Xana Ndzi Nga Va Kuma Njhani Lava Yingiselaka?

¹ Emutini wa Filipi, “Lidiya, muxavisi wa tinguvu to vangama ta xivunguvungu, . . . a a ri eku yingiseni; kutani Hosi yi pfula mbilu ya yena leswaku a twisisa leswi vuriwaka hi Pawulo.” (Mint. 16:14, xiitaliki i xerhu.) Xana mhaka leyi yi hi dyondzisa yini? Ku yingisela hi kona ku pfulaka nyangwa ya leswaku munhu a dyondza ntiyiso. Ku humelela ka hina loko hi avela rungula ra Mfumo ku titshege ngopfu-ngopfu hi ku tiyimisela ku yingisela ka n’wini wa muti. Loko hi kuma munhu la yingiselaka, hakanyingi swa olova ku vula rungula ra hina. Kambe ku endla munhu leswaku a yingisela swi nga va ntlhontlho. Xana hi nga endla yini?

² Hi nga si ya ensin’wini, hi fanele hi xiya ndlela leyi hi langutekaka ha yona ni switirho leswi hi nga ta swi tirhisa. Ha yini? Vanhu va na mboyamelo wo yingisela munhu loyi a nga na xindzhuti. Xana hi ambale kahle ni hi ndlela leyi xiximekaka? Hambiloko ku ambala hi ndlela ya futa swi tolovelekile emisaveni, hi papalata futa ro tano hikuva hi vatirheli lava yimelaka Mfumo wa Xikwembu. Ku languteka ka hina hi basile ni ku hleleka ku engetela vumbhoni lebyinene eka rungula ra Mfumo leri hi ri chumayelaka.

³ Vana Ni Vunghana Naswona U Xixima: Ku nga khathariseki langutelo leri cincaka ra namuntlha, vanhu vo tala va ha yi xixima Bibele naswona va ta angula kahle eka bulo leri xiximekaka ni ra xinghana ra mayelana ni leswi tameriweke hi Bibele. Ku n’wayitela ka xinghana ku nga endla n’wini wa muti a rhula naswona ku pfula ndlela ya bulo leri tsakisaka. Vunene ni mikhuva ya hina leyinene nakambe swi fanele swi kombisiwa eku vulavuleni ni le mahanyelweni ya hina, leswi swi katsa ni ku yingisela ka hina hi ndlela leyi xiximekaka eka leswi vuriwaka hi n’wini wa muti.

⁴ Xikongomelo xa hina i ku avelana ni van’wana hi xitshembiso xa Bibele. Hi ri karhi hi tsundzuka leswi, hi fanele hi tiyiseka leswaku bulo ra hina ra tsakisa, ri nga vi leri solaka kumbe leri tlhontlhaka. A ku na xilaveko xo dya nkarhi u phikizana ni munhu loyi swi nga erivaleni leswaku wo va mukaneti. (2 Tim. 2:23-25) Hi nga hlawula eka swingheniso swo tala leswi khutazaka ni leswi nga enkarhini leswi nga eka Vutirheli Bya Hina Bya Mfumo ni le bukwini leyi nge Ku Hlamulana. Kavula, hi fanele hi swi lunghiselela kahle leswaku hi ta vulavula kahle ni hi ndlela leyi khorwisaka.—1 Pet. 3:15.

⁵ Endzhaku ka riendzo ra hina ro sungula, vini va miti va nga ri vangani va swi kota ku swi tsundzuka kahle leswi hi swi vuleke. Hambiswiritano, vo tala va vona va nga tsundzuka mukhuva lowu rungula ri vuriweke ha wona. A hi fanelanga hi ya tekela ehansi matimba ya vunene ni musa. Hakunene, ku na vanhu vo tala lava fanaka ni tinyimpfu ensin’wini ya ka hina lava va nga ta yingisela ntiyiso hilaha Lidiya a endleke hakona eka lembe-xidzana ro sungula. Ku xiya ndlela leyi hi langutekaka ha yona ni ndlela leyi hi vulavulaka ha yona swi nga khutaza vanhu lavanene leswaku va yingisela Rito ra Xikwembu ni ku ri amukela hi ku tsaka.—Mar. 4:20.