Bokisi Ra Swivutiso

◼ I vamani va nga ni mfanelo ya ku khongela eminhlanganweni ya vandlha?

Xikhongelo i xiphemu xa nkoka xa vugandzeri bya hina evandlheni. Ku yimela van’wana emahlweni ka Yehovha i lunghelo ra risima ni vutihlamuleri lebyikulu. Hikwalaho ka leswi xikhongelo xi nga xa nkoka, vakulu va fanele ku tirhisa vutlhari loko va hlawula vamakwerhu lava nga fanelekaka ku khongela eminhlanganweni. Vamakwerhu lava khuvuriweke, lava yimelaka vandlha va fanele ku va vatirheli lava nga Vakreste lava wupfeke, lava tekiwaka va ri swikombiso leswinene naswona va xiximiwaka evandlheni. Swikhongelo swa vona leswi kombisaka xichavo ni ku xixima swi fanele swi komba leswaku va ni vuxaka lebyinene na Yehovha Xikwembu. Xihloko lexi nge “Ku Khongela eMahlweni Ka Van’wana Hi Ku Titsongahata,” lexi kumekaka eka Xihondzo xo Rindza xa May 15, 1986, xi xaxameta misinya ya milawu leyi nga pfunaka eka lava va yimelaka vandlha hi xikhongelo.

Vakulu a va nge n’wi kombeli makwerhu la tiviwaka a ri ni xisolo kumbe la nga hlutekangiki emianakanyweni leswaku a khongela. Ni makwerhu la toloveleke ku vilela kumbe ku tirhisa xikhongelo leswaku a phofula ku nga twani ka yena ni van’wana, a nge tirhisiwi. (1 Tim. 2:8) Hambiloko makwerhu la ha riki emalembeni ya kondlo-a-ndzi-dyi a nga vaka a khuvuriwile, vakulu va fanele ku vona leswaku u wupfile hi tlhelo ra moya lerova a nga yimela vandlha hi xikhongelo.—Ringanisa Mintirho 16:1, 2.

Minkarhi yin’wana eminhlanganweni ya ntirho wa nsimu, swi nga boha leswaku makwerhu wa xisati la khuvuriweke a khongela loko makwerhu wa xinuna la fanelekaka a nga ri kona leswaku a yimela ntlawa hi xikhongelo. U fanele ku ambala xifunengeto lexi faneleke enhlokweni. Loko swi vonaka onge makwerhu la fanelekaka a nge vi kona eminhlanganweni yo karhi ya ntirho, vakulu va fanele ku avela makwerhu wa xisati la fanelekaka leswaku a fambisa nhlangano wolowo.

Hi ntolovelo mutshama-xitulu wa Nhlangano wa le Rivaleni hi yena la pfulaka hi xikhongelo. Kambe, eminhlanganweni yin’wana ya vandlha, loko ku ri ni vamakwerhu vo hlayanyana lava fanelekaka, a swi bohi leswaku mutshama-xitulu a pfula hi xikhongelo, ku nga averiwa makwerhu un’wana wa xinuna leswaku a pfula kumbe a pfala hi xikhongelo. Nilokoswiritano, makwerhu la nga ta averiwa ku endla xikhongelo enhlanganweni wa vandlha, u fanele ku tivisiwa ka ha ri ni nkarhi leswaku a ta anakanyisisa hi leswi a nga ta swi vula. Kutani u ta kota ku endla xikhongelo lexi twisisekaka, lexi humaka embilwini ni lexi fanelaka nhlangano wolowo.

Swikhongelo swo tano a swi fanelanga swi leha. Loko makwerhu a yimela vandlha hi xikhongelo, hi ntolovelo u ta twiwa ku antswa loko a yime hi milenge, a vulavulela ehenhla, hi ndlela leyi twakalaka. (Ringanisa 1 Vakorinto 14:16.) Leswi swi ta endla leswaku hinkwavo lava yingiseke va xi twa xikhongelo xexo kutani emakumu ka xona va ku “Amen” swi huma embilwini.—1 Tikr. 16:36.