“Chumayela Rito . . . Hi Xihatla”
1 Loko u amukela nchumu lowu nga ni marito lama nge “HI XIHATLA,” xana u endla yini? Marito lama nge “hi xihatla” ma vula “ku yisa nyingiso eka xo karhi hi nkarhi wolowo.” Hikwalaho swa fanela leswi muapostola Pawulo a vuleke leswaku Vakreste va fanele va “chumayela rito . . . hi xihatla.” (2 Tim. 4:2) Xana ntirho lowu u wu nyika nyingiso wa xihatla?
2 Swi nga ha endleka Pawulo a a byeriwe leswaku vamakwavo van’wana lava nga Vakreste a va ri ni mboyamelo wa ku ‘loloha entirhweni wa vona.’ (Rhom. 12:11) Sweswo swi endle leswaku va nga kumi ntshovelo wo nyawula kun’we ni ntsako lowu a va ta wu kuma hi ku pfuna vanhu van’wana.
3 Langutelo Ra Yesu Hi Vutirheli: Mayana ntsako lowu Yesu a wu kumeke hi ku endla vutirheli byakwe! U te: “Swakudya swa mina i ku endla ku rhandza ka loyi a ndzi rhumeke ni ku heta ntirho wakwe.” Xikombiso xa Yesu xi nyike vadyondzisiwa vakwe matimba, naswona u va khutazile hi ku va byela leswaku ‘masimu ma basele ntshovelo.’ (Yoh. 4:34, 35) Langutelo rakwe ra xihatla leri a ri kombiseke evutirhelini byakwe hinkwabyo, ri kombisiwe kahle hi marito lawa a ma byeleke vadyondzisiwa vakwe a ku, “kombelani N’wini wa ntshovelo leswaku a rhumela vatirhi entshovelweni wakwe.” (Mat. 9:38) Yesu a a swi tiva leswaku ntirho wakwe i ku chumayela, naswona a a nga lavi nchumu wu n’wi sivela ku endla tano.
4 Ku Vuriwa Yini Hi Hina? Namuntlha, i swa xihatla swinene ku tlula rini na rini leswaku hi ya emahlweni hi endla ntirho wo chumayela. Etindhawini to tala ta misava, masimu ma wupfele ntshovelo. Hambi ku ri ematikweni lawa swi tikombaka onge vumbhoni byi nyikeriwe hi ku hetiseka, vanhu va magidi va ha khuvuriwa lembe ni lembe. Leswi makumu ya mafambiselo lawa ya swilo ma nga kwala nyongeni, ku ni “swo tala swo swi endla entirhweni wa Hosi.” (1 Kor. 15:58) Sweswi i swa risima leswaku hi tikarhata hi matimba ku byela van’wana mahungu lamanene ya Mfumo ku tlula rini na rini.
5 A hi hisekeleni ku yisela van’wana mahungu lamanene, hi ku chumayela hi yindlu ni yindlu kumbe kwihi ni kwihi laha hi nga kumaka vanhu kona ensin’wini. Loko hi hlanganyela hi xitalo hilaha hi kotaka hakona, hi swi veka erivaleni leswaku hi rhangisa Mfumo evuton’wini bya hina. (Mat. 6:33) Hi ta khapakhapa hi ntsako loko hi chumayela rito hi ku tshembeka ni hi xihatla.