Bokisi Ra Swivutiso

◼ Xana hi fanele hi khongela eka dyondzo ya Bibele leyi fambisiwaka hi yime enyangweni?

Ku ni mikateko yo tala leyi vaka kona loko hi pfula hi xikhongelo hi tlhela hi pfala ha xona eka dyondzo ya Bibele. Loko hi khongela, hi va hi kombela moya wo kwetsima wa Yehovha leswaku wu hi pfuna eka bulo ra hina. (Luka 11:13) Xikhongelo xi tlhela xi kombisa xichudeni xa hina leswaku dyondzo ya Bibele i ya nkoka ni ku xi dyondzisa ndlela yo khongela. (Luka 6:40) Hikokwalaho, i swinene ku sungula hi xikhongelo ni munhu loyi hi dyondzaka na yena Bibele to ho suka. Hambiswiritano, tanihi leswi swiyimo swi nga faniki, mufambisi wa dyondzo u fanele a tirhisa vutlhari eku endleni ka xiboho xa leswaku ku fanele ku khongeriwa eka dyondzo ya Bibele leyi fambisiwaka ku yimiwe kunene enyangweni.

Mhaka ya nkoka leyi faneleke yi xiyiwa, i ndhawu leyi dyondzo yi khomeriwaka eka yona. Loko dyondzo yi fambisiwa endhawini leyi rhuleke, ku nga ha endliwa xikhongelo xo koma xo pfula ni xo pfala eka dyondzo leyi khomiwaka nkarhi na nkarhi. Hambiswiritano, loko ku ri leswaku ndhawu leyi dyondzo yi fambisiwaka eka yona a yi rhulanga, ku khongela swi nga endla leswaku xichudeni xi nga ntshunxeki, kutani swi nga va swinene ku rindza kukondza dyondzo yi khomeriwa endhawini leyi rhuleke. Ku nga khathariseki laha dyondzo yi khomeriwaka kona, hi fanele hi tirhisa vutlhari lebyinene loko hi lava ku khongela.—Vona Vutirheli Bya Hina Bya Mfumo bya March 2005 tluka 4.