Xiyenge 7: Ku Khongela Ni Xichudeni Xa Wena
Ku Fambisa Tidyondzo Ta Bibele Leti Endlaka Nhluvuko
1. (a) Ha yini swi fanerile ku pfula ni ku pfala dyondzo ya Bibele hi xikhongelo? (b) Xana xichudeni hi nga xi hlamusela njhani xivangelo xo khongela?
1 Leswaku swichudeni swa Bibele swi endla nhluvuko hi tlhelo ra moya ku laveka mpfuno wa Yehovha. (1 Kor. 3:6) Hikwalaho, loko se u sungule dyondzo ni munhu wo karhi swi fanerile ku yi sungula ni ku yi gimeta hi xikhongelo. Minkarhi yo tala hi nga endla tano siku ro sungula loko hi sungula dyondzo ni vanhu lava rhandzaka vukhongeri. Kasi eka swichudeni swin’wana, swi nga ha lava leswaku hi rhanga hi vona loko se swi fanerile ku khongela. U nga ha tirhisa Pisalema 25:4, 5 na 1 Yohane 5:14 ku pfuna xichudeni leswaku xi twisisa xivangelo xa ku va swi fanerile leswaku u khongela, u tlhela u tirhisa Yohane 15:16 ku xi hlamusela nkoka wa ku khongela eka Yehovha hi vito ra Yesu Kreste.
2. Loko makwerhu wa xisati a famba ni makwerhu wa xinuna la khuvuriweke kumbe ni muhuweleri wa xinuna la nga khuvuriwangiki, xana ku fanele ku khongela mani?
2 I mani la faneleke a khongela eka dyondzo ya Bibele? Loko makwerhu wa xinuna la khuvuriweke a famba ni makwerhu wa xisati eka xichudeni xa Bibele, makwerhu wa xinuna hi yena a nga ta khongela, hambiloko dyondzo yi ta fambisiwa hi makwerhu wa xisati a ambale xo funengeta nhloko. (1 Kor. 11:5, 10) Hi hala tlhelo, loko muhuweleri wa xinuna la nga khuvuriwangiki a famba ni makwerhu wa xisati la khuvuriweke eka dyondzo ya yena, ku fanele ku khongela makwerhu wa xisati. Kambe u fanele a ambala xo funengeta nhloko loko a khongela niloko a fambisa dyondzo.
3. Hi tihi timhaka leti faneleke ti boxiwa loko hi khongela ni xichudeni xa Bibele?
3 Leswi Nga Katsiwaka eXikhongelweni: Swikhongelo leswi endliwaka eka dyondzo ya Bibele a swi fanelanga swi leha, kambe swi fanele swi ba nhloko ya mhaka. Handle ko kombelela mpfuno wa Xikwembu eka dyondzo yoleyo ni ku nkhensa mintiyiso leyi dyondziweke, nakambe swi fanerile ku dzunisa Yehovha tanihi leswi ku nga yena Xihlovo xa ndzetelo wolowo. (Esa. 54:13) Nakambe hi nga boxa ndlela leyi hi xi rhandzaka ngopfu ha yona xichudeni ni ndlela leyi hi yi tlangelaka ha yona nhlengeletano leyi Yehovha a yi tirhisaka. (1 Tes. 1:2, 3; 2:7, 8) Loko hi kombela Yehovha leswaku a katekisa matshalatshala lawa xichudeni xi ma endlaka leswaku xi tirhisa leswi xi swi dyondzaka, sweswo swi nga xi pfuna leswaku xi vona nkoka wa ku va ‘muendli wa rito.’—Yak. 1:22.
4. Ku va ni vuyelo byihi loko dyondzo ya Bibele yi sunguriwa ni ku gimetiwa hi xikhongelo?
4 Ku va ni vuyelo byo tala loko hi khongela ni xichudeni xa Bibele. Xikhongelo xi tisa mikateko ya Xikwembu. (Luka 11:13) Xi kandziyisa nkoka wa ku dyondza Rito ra Xikwembu. Loko xichudeni xi yingisela swikhongelo swa hina, xi dyondza ndlela yo khongela. (Luka 6:40) Ku tlula kwalaho, swikhongelo leswi humaka embilwini leyi phuphumaka hi ku rhandza Xikwembu ni ku xixima timfanelo ta xona leti nga ringanisiwiki na nchumu, swi nga pfuna xichudeni leswaku xi va ni vuxaka lebyikulu na Yehovha.