka buku. Hi siku leri landzeleke loko a ri exikolweni, makwerhu wa xisati la nga muntshwa u vone nhwanyana luyani. Endzhaku ka sweswo, u kombele ku dyondza Bibele na yena naswona nhwanyana loyi u pfumerile.
8 Wu Endle Wu Va Nkarhi Wa Risima: Ku hlanganyela nkarhi na nkarhi evutirhelini bya nsimu swa hi pfuna leswaku hi antswisa vutshila bya hina eku twariseni ka mahungu lamanene. Xana u nga antswisa vuswikoti bya wena bya ku sungula bulo emutini hi ku tirhisa xingheniso lexi humelelaka swinene? Xana u nga hlakulela ku va mudyondzisi la nga ni vuswikoti loko u fambisa dyondzo ya le kaya ya Bibele? Hi ku endla tano, u ta va u tirhisa nkarhi wa wena evutirhelini hi ndlela leyi vuyerisaka naswona u ta endla leswaku vutirheli bya wena byi va ni mihandzu yo tala.—1 Tim. 4:16.
9 Leswi ‘nkarhi lowu seleke wu komeke,’ hi fanele hi va ni mintirho yo tala ya Vukreste. (1 Kor. 7:29) Loko hi hlela nkarhi wa swilo swa risima leswi hi lavaka ku swi endla hi fanele hi rhanga hi ku hlela nkarhi wa ntirho wo chumayela. Hi ku hiseka, a hi hlanganyeleni swinene evutirhelini. Nkarhi i rifuwo ra nkoka leri Yehovha a hi nyikeke rona. Nkarhi hinkwawo ri tirhise hi vutlhari naswona u ri tirhisa khwatsi.
[Bokisi leri nga eka tluka 4]
Anakanyisisa Hi Swiringanyeto Leswi:
◼ Fika hi nkarhi eminhlanganweni ya nsimu.
◼ Loko swi koteka, mintlawa leyi yaka eku chumayeleni a yi ve yitsongo.
◼ Hatlisani mi sungula nsimu.
◼ Tirhani nsimu hi nkarhi lowu vanhu vo tala va kumekaka ha wona emakaya.
◼ Minkarhi yin’wana u nga tirha wexe loko swi nga ri na khombo.
◼ Endla maendzo yo vuyela ekusuhi ni laha nsimu yi tirhiwaka kona.
◼ Yana emahlweni ni ntirho loko van’wana va ntlawa wa n’wina va rivatiwile emutini wo karhi.
◼ Loko swi koteka ni loko swiyimo swi pfumela, tirha nsimu ku tlula awara.