“Aka Yindlu Ya Wena”

¹ Entiyisweni, eka ndhavuko wun’wana ni wun’wana emisaveni hinkwayo, vutomi bya ndyangu bya hahluka. Misava ya Sathana yi tinyiketele vuxisi ni ku tikhoma loko biha. (1 Yoh. 5:19) Leswi swi kandziyisa leswaku hi teka goza ro ‘aka mindyangu ya hina’ ni ku dyondzisa van’wana ndlela leyi va nga endlaka leswi fanaka ha yona eka mindyangu ya vona.—Swiv. 24:3, 27.

² Misinya Ya Milawu Ya Bibele Ya Sirhelela: Xihundla xa ntsako wa ntiyiso endyangwini xi kumiwa hi ku tirhisa misinya ya milawu ya Bibele. Mintiyiso leyi ya matimba yi pfuna xirho xin’wana ni xin’wana xa ndyangu eswiyin’weni hinkwaswo swa vutomi. Ndyangu lowu yi tirhisaka wu ta tsaka naswona wu ta tiphina hi ku rhula ka Xikwembu.—Ringanisa Esaya 32:17, 18.

³ Misinya ya milawu leyi nga ta hi pfuna ku aka mindyangu ya hina yi hlamuseriwe hi ku kongoma ebukwini leyintshwa leyi nge, Xihundla Xa Ntsako eNdyangwini. Ndzima yin’wana ni yin’wana yi gimeta hi bokisi leri pfunaka ku dyondzisa leri kandziyisaka misinya ya milawu leyi swirho swa ndyangu swi faneleke swi yi tsundzuka. Yo tala ya mabokisi lawa ya sungula hi xivutiso lexi nge, “Xana misinya leyi ya milawu ya Bibele yi nga wu pfuna njhani . . . ?” Leswi swi yisa nyingiso eka mianakanyo ya Xikwembu leswaku hi ta kuma leswi xi swi ehleketaka emhakeni leyi ku buriwaka ha yona.—Esa. 48:17.

⁴ Tolovelana ni buku leyi. Dyondza ku kuma misinya ya milawu leyi nga ku pfunaka loko ku va ni swiphiqo swo hambana-hambana. Buku leyi yi hlamusela timhaka to tanihi leti nge: leswi munhu a nga langutaka swona loko a ehleketisisa hi munghana wa vukati (ndzima 2), swilotlelo swa nkoka leswi yisaka entsakweni lowu khomelelaka wa vukati (ndzima 3), ndlela leyi vatswari va nga kurisaka vana va vona ha yona leswaku va va ni vutihlamuleri, va va vanhu lavakulu lava chavaka Xikwembu (ndzima 6), ndlela yo sirhelela ndyangu eka minkucetelo leyi onhaka (ndzima 8), misinya ya milawu yo pfuna mindyangu ya mutswari un’we leswaku yi humelela (ndzima 9), mpfuno wa moya eka mindyangu leyi karhatiwaka hi vundzendzele ni madzolonga (ndzima 12), leswi nga endliwaka loko swiboho swa vukati swi ri ekusuhi ni ku tsemeka (ndzima 13), leswi nga endliwaka leswaku ku xiximiwa vatswari lava dyuhaleke (ndzima 15), ni ndlela yo kumela ndyangu wa wena vumundzuku lebyi khomelelaka (ndzima 16).

⁵ Yi Tirhiseni Swinene Buku Leyintshwa: Loko mi nga si swi endla, ha yini mi nga sunguli ku dyondza buku leyi nge Ntsako eNdyangwini kun’we tanihi ndyangu? Nakambe, loko ndyangu wa n’wina wu langutane ni swiphiqo leswintshwa kumbe mintlhontlho, pfuxetani tindzima ta buku leyi leti vulavulaka hi swilo leswi, naswona hi xikhongelo mi anakanyisisa hi ndlela yo tirhisa ndzayo ya kona. Ku engetela kwalaho, hi March, tinyiketele hi mbilu hinkwayo loko u hlela nkarhi wa ntirho wa nsimu, leswaku u ta tikarhatela ku fambisa buku leyi nge Xihundla Xa Ntsako eNdyangwini eka vanhu vo tala hilaha swi nga kotekaka hakona.

⁶ Mindyangu leyi endlaka ku tinyiketela eka Xikwembu swi va mukhuva yi ta tiyisiwa emoyeni naswona yi ta va ni vun’we kutani yi ta tilulamisela ku langutana ni minhlaselo ya Sathana. (1 Tim. 4:7, 8; 1 Pet. 5:8, 9) Mawaku ndlela leyi hi nkhensaka ha yona leswi hi nga ni ndzetelo lowu humaka eka Xikwembu Musunguri wa ndyangu!