Bokisi Ra Swivutiso

◼ Hi wahi matirhiselo lamanene ya rito “makwerhu”?

Loko hi ri tirhisa hi ku kongoma, rito “makwerhu” ri vula munhu loyi mi nga vana va vatswari van’we. Vuxaka lebyi bya ntumbuluko hakanyingi byi vanga vun’we bya rirhandzu, ku tshinelelana loku vanhu lava va nga na kona ku tlhela ku engeteriwa hi vun’we bya ntshamisano, mbango ni mintlhaveko.

Yesu u dyondzise vadyondzisiwa vakwe leswaku va vitana Yehovha exikhongelweni va ku “Tata Wa Hina.” Ku tirhisiwa ka mavitanelo wolawo ku hlamusela leswaku tanihi Vakreste, hinkwerhu hi xiphemu xa ndyangu wun’we laha hi tiphinaka hi vuxaka lebyikulu bya Vukreste. Leswi swi tlhele swi kandziyisiwa hi Yesu loko a byela valandzeri vakwe leswaku “n’wina hinkwenu mi vamakwavo.”—Mt. 6:9; 23:8.

Hikwalaho ka vuxaka bya hina bya le kusuhi bya Vukreste endyangwini wa Xikwembu, hi vitanana “Makwerhu,” ngopfu-ngopfu eminhlanganweni ya vandlha. Hambileswi van’wana va nga tolovela ku tirhisa marito lama, “Tatana” na “Manana” loko va vitana lavakulu eka vona eminhlanganweni ya Vukreste, hi mi khutaza hinkwenu ku tirhisa mavitanelo ya Vukreste mi ku, “Makwerhu.” Hi minkarhi leyi ya swa moya, la fambisaka nhlangano u vitana vanhu lava khuvuriweke a ku, “makwerhu” ivi a hetelela hi xivongo xa munhu loyi a n’wi vitanaka.

Ku vuriwa yini hi loko munhu loyi a nga khuvuriwangiki a navela ku hlanganyela eminhlanganweni? Loko munhu wa kona a hlanganyele na vanhu va Yehovha nkarhi wo leha naswona a ri kusuhi ni ku tinyiketela, a titeka a ri un’wana wa Timbhoni ta Yehovha, a ku nge vi na xihinga ku n’wi vitana “Makwerhu” ivi u hetelela hi xivongo. Leswi swi ta fanela ngopfu-ngopfu loko munhu wa kona ana se a ri muhuweleri la nga khuvuriwangiki.

Hi hala tlhelo, vanhu lava tsakelaka lava va ha ku sungulaka ku va kona eminhlanganweni ya hina a va si teka goza leri nga ta va hlawula tanihi vandyangu wa Xikwembu. Vanhu lava a va nge vitaniwi “Makwerhu,” hikuva vuxaka bya moya bya ndyangu wa Xikwembu a byi va khumbi. Kutani ke, hi nkarhi wa minhlangano, hi ta va vitana hi ndlela ya ximfumo, hi tirhisa xithopo lexi faneleke xo tanihi “Nkulukumba” ku landzela xivongo.

Ku tirhisa rito “makwerhu” eminhlanganweni ya hina ya vandlha swi komba xiboho lexikulu xa vun’we ni xa risima ku tlula lexi kombisiwaka hi ku vitana hi vito. Ri hi tsundzuxa hi vuxaka lebyi katekisiweke lebyi hi tiphinaka ha byona tanihi ndyangu wa moya ehansi ka Tatana un’we, Yehovha Xikwembu. Nakambe hi tsundzuxiwa hi rirhandzu lero enta leri hi nga na rona exikarhi ka hina.—Ef. 2:19; 1 Pet. 3:8.