Wu Tirhise Hi Vutlhari Nkarhi Wa Wena Loko U Ri eNsin’wini
Hi lembe ra ntirho ra 2014 Timbhoni ta Yehovha ti hete tiawara ta 1 945 487 604 ensin’wini—leswi swi kombisaka kahle leswaku hi tiyimiserile ku tshama hi khomekile entirhweni wa Yehovha. (Ps. 110:3; 1 Kor. 15:58) Leswi “nkarhi lowu seleke wu [nga koma],” xana hi nga swi kota ku tirhisa nkarhi wa hina wa risima ensin’wini hi burisana ni vanhu lava engetelekeke?—1 Kor. 7:29.
Hi fanele hi pfumelelana ni swiyimo leswaku hi ta kota ku wu tirhisa hi vutlhari nkarhi wa hina. Hi xikombiso, loko minkarhi yo tala u heta nkarhi wo ringana awara kumbe ku tlula loko u chumayela hi ndlela yo karhi kambe u nga kumi vanhu, xana u nga endla mindzulamiso leswaku u ta kuma vanhu naswona u kota ku vulavurisana ni vanhu lava engetelekeke? Swiyimo swa hambana hi ku ya hi tindhawu. Hambiswiritano, swiringanyeto leswi landzelaka swi nga ha ku pfuna leswaku u wu tirhisa kahle nkarhi wa wena leswaku u papalata ku “[ba] moya.”—1 Kor. 9:26.
Ku Chumayela Hi Yindlu Ni Yindlu: Vahuweleri se va ni malembe yo tala va sungula ntirho wa vona wa nsimu hi ku chumayela hi yindlu ni yindlu. Hambiswiritano, leswi vanhu vo tala va tirhaka, ha yini u nga ringeti ku chumayela hi yindlu ni yindlu nindzhenga kumbe nimadyambu, loko vanhu vo tala va ri kona emakaya naswona va ri ni nkarhi? Ku chumayela exitarateni kumbe etindhawini ta mabindzu ninhlikanhi swi nga ha endla leswaku hi kuma vuyelo lebyinene.
Ku Chumayela eTindhawini Ta Mani Na Mani: Ku fanele ku vekiwa matafula ni swigolonyana etindhawini leti ku hundzaka vanhu vo tala ensin’wini ya vandlha ra n’wina. (Vona Vutirheli Bya Hina Bya Mfumo bya July 2013 tl. 5.) Loko ku nga ha hundzi vanhu vo tala endhawini leyi hlawuriweke leswaku ku chumayeriwa eka yona, Komiti ya Ntirho ya Vandlha yi nga ha endla xiboho xa leswaku xigolonyana kumbe tafula swi fanele swi susiwa swi yisiwa endhawini leyi ku hundzaka vanhu vo tala.
Maendzo Yo Vuyela Ni Tidyondzo Ta Bibele: Xana mi nga swi kota ku ya eka maendzo yo vuyela ni le ka tidyondzo ta Bibele hi nkarhi lowu mi nga taka mi nga kumi vanhu loko mi chumayela hi tindlela letin’wana? Hi xikombiso, loko mi kuma vanhu loko mi chumayela hi Mugqivela nimixo, xana mi nga fambisa tidyondzo ta n’wina ta Bibele loko se ri rhengile kumbe nimadyambu? Loko mi endla maendzo yo vuyela, xana vahuweleri va nga aviwa va va mintlawa leyitsongo va famba hi timovha leswaku va ta kota ku kuma vanhu vo tala?
Hambileswi hi nga wu vikaka nkarhi lowu hi wu hetaka hi ri eku chumayeleni, kambe hi tsaka swinene loko hi kuma vanhu lava hi yingiselaka. Loko u kuma leswaku loko u chumayela hi ndlela yo karhi hi nkarhi wo karhi a wu kumi vanhu, ringeta ku chumayela hi ndlela yin’wana. Khongela eka Yehovha, “N’wini wa ntshovelo,” u kombela nkongomiso leswaku u ta wu tirhisa kahle nkarhi wa wena loko u ri ensin’wini!—Mat. 9:38.