Ku Endla Hi Matimba Hi Vula Evangeli

“Endla hi matimba ku vonaka u ri la nkhensekaka emahlweni ka Xikwembu, mutirhi loyi a nga fanelangiki hi ku khomiwa hi tingana.”—2 TIMOTIYA 2:15.

1, 2. I ku kula kwihi eswivandleni swa vatirheli va nkarhi hinkwawo loku u ku xiyeke? I yini lexi ku vangeke?

“MALEMBE ma nga ri mangani lama hundzeke, vo tala va hina hi anakanye leswaku hi lava va nga ni swiyimo leswi hlawulekeke ntsena lava va nga phayonaka,” ku tsala phayona, kumbe mutirheli wa nkarhi hinkwawo, eJapani. “Swi vonaka onge a hi hoxisile. Hi dyondza leswaku hi lava va nga ni swiyimo leswi hlawulekeke ntsena lava hlulekaka ku phayona.”

² Langutelo rero ri kongomeke ri vange kun’wana ka ku kula loku xiyekaka eswivandleni swa vatirheli va nkarhi hinkwawo exikarhi ka Timbhoni ta Yehova emalembeni ya sweswinyana. Namuntlha eJapani, vambirhi eka vahuweleri van’wana ni van’wana va ntlhanu va Mfumo va hlanganyela eka xivumbeko xo karhi evutirhelini bya nkarhi hinkwawo. Kambe moya lowu wo chivirika a wu le Japani ntsena. Eka lembe ra ntirho leri nga hundza, nhlayo ya vahuweleri emisaveni hinkwayo yi kule hi 5 wa tiphesente, kasi nhlayo ya vatirheli va nkarhi hinkwawo yi andze hi 22 wa tiphesente. Entiyisweni, vanhu va Yehova va nghenise marito ya muapostola Pawulo etimbilwini: “Endla hi matimba ku vonaka u ri la nkhensekaka emahlweni ka Xikwembu, mutirhi loyi a nga fanelangiki ku khomiwa hi tingana.” (2 Timotiya 2:15) Xana lowu i ntiyiso ha wena?

“Ku Rhandza Xikwembu Swi Vula Leswi”

3. Matimba lama susumetaka ku kula loku hi wahi?

³ Loko maphayona ya vutisiwa leswaku ha yini ya teke vutirheli bya nkarhi hinkwawo, nhlamulo ya vona leyi nga hundzukiki hi leswaku i mhaka ya rirhandzu ra vona eka Yehova Xikwembu. (Matewu 22:37, 38) Kavula, leswi hi swona leswi swi faneleke ku va swona, hikuva handle ka rirhandzu tanihi nsusumeto lowu faneleke, mpimo wihi na wihi wa matshalatshala a wu ta va wa hava. (1 Vakorinto 13:1-3) Hakunene swa bumabumeleka leswi vo tala va Vakriste-kulorhi—entiyisweni, avhareji ya vahuweleri lava tlulaka nkombo eka bandlha rin’wana ni rin’wana emisaveni hinkwayo—va pfuleke xivandla xo kombisa rirhandzu ra vona eka Xikwembu hi ndlela leyi evuton’wini bya vona.

4. I yini lexi endleke leswaku hi rhandza Xikwembu? (Varhoma 5:8)

⁴ Phela, hinkwerhu ka hina lava hi nyikeleke vutomi byerhu eka Yehova hi endle tano hikwalaho ka leswi hi n’wi rhandzaka. Loko hi dyondze hi ta rirhandzu leri Yehova ni N’wana wakwe, Yesu Kriste, va nga na rona eka hina, ni mikateko leyi hlamarisaka leyi Mfumo wakwe wu nga ta yi tisa, timbilu terhu ti susumeteriwa ku swi amukela hi rirhandzu eka yena. Leyi i ndlela leyi muapostola Yohane a swi vekaka ha yona: “Hina hi ni rirhandzu hikuva ku rhangile Xikwembu xi hi rhandza.” (1 Yohane 4:19) Hi amukela hi ntumbuluko hi ndlela yoleyo hikuva yoleyo i ndlela leyi hi endliweke ha yona. Kambe xana ntlhaveko wolowo wo kufumela lowu nga etimbilwini ta hina hi swona hinkwaswo leswi rirhandzu ra Xikwembu ri katsaka swona?

5. Rirhandzu ra Xikwembu ri katsa yini? (1 Yohane 2:5)

⁵ Doo, rirhandzu ra Xikwembu ri vula leswi engetelekeke. Muapostola Yohane wa hi byela: “Hikuva ku rhandza Xikwembu swi vula leswi: Hi leswaku hi fanele ku hlayisa milawu ya xona; naswona, milawu ya xona a yi tiki.” (1 Yohane 5:3) Ina, rirhandzu ra ntiyiso, ku fana ni ripfumelo ra ntiyiso, ri phofuriwa hi xiendlo. (Ringanisa 2 Vakorinto 8:24.) Ri lava ku tsakisa ni ku kuma ku amukeriwa hi loyi a rhandziwaka. Mayana ndlela leyinene leyi lava va nga eka vutirheli bya nkarhi hinkwawo va yi hlawuleke yo kombisa rirhandzu ra vona eka Yehova na Yesu Kriste!

6. (a) I vanhu va njhani lava swi koteke ku phayona? I yini lexi endleke leswaku va swi kota ku endla tano? (b) Xana u tiva swikombiso swin’wana swo tano?

⁶ Swiyimo swa munhu hi xiyexe swa hambana, naswona swi fanele ku khathaleriwa. Hambi swi ri tano, loko hi languta lava va nga eka vutirheli bya nkarhi hinkwawo, hi kuma leswaku va katsa vanhu lava nga eka xiyimo xin’wana ni xin’wana lexi kotekaka—lavantsongo ni lavakulu, lava nga tekangiki ni lava tekeke, lava nga ni rihanyo lerinene ni leri nga nyawuriki, lava nga ni vutihlamuleri bya ndyangu ni lava va nga hava, ni swin’wana. Ku hambana hi leswaku, ematshan’wini yo pfumelela timhaka leti ti va swihinga, vona, ku fana na muapostola Pawulo, va dyondze ku tirha exikarhi ka tona kumbe ku hanya ha tona. (2 Vakorinto 11:29, 30; 12:7) Hi xikombiso, xiya ndyangu wo fanekisela.

Eiji i nkulu ebandlheni ra ka vona. Yena ni nsati wakwe a va ri karhi va phayona kun’we hi malembe ya 12 va ri karhi va kurisa vana vanharhu. Va swi endlise ku yini? “A hi fanele ku hanya hi ku olova swinene,” ku vula Eiji. Hambi va ri vana va boheke ku dyondza ku amukela doo eka swo tala swa swilo leswi a va swi lava. “Hambi leswi hi veke ni minkarhi yo nonon’hwa, Yehova minkarhi hinkwayo u hi nyike leswi a hi swi lava.”

Xana ku tinyiketela ku ve loku fanelaka? Eiji u ri: “Vusiku byin’wana ni byin’wana loko hi nga si tima timboni, ndzi languta nsati wa mina a tsala xiviko xakwe xo chumayela xa siku. Loko ndzi vona ndyangu wa mina wu rhangisa timhaka ta moya hi ndlela leyi, ndza swi vona leswaku xin’wana na xin’wana xi hi laha xi faneleke ku va ha kona, naswona ndzi ni langutelo ra ntirho. A ndzi swi anakanyi hi nga phayoni swin’we.” Nsati wakwe u titwisa ku yini ha swona? U ri: “Eiji u hi khathalele khwatsi swinene. Loko ndzi n’wi vona a khomekile etimhakeni ta moya, ndzi titwa ndzi ri na ku aneriseka lokukulu. Ndza tshemba leswaku hi nga ya emahlweni.”

Leswi tatana na manana va hetaka nkarhi wo tala entirhweni wo chumayela siku rin’wana ni rin’wana, i vuyelo byihi lebyi byi veke kona eka vana? Jaha lera mativula sweswi ri tirha eka muako wa mune wa malembe erhavini ra Sosayiti ya Watch Tower. Loyi wanhwanyana i phayona ra nkarhi hinkwawo, naswona mufana lowa malembe ya xikolo u kunguhata ku va phayona leri hlawulekeke. Hinkwavo va tsakile leswi vatswari va vona va nga maphayona.

7. (a) Nyika swikombiso mayelana ni vanhu lava hluleke swihinga leswaku va nghenela ntirho wa nkarhi hinkwawo. (b) I ndzayo yihi ya Bibele leyi va yi ngheniseke etimbilwini?

⁷ Mindyangu yo fana ni lowu yi nga kumiwa exikarhi ka Timbhoni ta Yehova ematikweni yo tala emisaveni hinkwayo. Va endla matshalatshala ya xiviri yo endla leswi antswaka hi swiyimo swa vona leswaku va nghena ivi endzhaku va tshama entirhweni wa nkarhi hinkwawo. Hi swiendlo swa vona, va kombisa leswi rirhandzu ra Xikwembu ri vulaka swona hakunene eka vona. Hi tinghitsi, va khathalela xitsundzuxo xa Pawulo lexi nge: “Endla hi matimba ku vonaka u ri la nkhensekaka emahlweni ka Xikwembu, mutirhi loyi a nga fanelangiki hi ku khomiwa hi tingana.”—2 Timotiya 2:15.

“Mutirhi Loyi A Nga Fanelangiki Hi Ku Khomiwa Hi Tingana”

8. Hikwalaho ka yini Pawulo a khutaze Timotiya ku ‘endla hi matimba yakwe’ naswona sweswo swi vula yini?

⁸ Loko Pawulo a tsalele Timotiya marito wolawo, hi 65 C.E., Timotiya ana se a a tirha eka xikhundla xa vutihlamuleri ebandlheni ra Vukriste. Pawulo u n’wi vitane “nhenha leyinene ya Kriste Yesu” naswona hi ku phindha-phindha u n’wi tsundzuxe vutihlamuleri byakwe eku dyondziseni ni ku letela van’wana. (2 Timotiya 2:3, 14, 25; 4:2) Kambe ke, u khutaze Timotiya a ku: “Endla hi matimba ku vonaka u ri la nkhensekaka emahlweni ka Xikwembu.” Xiga lexi nge “endla hi matimba” xi hundzuluxeriwe xi huma eka rito ra Xigriki leri vulaka ku “tihatlisisa.” (Vona Kingdom Interlinear Translation.) Hi marito man’wana, Pawulo a a byela Timotiya leswaku ku endlela ku amukeriwa hi Xikwembu a a fanele ku chivirikisa ntirho wakwe, hambi leswi ana se a a rhwala ndzhwalo wo tika wa vutihlamuleri. Ha yini? Leswaku a ta va “mutirhi loyi a nga fanelangiki hi ku khomiwa hi tingana.”

9. I xifaniso xihi xa Yesu lexi nga hi pfunaka ku twisisa marito ya Pawulo ehenhleni ka “mutirhi loyi a nga fanelangiki hi ku khomiwa hi tingana”?

⁹ Xiga lexi xo hetelela xi hi tsundzuxa malandza manharhu exifanisweni xa Yesu xa titalenta, hi laha xi rhekhodiweke ha kona eka Matewu 25:14-30. Loko n’wini a vuya, a ku ri nkarhi eka wona wo tisa ntirho wa wona eka n’wini leswaku a wu amukela. Malandza lama nyikiweke titalenta timbirhi na ntlhanu ya bumabumeriwile hi n’wini hikwalaho ka leswi ya swi endleke hi swilo leswi ya byarhisiweke swona. Ya rhamberiwe ku ‘nghena eku tsakeni ka n’wini wa wona.’ Kambe nandza la byarhisiweke talenta yin’we u kumeke a ha lava. Leswi a a ri na swona swi tekiwile, naswona lexi n’wi khomiseke gome, u cukumetiwe “ehandle emunyameni.”

10. Ha yini nandza loyi a nyikiweke talenta yin’we a khomiwe hi gome ni ku xupuriwa?

¹⁰ Malandza mambirhi yo sungula ya tirhe hi matimba ivi ya andzisa mimbuyelo ya n’wini wa wona. Hakunene a va ri vatirhi ‘lava nga fanelangiki ku khomiwa hi tingana.’ Kambe hikwalaho ka yini nandza wa vunharhu a khomiwe hi gome ni ku xupuriwa hambi leswi a nga lahlekeriwangiki hi leswi a nyikiweke swona? A ku ri hikwalaho ka leswi a nga endlangiki nchumu lowu pfunaka ha swona. Hi laha n’wini a kombiseke ha kona, ingi a hoxe mali ebanki. Kambe xisekelo lexi a xi hoxile a ku ri leswaku a a ri hava rirhandzu ra xiviri eka n’wini wa yena. U byele n’wini wa yena a ku: “Ndzi chavile, kutani ndzi yile ndzi ya yimbela talenta ya wena emisaveni.” (Matewu 25:25; ringanisa 1 Yohane 4:18.) U langute n’wini wakwe tanihi “munhu wa ku nonon’hwa,” wa tihanyi naswona xiavelo xakwe tanihi ndzhwalo. U endle leswi a nga swi kotaka leswaku a tirhula ndzhwalo ematshan’wini yo endla “hi matimba” yakwe leswaku a kuma ku amukeriwa hi n’wini wakwe.

11. Xifaniso xexo xi hi khumbisa ku yini hina namuntlha?

¹¹ Namuntlha xifaniso xexo xa karhi xa hetiseka. N’wini, Yesu Kriste, u vuyile naswona u kambela ntirho wa ntlawa wa “nandza” wakwe, kun’we ni lowuya wa vanghana va wona, “ntshungu lowukulu” wa vanhu lava fanaka ni tinyimpfu. (Matewu 24:45-47; Nhlavutelo 7:9, 15) N’wini u kuma yini? Loko hi tianerisa hi ntirho wa nomu leswaku hi tirhula ndzhwalo, kona swi nga endleka leswaku hi ta kumeka exikarhi ka lava khomiweke hi tingana ni lava cukumeteriweke “ehandle emunyameni.” Hi tlhelo rin’wana, loko hi ‘endla hi matimba,’ hi leswaku, ‘hi hatlisisa’ ntirho wa hina ku pfumelelana ni xihatla xa nkarhi, hi ta kumeka hi amukeleka tanihi ‘vatirhi lava nga fanelangiki ku khomiwa hi tingana’ naswona hi ta hlanganyela ‘entsakweni wa n’wini wa hina.’

Ndzayo Ni Ku Tinyiketela Swa Laveka

12. I timhaka tihi leti pfuneke phesente leyikulu ya vahuweleri eJapani ku nghenela vutirheli bya nkarhi hinkwawo?

¹² Ku andza loku hambetaka ka swivandla swa maphayona ematikweni hinkwawo emisaveni hinkwayo i vumbhoni lebyinene bya leswaku vanhu va Yehova hinkwavo va ‘endla hi matimba ya vona’ leswaku va tikomba va ri ‘vatirhi lava nga fanelangiki hi ku khomiwa hi tingana.’ Kambe xana u tshame u anakanya hi mhaka leyi ha yona ematikweni man’wana phesente ya vamakwerhu leyi swi kotaka ku nghenela ntirho wa nkarhi hinkwawo yi nga leyikulu ku tlula man’wana? Xivutiso lexi xo tsakisa xi vutisiwe van’wana va maphayona eJapani. Xiya tinhlamulo leti:

“A ndzi voni leswaku swi vula leswaku ripfumelo, kumbe rirhandzu ra Timbhoni ta Majapani ri tlula leriya ra vamakwavo ematikweni man’wana,” ku vule mutirhi wa le Bethele loyi a veke entirhweni wa nkarhi hinkwawo 30 wa malembe. “Kambe ndzi pfumela leswaku vumunhu bya Majapani kumbexana hi byona byi pfunaka eka leswi. Hinkwavo, vanhu va Japani va yingisa; va amukela xikhutazo handle ko ba mariri.”

“Hi mhaka ya leswi ku nga ni maphayona yo tala eka bandlha leri lavaka ku va rin’wana ni rin’wana,” ku hlamusela nkulu, “mianakanyo leyi tolovelekeke hi leswaku un’wana ni un’wana a nga swi endla.” Vanhu va Japani va swi lava ku endla swilo hi mintlawa. Va ni moya lowunene wa ntlawa.

Leswi i switsundzuxo leswi nyanyulaka hakunene, naswona loko hi tiyimiserile ehenhleni ko antswisa ntirho werhu eka Yehova, ku na tinhla-nkulu to hlayanyana leti faneleke ku khathaleriwa hi hina hi rixaladza.

13. Hi nga pfunekisa ku yini emhakeni ya ku va la yingisaka ni ku tiyimisela ku amukela xikhutazo?

¹³ Xo sungula, ku ni mhaka ya ku va la yingisaka ni ku tiyimisela ku amukela xikhutazo. Loko vukongomisi na xikhutazo swi huma eka xihlovo lexi faneleke, swa fanela leswaku hi xi amukela handle ko kanakana. Xisweswo, ematshan’wini yo languta timfanelo leti tanihi vutshila bya tiko ntsena, hi tsundzuka marito ya Yesu lama nge: “Tinyimpfu ta mina ti yingisa rito ra mina; ndza ti tiva, kutani ta ndzi landza.” (Yohane 10:27) Nakambe hi tsundzuka leswaku mhaka yin’wana hi “vutlhari byo ta hi le henhla” byi “ni ku yingisela.” (Yakobo 3:17) Leti i timfanelo leti Vakriste hinkwavo va khutaziwaka ku ti ambala. Hikwalaho ka matshamelo ni ku kurisiwa, van’wana va nga ha tinyiketela mianakanyo yo tilawula ni ku tirhandza ku tlula van’wana. Kumbexana lexi i xivandla lexi hi faneleke ku titshinya eka xona kutani ‘hi lulamisa mianakanyo yerhu’ leswaku hi ta phikelela swinene leswi “ku rhandza ka Xikwembu” ku nga swona.—Varhoma 12:2.

14. I xirhambo xihi lexi Vakriste hinkwavo lava tinyiketeke va xi amukeleke naswona i yini lexi katsekaka?

¹⁴ Tanihi Vakriste lava tinyiketeleke, hi amukele xirhambo xa Yesu lexi nge: “Loko munhu a lava ku ndzi landza, a a titshike, a tirhwexa xihambano xa yena, kutani a ndzi landza.” (Matewu 16:24) Ku “titshika” ka munhu hi ku kongoma swi vula ‘ku tilandzula ka munhu hi laha ku heleleke’ kutani endzhaku a amukela ku va wa Yehova Xikwembu na Yesu Kriste hi ku swi rhandza, hi va pfumelela leswaku va lawula vutomi bya hina ni ku hi byela leswi hi faneleke ku swi endla ni leswi hi nga fanelangiki ku swi endla. Hi yihi ndlela leyi antswaka leyi nga kona yo kombisa leswaku hi titshikile ku tlula ku landzela minkondzo ya Yesu evutirhelini bya nkarhi hinkwawo?

15. (a) Ku va la anerisekaka hi leswintsongo enyameni ku yelanisa ku yini ni ku landzela Yesu? (b) Vadyondzisiwa vo sungula va amukele xirhambo xa Yesu xo n’wi landzela hi ndlela yihi?

¹⁵ Manuku ku ni mhaka ya ku aneriseka hi ku va ni leswintsongo enyameni. Leswi hakunene swi hambana ni mboyamelo lowu tolovelekeke wa misava, lowu kurisaka “ku navela ka miri, ni ku navela ka mahlo, ni ku tikurisa hi swa vutomi lebyi.” (1 Yohane 2:16) Kambe hi ntwelo-vusiwana Yesu u te: “Kutani ke un’wana ni un’wana exikarhi ka n’wina la nga tshikiki leswi a nga na swona, a nga ka a nga koti ku va mudyondzisiwa wa mina.” (Luka 14:33) Hikwalaho ka yini leswi swi ri hi ndlela leyi? Hikuva ku va mudyondzisiwa wa Yesu swi vula leswi tlulaka ku va mupfumeri ntsena. Loko Yesu a vitane Andriya, Petro, Yakobo, Yohane ni van’wana leswaku va va vadyondzisiwa vakwe eka lembe ra vumbirhi ra vutirheli byakwe, a nga va kombelanga leswaku va pfumela eka yena tanihi Mesiya ntsena. Endzhaku u va rhambele ku n’wi landzela ni ku endla ntirho lowu a a wu endla, hi leswaku, ntirho wo chumayela wa nkarhi hinkwawo. Va swi amukerise ku yini? “Kutani hi nomu lowu va tshika tinkoka ta vona va n’wi landza.” Yakobo na Yohane va “siya tata wa vona Zebediya ebyatsweni swin’we ni vatirhi, va n’wi landza.” (Marka 1:16-20) Va tshike bindzu ra vona ni khale ka vanghana va vona kutani va teka ku chumayela nkarhi hinkwawo.

16. Tanihi Vakriste lava tinyiketeleke, hi fanele ku heta nkarhi ni matimba ya hina eka yini? (Swivuriso 3:9)

¹⁶ Hikwalaho ke, swa olova ku vona mhaka leyi ku aneriseka hi leswintsongo ku nga mhaka yo tano ya ntikelo ha yona eku endleni ka hina hi matimba entirhweni wa Yehova. Loko hi tshikileriwile hi swilo swa nyama kumbe mindzhwalo, hi nga ha fana ni mufumi lontshwa la fumeke loyi a aleke xirhambo xa Yesu xo va mulandzeri wa yena, hayi hi mhaka ya leswi a a nga ta swi kota ku xi endla, kambe hikuva a a nga swi rhandzi ku siya ‘rifuwo ra yena lerikulu.’ (Matewu 19:16-22; Luka 18:18-23) Kutani ematshan’wini yo heta nkarhi ni matimba ya hina hi phikelela swilo leswi nga ta ‘hundza’ ku nga ri khale, hi lava ku tirhisela swilo leswi swa nkoka eka ku tshamiseka ka hina loku nga heriki.—1 Yohane 2:16, 17.

17. Moya wa ntlawa wu nga va nkucetelo lowunene ku fikela kwihi?

¹⁷ Eku heteleleni, ku ni mhaka ya moya wa ntlawa. Andriya, Petro, Yakobo na Yohane handle ko kanakana va kucetelanile eka kungu ra vona ro amukela xirhambo xa Yesu xo n’wi landzela. (Yohane 1:40, 41) Hi ku fanana, mhaka ya leswaku vo tala va vamakwerhu va swi kota ku pfula xivandla evuton’wini bya vona lebyi nga bizi leswaku va nghenela ntirho wa nkarhi hinkwawo yi fanele ku hi susumetela ku xiyisisa mhaka ya hina vini hi matimba. Hi tlhelo rin’wana, lava nga exikarhi ka hina lava ana se va tiphinaka hi lunghelo leri va nga avelana mintokoto ya vona leyi tsakisaka ni van’wana, xisweswo va va khutaza leswaku na vona va tihlanganisa ni swivandla swa vona. Kavula, vatirheli va nkarhi hinkwawo va nga pfunana leswaku va pfuna hinkwavo swinene.—Varhoma 1:12.

18. Hinkwerhu ka hina hi nga seketela moya wa vuphayona hi ndlela yihi?

¹⁸ Hambi va ri lava swiyimo swa vona swa sweswi swi nga va pfumeleriki ku teka vutirheli bya nkarhi hinkwawo va nga endla swo tala ku engetela moya wa vuphayona. Njhani? Hi ku seketela ni ku khutaza lava phayonaka, hi ku kombisa ku tsakela loku chivirikaka eka lava va nga swi kotaka ku endla tano, hi ku lunghiselela xirho xin’we xa ndyangu wa vona leswaku xi va phayona, hi ku nghenela ntirho wa vuphayona bya nkarhinyana rini na rini loko swi koteka, na hi ku tirhela ku nghenela ntirho wa nkarhi hinkwawo hi ku hatlisa loko swi koteka. Hi ku endla tano, hinkwerhu ka hina hi nga kombisa leswaku hi ‘endla hi matimba ya hina’ ku tirhela Yehova hambi loko eka nkarhi wa sweswi hi tsarisile evutirhelini bya nkarhi hinkwawo kumbe hi nga tsarisanga.

A Hi Tikarhateleni Ku Endla Hi Matimba

19. Hi fanele ku tiyimisela ku endla yini hikwalaho ka nkarhi?

¹⁹ Hakunene, tanihi leswi Yehova a hatlisisaka ntirho, sweswi i nkarhi eka hina wo ‘endla hi matimba’ leswaku hi va ‘vatirhi lava nga fanelangiki hi ku khomiwa hi tingana.’ Tanihi tinhenha letinene ta Yesu Kriste, na hina hi fanele ku bakanyela mindzhwalo hinkwayo leyi nga pfuneki nchumu etlhelo leswaku hi tirha hi laha ku humelelaka ni ku amukela ku amukeriwa hi yena. (2 Timotiya 2:3-5) Loko hi ri karhi hi tirha hi matimba ku andzisa ku hlanganyela ka hina entirhweni wa Mfumo, hi nga tiyiseka leswaku matshalatshala yerhu ya ta hakeriwa hi laha ku fuweke. (Vaheveru 6:10; 2 Vakorinto 9:6) Xisweswo, ematshan’wini yo yima etlhelo, hi ku kongoma, a hi tikarhateleni ku endla hi matimba leswaku hi chumayela mahungu lamanene, ku hlamula xirhambo xa mupisalema lexi nge: “Tirelani Yehova hi ku ṭaka, mi ta e mahlweni ka yena hi ku ṭaka lo’kukulu!”—Psalma 100:2.

Bokisi Ra Mpfuxeto

◻ Rirhandzu ra Xikwembu ri katsa yini?

◻ Xirhalanganya xa xiviri hi nandza wa vunharhu exifanisweni xa Yesu xa titalenta a ku ri xihi?

◻ Ku titshika ka hina swi vula yini?

◻ Hikwalaho ka yini valandzeri va Yesu ‘va tshika rifuwo ra vona’?

◻ Hinkwerhu ka hina hi nga seketela moya wa vuphayona hi ndlela yihi?

[Xifaniso lexi nga eka tluka 18]

‘Cukumetelani nandza la nga pfuniki nchumu ehandle’