Endlani Hinkwaswo Ku Dzunisa Xikwembu
1 Kunene swa phyuphyisa ku hlangana ni vamakwerhu lava rhandzekaka va xinuna ni va xisati! (1 Kor. 16:17, 18) Leswi hi swi endla eminhlanganweni, etinhlengeletanweni, emintsombanweni ni le vutirhelini bya nsimu. Nakambe hi tsakela xinakulobye eka swiendlakalo leswi nga hleriwangiki, swo tanihi loko hi ri ni vaendzi emakaya ya hina. Loko hi endla tano, hi kombisa malwandla ni ku khutazana. (Rhom. 12:13; 1 Pet. 4:9) Loko hi endla malunghiselelo ya swakudya swa nkhuvo wa vukati, hi fanele ku tsundzuka ndzayo leyinene leyi nga eka Xihondzo xo Rindza xa Xinghezi xa April 15, 1984.
2 Ku Titsakisa Ka Xinghana Loku Hleriweke: Hambi ha “dya, hambi [ha] nwa, hambi [hi] endla yini na yini,” hi fanele ku “[endla] hinkwaswo ku dzunisa Xikwembu.” (1 Kor. 10:31-33) Van’wana a va xi hlayisi xitsundzuxo lexi, naswona swiphiqo swi hambeta swi andza hikwalaho ka swinkhubyana swa ku titsakisa leswi nga ni vanhu vo tala ngopfu ni leswi nga languteriwiki kahle. Etindhawini tin’wana, ku rhambiwa madzana ya vanhu eminkhubyeni leyikulu laha ku nga ni swihungasi swa misava. Minkarhi yin’wana lava vaka kona va komberiwa ku hakela mali yo nghena kumbe yin’wana. Minkhuvo yo tano yi fana kahle ni ya misava, leyi moya wa yona wu nga pfumelelaniki ni misinya ya milawu ya Bibele.—Rhom. 13:13, 14; Ef. 5:15-20.
3 Ku vikiwe leswaku ku lunghiseleriwe swakudya swa nkhuvo wa vukati leswi nga ni vaendzi lava tlulaka 1 000. Etindhawini tin’wana, swirhambo swa nkhuvo wa vukati swi yisiwe eka vanhu lavakulu ntsena, leswaku va va kona eswakudyeni swa nkhuvo wa vukati, ku nga ri vana. Van’wana va ye eswakudyeni swa nkhuvo wa vukati va nga rhambiwanga. Xana leswi swi fambisana ni nkongomiso lowu nyikeriweke eku sunguleni? Nikatsongo! Hikwalaho ka ku nonon’hweriwa hi ku langutela mintlawa yoleyo leyikulu kahle, swiphiqo swi ve kona. Vuharhi, ku nwa swakunwa swa xihoko ku tlula mpimo, hambi ku ri ku tikhoma loko biha minkarhi yin’wana ku ve kona. (Ef. 5:3, 4) Leswi swi endle leswaku van’wana va susiwa kumbe ku soriwa hi nawu naswona vakulu van’wana ni malandza ya vutirheli va tlhele va lahlekeriwa hi lunghelo ra vona ra ntirho. Kunene, swinkhubyana swo tano swa ku titsakisa a swi n’wi fundzhi Yehovha. Ematshan’weni ya sweswo, swi tisa ndzhukano eka vito lerinene ra vandlha ni ku khunguvanyisa van’wana.—1 Kor. 10:23, 24, 29.
4 Vakreste va khutaziwa ku kombisa malwandla, kambe leswi khutaziwaka i ku tiyisana hi tlhelo ra moya. (Rhom. 1:11, 12) Swinkhubyana leswitsongo hi ntolovelo swi kahle. Buku leyi nge Vutirheli Bya Hina yi vula leswi eka matluka 135-6: “Minkarhi yin’wana, mindyangu yo talanyana yi nga ha rhambiwa ekaya ku ta tsakela vunghana bya Vukreste. . . . Entiyisweni, lava va amukelaka vaendzi eka swiyimo swo tano va fanele ku titwa va ri ni vutihlamuleri hi voxe hi leswi humelelaka. Hi ku tsundzuka leswi, Vakreste lava xiyisisaka va swi vone swi ri vutlhari ku hunguta nhlayo ya vanhu ni ku leha ka xiendlakalo xa kona.” Yesu u kombise leswaku a ku laveki swilo swo tala loko pakani ya hina ku ri ku khutaza vanghana va hina hi tlhelo ra moya.—Lk. 10:40-42.
5 I swinene ku kombisa malwandla eka Vakreste-kulorhi. Hambi swi ri tano, ku ni ku hambana lokukulu exikarhi ka xiendlakalo lexi ringaniseriweke ekaya ka hina ni nkhuvo lowukulu lowu kombisaka moya wa misava endhawini leyi hirhiweke. Loko u rhamba van’wana leswaku va ku endzela, u fanele ku tiyiseka leswaku u va ni vutihlamuleri eka hinkwaswo leswi humelelaka.—Vona Xihondzo xo Rindza xa August 15, 1992, matluka 17-20.
6 Entiyisweni, Yehovha u hi katekise hi vumakwerhu lebyi hi kumaka xikhutazo lexinene eka byona lexi hi susumetelaka ku hambeta ni mintirho leyinene. (Mt. 5:16; 1 Pet. 2:12) Hi ku kombisa ku ringanisela ni ku olova eswinkhubyanini swa ku titsakisa, nkarhi na nkarhi hi ta yisa ku dzuneka eka Xikwembu xa hina ni ku aka van’wana.—Rhom. 15:2.