Bokisi Ra Swivutiso

◼ Loko vandlha ri komberiwa ku ya pfuna hi malunghiselelo ya xilahlo, swivutiso leswi landzelaka swi nga ha tlakuka:

I mani la faneleke a nyikela nkulumo ya xilahlo? Lexi i xiboho lexi faneleke ku endliwa hi swirho swa ndyangu. Swi nga ha hlawula makwerhu wa xinuna wihi na wihi la khuvuriweke la nga exiyin’weni lexinene. Loko huvo ya vakulu yi komberiwa ku avela xivulavuri, hi ntolovelo yi ta hlawula nkulu la nga ni vuswikoti leswaku a nyikela nkulumo ya Sosayiti. Hambileswi hi nga ta ka hi nga hundzeleti loko hi vulavula hi mufi, swi nga ha va swi fanerile ku vulavula hi timfanelo letinene leti a ti kombiseke.

Nkulumo ya xilahlo yi nga ha pfuriwa ni ku pfariwa hi risimu ni xikhongelo. Nkulumo leyi a yi endleriwanga ku hlasela tidyondzo ta vukhongeri bya mavunwa kambe i ya ku chavelela lava feriweke ni ku dzunisa Yehovha tanihi Xikwembu xa rirhandzu ni musa. Makwerhu a nga fanelanga a pfumelela munhu wa misava ku hlanganyela na yena enongonokweni tanihi leswi ku endla tano swi nga ta pfanganyisa vupfumeri.

Xana ku fanele ku tirhisiwa Holo ya Mfumo? Yi nga tirhisiwa loko mi nyikiwe mpfumelelo hi huvo ya vakulu naswona loko swi ta ka swi nga kavanyetani ni minhlangano ya nkarhi na nkarhi leyi hleriweke. Holo yi nga ha tirhisiwa loko mufi a ve ni ndhuma leyinene naswona a ve xirho xa vandlha kumbe n’wana lontsongo wa xirho xa vandlha. Loko munhu a ve ni ndhuma yo biha evanhwini hikwalaho ka mahanyelo lama nga riki ya Vukreste, kumbe loko ku va ni swiyimo swin’wana leswi nga ha tisaka xisandzu evandlheni, vakulu va nga ha endla xiboho xa ku nga tirhisiwi ka holo.—Vona buku leyi nge Vutirheli Bya Hina, matluka 62-3.

Hi ntolovelo, Tiholo ta Mfumo a ti tirhiseriwi ku fambisa swilahlo swa lava nga riki vapfumeri. Ti nga ha tirhisiwa ntsena loko swirho swa ndyangu wakwe leswi hanyaka swi ri vahuweleri lava khuvuriweke lava hlanganyelaka ni vandlha hi ku hiseka, loko mufi a tiviwa hi vo tala evandlheni naswona a tiviwa a ri ni langutelo lerinene ehenhleni ka ntiyiso ni ndhuma leyinene ehenhleni ka mahanyelo lamanene etikweni, ni loko ku ta ka ku nga tirhisiwi mikhuva ya misava eka nongonoko wa kona.

Loko va pfumela ku tirhisiwa ka Holo ya Mfumo, vakulu va ta languta loko ku ri ntolovelo leswaku bokisi ri va kona enkosini. Loko wu ri ntolovelo, va nga ha nyika mpfumelelo wa leswaku ri nghenisiwa eholweni.

Ku vuriwa yini hi swilahlo swa vanhu va misava? Loko mufi a ve ni ndhuma leyinene etikweni, makwerhu wa xinuna a nga ha nyikela nkulumo leyi chavelelaka ya Bibele emutini lowu nkosi wu nga eka wona kumbe emasirheni. Vandlha ri ta ala ku fambisa xilahlo xa munhu loyi a a tiveka hi ku tikhoma loko biha, wa mahanyelo lama sandziwaka kumbe loyi vutomi byakwe a byi lwisana swinene ni misinya ya milawu ya Bibele. Makwerhu wa xinuna a nge hlanganyeli ni mufundhisi eku fambiseni ka ntirho wo hlanganisa vupfumeri kumbe eka xilahlo xihi na xihi lexi fambisiwaka ekerekeni ya Babilona Lonkulu.

Ku vuriwa yini hiloko ku ri leswaku mufi a a susiwile eku hlanganyeleni? Hi ntolovelo vandlha a ri nge katseki. Holo ya Mfumo a yi nge tirhisiwi. Loko munhu a nyikele vumbhoni bya ku hundzuka ni loko a kombise ku navela kakwe ka ku vuyiseriwa eku hlanganyeleni, ripfalo ra makwerhu ri ta n’wi pfumelela ku nyikela nkulumo ya Bibele emutini lowu ku nga ni nkosi eka wona kumbe emasirheni, a nyikela vumbhoni eka lava va nga riki vapfumeri ni ku chavelela maxaka. Hambiswiritano, a nga si endla xiboho lexi, ku ta va ku ri vutlhari leswaku makwerhu a tihlanganisa ni huvo ya vakulu leswaku va ta n’wi byela leswi va swi bumabumelaka. Eswiyin’weni leswi swi nga ta va swi nga kombisi vutlhari leswaku makwerhu yoloye wa xinuna a nghenelela, swi nga ha va swinene leswaku makwerhu wa xinuna la nga xirho xa ndyangu wa mufi a nyikela nkulumo yo chavelela maxaka.

Nkongomiso wun’wana wu nga kumiwa eka minkandziyiso ya Xihondzo xo Rindza xa October 15, 1990, matluka 30-1; March 1, 1982, tluka 18, The Watchtower ya March 15, 1980, matluka 5-7; June 1, 1978, matluka 5-8; Xihondzo xo Rindza xa December 1, 1977, matluka 272-4; The Watchtower ya March 15, 1970, matluka 191-2; ni Awake! ya September 8, 1990, matluka 22-3, na March 22, 1977, matluka 12-15. Nakambe vona Vutirheli Bya Hina Bya Mfumo bya April 1987, tluka 4.