Xana U Mbhoni Ya Nkarhi Hinkwawo?

¹ Xana u nga hlamula xivutiso lexi u ku, ina? Hambileswi malandza hinkwawo ya Yehovha lama tinyiketeleke ma nga nghenelangiki vutirheli bya nkarhi hinkwawo, xana a hi mhaka leyi faneleke ku langutela leswaku hinkwerhu ka hina hi titeka hi ri Timbhoni ta nkarhi hinkwawo? Kunene swa hi fanela.

² Ku hava Mukreste la vuriwaka wa nkarhinyana. Malunghana ni Tata wa yena, Yesu u te: “Masiku hinkwawo ndzi endla leswi swi n’wi tsakisaka.” (Yoh. 8:29) Pawulo, la titweke hi ndlela leyi fanaka, u hi khutaza leswaku hi “endl[a] hinkwaswo ku dzunisa Xikwembu.” (1 Kor. 10:31) Hikwalaho, hinkwerhu ka hina hi fanele hi titeka hi ri Timbhoni ta Yehovha ta nkarhi hinkwawo. Loko hi titeka hi ndlela leyi swi ta hi susumetela ku endla ntirho wun’wana ni wun’wana hi ndlela leyinene.

³ Anakanya Hi Vumbhoni Lebyi: Ku languteka, ku vulavula ni mahanyelo ya hina swi nga kombisa vanhu van’wana leswaku hakunene hi Timbhoni ta Yehovha. Hi fanele hi tikarhatela ku languteka hi ndlela leyi xiximekaka, hi va ni mavulavulelo kun’we ni ku tikhoma lokunene nkarhi hinkwawo loko hi ri entirhweni wa nsimu kumbe loko hi ri eminhlanganweni ya Vukreste. Nakambe, hambiloko hi ya exikolweni, entirhweni wa ku tihanyisa, kumbe eku tihungaseni, swilo hinkwaswo leswi hi swi endlaka swi fanele swi nyikela vumbhoni bya leswaku hi hanya hi ku landza mimpimanyeto ya Yehovha leyo lulama.

⁴ Yesu u te: “Muti lowu akiweke entshaveni a wu tumbeli. . . . Ku vonakala ka n’wina a ku voningele vanhu hi mukhuva wolowo, leswaku va ta vona mintirho ya n’wina leyo saseka, va dzunisa Tata wa n’wina la nge matilweni.” (Mt. 5:14-16) Leswi swi fanele swi va tano eka swilo hinkwaswo leswi hi swi endlaka minkarhi hinkwayo. Loko hi tikuma hi kanakana ku nyikela vumbhoni laha hi nga kona kumbe hikwalaho ka leswi hi nga eku swi endleni, hi fanele hi tivutisa xivutiso lexi nge, ‘Xana ndzi tirhela Yehovha nkarhinyana kumbe nkarhi hinkwawo?’ Hi nga tshuki hi hundziwa hi nkarhi wo vulavula ni van’wana hi mahungu lamanene ya Mfumo wa Xikwembu.

⁵ Tsundzuka, hi fundzha ni ku tsakisa Yehovha loko hi kota ku hlamula xivutiso lexi nge, “Xana u Mbhoni ya nkarhi hinkwawo?” hi “Ina!” la twakalaka.