Xana Wa Tikarhata?

“NDZI ta endla leswi ndzi nga swi kotaka.” Xana i minkarhi yingani laha marito lawa ya landzeriwaka hi “kambe” ivi ku landzela nongonoko wo leha wa ku kombela ku rivaleriwa hikwalaho ko tsandzeka ku endla leswi u nga swi kotaka! Ku vuriwa yini hi ku tinyiketela ka hina eka Yehovha? Xana ha xi hetisisa xitshembiso xa hina xa ku endla leswi hi nga swi kotaka eka yena?

Ku tinyiketela swi vula ‘ku tinyiketela hi ku hlawuleka ku endla ntirho kumbe ku gandzela Xikwembu kumbe ku endla mintirho leyo kwetsima.’ Yesu u endle leswi a nga swi kotaka ku kombisa leswaku ku tinyiketela eka Yehovha swi katsa yini, hi ku vula leswi: “Loko munhu a lava ku ndzi landza, a a titshike, a tirhwexa [mhandzi ya yena ya nxaniso, NW], kutani a ndzi landza.” (Matewu 16:24) Loyi a nga titshika ivi a tinyiketela eka Xikwembu u teka ku endla ku rhandza ka Xikwembu ku ri nchumu wa nkoka swinene eka leswi a swi rhangisaka evuton’wini.

Tanihi vanhu lava tinyiketeleke, hi fanele hi tikambisisa hi ta vona leswaku xana hi hanya hi laha hi tinyiketeleke ha kona. Petro u kombise leswaku ha yini hi fanele hi tikambisisa loko a khutaza Vakreste lava totiweke: “Hisekelani ngopfu-ngopfu ku tiyisa ku vitaniwa ni ku hlawuriwa ka n’wina, hikuva loko mi endla sweswo a mi nga khuguki mi wa ni siku ni rin’we.” (2 Petro 1:10) Ina loko hi endla leswi hi nga swi kotaka, a hi nge tsandzeki hi tlhelo ra moya.

Leswi Hi Swi Kotaka Swi Nga Kurisiwa

Hi ndlela leyi anameke, malandza ya Xikwembu hinkwawo lama tinyiketeleke ma languteriwa ku endla leswi ma nga swi kotaka, kumbe leswi ma swi fikelelaka leswaku ma tsakisa Yehovha. Hambi swi ri tano, ku endla leswi hi nga swi kotaka loko hi endla ku rhandza ka Xikwembu ku nga ha kula. Hikuva xifanyetana xa malembe manharhu xi nga ha endla leswi xi swi kotaka leswaku xi pfuna mana wa xona hi ku endla xintirhwananyana, kambe loko xi ri karhi xi kula, xi ta swi kota ku endla leswi engetelekeke. Swi tano ni hi ku kula ka hina ka moya—leswi khale a ku ri leswi a hi kota swona sweswi swi nga ha va swi nga ha ri swona. Hi susumeteleka ku endlela Yehovha leswi engetelekeke.

Ku tlangela ka hina Yehovha swi hi susumetela leswaku hi endla leswi engetelekeke hi ku swi rhandza. Ku tlangela leswi a hi endleleke swona swi tiyisiwa hi dyondzo ya munhu hi xiyexe ya Rito ra yena, Bibele. Hi xikombiso, loko hi vukheta hi kambisisa ni ku anakanyisisa hi ndlela leyi Yehovha a nga rhumela N’wana wa yena leswaku a nyikela moya-xiviri wa yena leswaku a tshunxa vanhu exidyohweni, hi susumeteleka ku tirhela Musunguri wa lunghiselelo ra nkutsulo. (Yohane 3:16, 17; 1 Yohane 4:9-11) Loko hi ya hi ‘twa, hi vona leswaku Yehovha u lulamile,’ timbilu ta hina ti ta ya ti susumeteleka ku n’wi tirhela.—Pisalema 34:8.

Mutirheli wa nkarhi hinkwawo Jetter u swi xiyile leswi. Leswaku a cela swinene a nghena ehansi eka leswi a a swi dyondza, u lunghiselele kamara leritsongo endlwini ya yena leswaku a yi tirhisela swona. U yi hlele kahle leswaku a kota ku yisa nyingiso loko a ri karhi a endla ndzavisiso. Ekusuhi evuhirini u na ti-Watch Tower Publications Index ni tivholumo ta magazini wa Xihondzo xo Rindza na Xalamuka! U ri, “Loko ndzi kambisisa mhaka leyi ndzi tsakisaka, ndzi hisekela ku hatla ndzi yi byela van’wana.”

Hambi swi ri tano, tanihi leswi ku dya swakudya swo xawula nkarhi na nkarhi swi nga hetiki ku navela ka munhu ko lava ku dya masiku hinkwawo, nkambisiso lowu enteke wa Bibele a wu heti ku navela ka munhu ko dya swakudya swa moya siku na siku. Ruth wa xi vona xilaveko lexi, hikuva hi laha a nga tsundzukaka ha kona, ndyangu wa yena wu hlaya Bibele swin’we mpundzu ni madyambu man’wana ni man’wana. Sweswi, u na malembe ya 81 naswona u hete malembe yo tlula 60 evutirhelini bya nkarhi hinkwawo, kambe wa ha yi hlaya Bibele minkarhi hinkwayo loko a pfuka hi 6:00 a.m. Hi ku hatlisa loko a kuma timagazini ta Xihondzo xo Rindza na Xalamuka! Ruth u tinyika nkarhi wo tihlaya. U hlaya xihloko kanharhu kumbe minkarhi ya mune a nga si ya xi dyondza evandlheni. U ri: “Ku nghenisa Rito ra Xikwembu eka wena hi swona leswi tiyisaka ripfumelo.” Nakambe swi n’wi pfune ku ya emahlweni entirhweni wa vurhumiwa hi malembe yo tala.

Ku Endla Leswi U Nga Swi Kotaka Ku Pfuna Van’wana

Hi dyondzo leyi enteke ni ya nkarhi hinkwawo ya Rito ra Xikwembu, ku hiseka ka hina ko tirhela Xikwembu ka kula, naswona xin’wana lexi nge ndzeni ka hina xi hi susumetela ku endla leswi engetelekeke. (Ringanisa Yeremiya 20:9.) Ku hiseka ko tano ku susumete Hirohisa leswaku a hetisisa vutirheli bya yena hi laha ku teleke. (2 Timotiya 4:5) A a tshama ekaya ra mutswari un’we ni vamakwavo va mune. Loko a ha ri emalembeni ya kondlo-a-ndzi-dyi, Hirohisa u seketele ndyangu wa yena hi ku pfuka hi awara ya nharhu ni mixo leswaku a ya hangalasa maphepha-hungu. A lava ku endla leswi engetelekeke eku byeleni van’wana hi ta Yehovha, kutani Hirohisa u tsarise entirhweni wa vuphayona, hi laha vutirheli bya nkarhi hinkwawo bya Timbhoni ta Yehovha byi vitaniwaka ha kona. Hambi leswi a ha ri ntsongo, u tiphine hi ku pfuna van’wana va n’wi joyina eku endleni ka leswi va nga swi kotaka leswaku va dzunisa Yehovha.

Ku endla leswi hi nga swi kotaka eku pfuneni ka van’wana swi katsa ku va lava humelelaka evutirhelini bya hina. Eka nkarhi wun’wana Yesu u khutaze vadyondzisiwa va yena: “Loko mi tiva swilo leswi, mi tlhela mi swi endla, mi ta va mi katekile.” (Yohane 13:17) Naomi i xikombiso lexinene xa ku tirhisa swiringanyeto leswi nyikeriwaka hi nhlengeletano ya Yehovha leswaku hi antswisa vutirheli bya hina. A swi n’wi tikela ku vulavula ni vanhu lava a nga va tiviki hi yindlu na yindlu naswona hakanyingi a heleriwa hi marito loko a ri emakaya ya vanhu. Vakulu va le vandlheni va n’wi pfune ku tirhisa swiringanyeto leswi kumekaka ebukwini leyi nge Reasoning From the Scriptures, eka xiyenge lexi nge “Swingheniso Swo Swi Tirhisa eVutirhelini Bya Nsimu.”a U nhlokohate swingheniso leswi nge hansi ka xihloko xa “Ndyangu/Vana” ivi a swi phindha-phindha minkarhi yo tala. Vuyelo bya kona, u swi kotile ku bula ni wansati loyi a nga tirhiki, la nge malembeni yakwe ya va-30. Hambi loko Naomi a nga si endla riendzo ro vuyela, wansati loyi u te eHolweni ya Mfumo. Ku lunghiseleriwe dyondzo ya Bibele. Wansati loyi ni nuna wakwe sweswi i Vakreste lava khuvuriweke, va tiphina hi vutomi bya ndyangu ni vana va vona.

Ku Endla Leswi Hi Swi Kotaka Eku Kombiseni Ka Ku Tsakela Ka Munhu Hi Yexe

Hi nga tlhela hi encenyeta muapostola Pawulo, la nga te: “Ndzi endla hinkwaswo leswi hikwalaho ka Mahungu Lamanene, leswaku ndzi kota ku averiwa minkateko ya wona.”—1 Vakorinto 9:22, 23.

Hatsumi u ni langutelo leri. Loko Hatsumi a ri evutirhelini bya le rivaleni, wansati un’wana hi ku titsongahata u vulavule eka intercom a ku u khomeke ngopfu a nge swi koti ku bula na yena. Rito ra n’wini wa muti a ri olova, kutani Hatsumi a hambeta a n’wi endzela. N’wini wa muti a a n’wi hlamula ntsena hi intercom, a nga humi leswaku a ta vonana na Hatsumi. Swi fambise sweswo ku kala ku hela malembe mambirhi ni hafu.

Siku rin’wana Hatsumi u hundzule nkarhi lowu a endzaka ha wona, a ta loko ri rhengile. A ku nga ri na munhu la hlamulaka. Hambi swi ri tano, loko a famba, rito leri tolovelekeke endzhaku ka yena ri nwi vutisile, “Hi wena mani?” Wansati loyi a a nghena ekaya a huma kun’wana. Loko a twa vito ra Hatsumi, hi xihatla u te, “Oho, hi wena u tshamelaka ku ndzi endzela. Ndza khensa leswi u ndzi khathalelaka.” Hikuva wansati loyi a tshike dyondzo ya yena ya Bibele ni Timbhoni ta Yehovha endhawini yin’wana, a ri ni tingana swinene leswaku a amukela Hatsumi. Ku pfuxetiwe dyondzo ya Bibele, naswona n’wini wa muti u endla nhluvuko lowunene. Xana lava hi hlanganaka na vona evutirhelini bya yindlu na yindlu ha khathala ha vona?

Endla Leswi U Swi Kotaka

Yehovha u tlangela matshalatshala ya hina ya ku n’wi tirhela hi laha hi kotaka ha kona. U fana ni tatana loyi n’wana wa yena a n’wi telaka ni tinyiko. Hi ku famba ka malembe, tinyiko ti nga ha hambana hi ku ya hi malembe ya n’wana ni leswi a nga na swona. Tanihi leswi tatana a tsakelaka ku amukela nyiko yihi na yihi leyi humaka embilwini, leyi n’wana wa yena a n’wi nyikaka yona, kutani Yehovha na yena u lunghekele ku amukela ntirho wa hina wa mbilu hinkwayo mayelana ni ku kula ka hina ka moya.

Swi le rivaleni leswaku a ku na xivangelo xa ku ringanisa leswi hina hi kotaka swona ni swa van’wana. Hi laha Pawulo a vulaka ha kona, hi ta va ni xivangelo xa ku tlakusiwa hi leswi hi swi endleke, “ku nga ri hi swa un’wana.” (Vagalatiya 6:4) Onge hi nga hambeta hi hlayisa xikhutazo xa muapostola Petro: “Chivirikani leswaku Xikwembu xi mi kuma mi nga ri na xivati kumbe xisandzu, naswona mi ri ni ku rhula.”—2 Petro 3:14.

[Nhlamuselo ya le hansi]

[Xifaniso lexi nga eka tluka 29]

Xana u endla leswi u nga swi kotaka leswaku u tirhisa swiringanyeto swa vutirheli bya nsimu?