Tekelela Yesu Hi Ku Twarisa Ntiyiso Masiku Hinkwawo

¹ Yesu a a ri ni ntirho wo karhi lowu a a fanele ku wu hetisisa loko a ta emisaveni. A wu olova ngopfu: ‘Ku veka vumbhoni ehenhla ka ntiyiso.’ (Yoh. 18:37) U twarise ntiyiso mayelana ni timfanelo ni swikongomelo swa Tata wa yena leswo hlamarisa. Ntirho lowu eka yena a wu fana ni swakudya; vutomi bya yena hinkwabyo a byi sekeriwe eka wona. (Yoh. 4:34) Luka u vike leswaku Yesu a a tshama a ri karhi a “dyondzisa eTempeleni masiku hinkwawo.” (Lk. 19:47, xiitaliki i xerhu.) Yesu u tirhise nkarhi hinkwawo lowu a a wu ri kona. (Yoh. 9:4) Emahlweninyana ka rifu rakwe, u swi kotile ku byela Tata wa yena a ku: “Ndzi ku dzunisile laha misaveni, hi ku heta ntirho lowu u ndzi nyikeke wona leswaku ndzi wu tirha.”—Yoh. 17:4.

² Loko timbilu ta hina ti tele hi ku tlangela hinkwaswo leswi Yehovha a swi endleke, hi ku fanana hi titwa hi susumeteleka ku vulavula hi yena masiku hinkwawo. Hi va hi fana ni vadyondzisiwa va Yesu lava hi xivindzi va nga te: “Hi nga ka hi nga koti ku tshika ku vula leswi hi swi voneke ni leswi hi swi tweke.” (Mint. 4:20) Ku vulavula ka vona hi Yehovha a ku ya emahlweni, hikuva xiviko xi vula leswaku “masiku hinkwawo, a va nga rhuteli.” (Mint. 5:42, xiitaliki i xerhu.) Hi fanele hi tivutisa, ‘Xana ndzi tekelela Mudyondzisi wa mina, Yesu?’

³ Ku Chumayela Hi Xihatla: Yesu u vhumbe leswaku loko rungula ra Mfumo ri twarisiwile emisaveni hinkwayo, “hi kona makumu ma nga ta fika.” (Mt. 24:14) Leswi swi fanele swi kandziyisa eka hina nkoka ni xihatla xa ntirho wa hina. Leswi vutomi bya timiliyoni hi ku kongoma byi nga le khombyeni, ku hava xin’wana xa nkoka kumbe lexi vuyerisaka lexi hi nga xi endlaka. Leswi mafambiselo lawa ya swilo ma nga kusuhi ni ku hela, nkarhi lowu saleke wo hetisisa ntirho lowu a wa ha ri wungani!

⁴ Swiviko swi komba leswaku Yehovha u hatlisisa ku hlengeletiwa ka vanhu lava fanaka ni tinyimpfu. (Esa. 60:22) Eswiphen’wini swo tala swa misava, vanhu va khitikanela entiyisweni, va huwelela hi ntsako va ku: “Hi ta ya na ṅwina, hikuv̌a hi twile leŝaku Yehova o na ṅwina”! (Zak. 8:23) Marito ya Yesu ya tirha ku tlula nkarhi wihi na wihi lowu hundzeke: “Ntshovelo i wukulu, kambe vatirhi a va talanga. . . . Khongelani N’wini wa ntshovelo, leswaku a rhuma vatirhi eku tshoveleni ka yena.” (Mt. 9:37, 38) Xana sweswo a swi hi khutazi leswaku hi hiseka ku fana ni vadyondzisiwa va Yesu lava “masiku hinkwawo, [a] va ri karhi va dzunisa Xikwembu”? (Xiitaliki i xerhu.)—Lk. 24:53.

⁵ Endla Ntiyiso Wu Tiviwa Masiku Hinkwawo: Masiku hinkwawo, hi fanele hi lava tindlela to hundzisela ntiyiso eka van’wana. Minkarhi yi tshama yi pfulekile. Xana u nga tirhisa timinete ti nga ri tingani ku bela munghana riqingho kumbe loyi u n’wi toloveleke loyi u vonaka onge u ta angula kahle? Kumbe swi njhani ku tsala papila ri ya eka un’wana loyi u nga n’wi kumangiki ekaya? Xana u tshama u anakanya hi ku fambisa xiphephana eka van’wamabindzu loko u ri karhi u xava? Kumbexana, u nga ha anakanya hi minkarhi yin’wana leyi u vaka na yona siku rin’wana ni rin’wana yo avelana ni van’wana ntshembo wa wena. Loko u endla matshalatshala yo kombisa xivindzi, Yehovha u ta ku pfuna.—1 Tes. 2:2.

⁶ Kutani ke, loko hi sungula ntirho wa siku na siku, hi fanele hi tivutisa, ‘Xana ndzi ta avelana ni un’wana ntshembo wa mina loko nkarhi wu ndzi pfulekela namuntlha?’ Tekelela langutelo ra Yesu, la hlamuseleke xivangelo xa ku rhumiwa ka yena emisaveni a ku: “Ndzi fanele . . . ndzi ya twarisa Evhangeli ya Mfumo wa Xikwembu.” (Lk. 4:43, xiitaliki i xerhu.) Loko hi lava ku fana ni Mudyondzisi wa hina, hi ta endla leswi fanaka.—Lk. 6:40.