Ku Tikarhata Eku Nyikeleni Ka Vumbhoni Tanihi Leswi Makumu Ma Tshinelaka
1 Nguva yo tshovela i nkarhi wo tsakisa swinene. Nakambe i nkarhi lowu ku tirhiwaka hi matimba. Nkarhi wa ku tshovela swibyariwa i wutsongo. Vatirhi a va fanelanga va tshama hi mavoko.
2 Loko a vulavula hi ndlela yo fanekisela, Yesu u fanise “makumu ya mafambiselo lawa ya swilo” ni ntshovelo. (Mat. 13:39) Hi hanya emakumu ya mafambiselo lawa ya swilo, hi ni nkarhi wutsongo lowu saleke wa ku nyikela vumbhoni “emisaveni hinkwayo leyi akiweke.” (Mat. 24:14) Tanihi leswi makumu ma tshineleke swinene, hi fanele hi tikarhata swinene evutirhelini. Ha yini? Yesu u hlamuserile: “Ntshovelo i wukulu, kambe vatirhi a hi vangani.”—Mat. 9:37, 38; Rhom. 12:11.
3 Wu Endle Hi Xihatla: Loko Yesu a sungula ntirho wakwe lowukulu wa ku chumayela, a ri ni malembe manharhu ni hafu leswaku a heta leswi a averiwe ku swi endla. U chumayele a ri ni langutelo ra xihatla, u te: “Ndzi fanele ku vula mahungu lamanene ya mfumo wa Xikwembu, hikuva hi swona leswi ndzi rhumeriweke swona.”—Luka 4:43.
4 Yesu u nghenise langutelo leri fanaka ra xihatla ra ku gingiriteka eka vadyondzisiwa vakwe. (Mar. 13:32-37) Hikwalaho “siku ni siku etempeleni ni hi yindlu ni yindlu a va hambeta va nga rhuteli ku dyondzisa ni ku vula mahungu lamanene hi ta Kreste, Yesu.” (Mint. 5:42) Mintirho leyi nga nyawuriki a yi nga ri ya nkoka evuton’wini bya vona. Hambileswi a va nga talanga, va humelerile eku chumayeleni ka mahungu lamanene “eka ntumbuluko hinkwawo lowu nga ehansi ka tilo.”—Kol. 1:23.
5 Hina hi ni xivangelo lexikulu xa ku hlakulela langutelo leri fanaka ra ku gingiriteka sweswi, tanihi leswi “makumu ya swilo hinkwaswo ma tshinel[aka].” (1 Pet. 4:7) Yehovha u veke siku ni nkarhi wa ku herisa mafambiselo lawa ya swilo. (Mat. 24:36) Ntirho wa ku chumayela wu ta hetiwa hi nkarhi lowu saleke. Hikwalaho hi endla matshalatshala lama engetelekeke leswaku hi fikelela vanhu vo tala hi mahungu lamanene.
6 Hi ku tikarhata entirhweni wa ku nyikela vumbhoni tanihi leswi makumu ma tshinelaka, hi ta tsaka ku byela Yehovha, hilaha Yesu a vuleke hakona: ‘Hi hetile ku endla ntirho lowu u hi nyikeke wona leswaku hi wu endla.’—Yoh. 17:4.