‘Tinyiketeleni Swinene’
1 Loko hi tinyiketela eka Yehovha, hi tshembise ku n’wi tirhela hilaha hi nga kotaka hakona. Hilaha ku faneleke, muapostola Petro u khutaze Vakreste va lembe-xidzana ro sungula leswaku va tikarhatela ku kambisisa xiyimo xa vona emahlweni ka Yehovha. (2 Pet. 1:10) Entiyisweni hi lava ku tikarhatela ku tsakisa Yehovha loko hi n’wi tirhela namuntlha. Xana leswi swi katsa yini? Loko vuxaka bya hina na Yehovha byi kula naswona hi anakanyisisa hi swilo hinkwaswo leswi a hi endleleke swona, timbilu ta hina ti hi susumetela ku tshama hi ri karhi hi endla hilaha hi nga kotaka hakona entirhweni wa yena. Hi lava ku antswisa nkoka wa vutirheli bya hina, naswona loko swi koteka, hi antswisa ni ntikelo wa byona.—Ps. 34:8; 2 Tim. 2:15.
2 Makwerhu wa xinuna lontshwa loyi a a lava ku endla leswi engetelekeke evutirhelini u kume leswaku ku dyondza Rito ra Xikwembu nkarhi na nkarhi swi kurise ku tlangela ka yena Yehovha ni ku nghenisa ku hiseka lokukulu eka yena. Leswi swi n’wi susumetele ku endla xikombelo xa ntirho wa vuphayona. Makwerhu wa xisati la kumeke swi nonon’hwa ku vulavula ni vanhu lava a nga va tiviki u titolovete swin’wana swa swingheniso leswi nga ebukwini leyi nge Ku Hlamulana ivi hi ku hatlisa a sungula ku humelela swinene evutirhelini. U kote ku fambisa dyondzo ya Bibele ni mpatswa lowu amukeleke ntiyiso.
3 Tsaka Hi Leswi U Nga Kotaka Ku Swi Endla: Van’wana va hina hi langutane ni swiyimo leswi nonon’hwaka swo tanihi rihanyo leri nga nyawuriki, ku kanetiwa hi va ndyangu, vusweti kumbe ku nga tsakeli ka vanhu ensin’wini. Swiphiqo swin’wana leswi tolovelekeke emasikwini lawa ya makumu swi nga kavanyeta ntirho wa hina. (Lk. 21:34, nhlamuselo ya le hansi eka NW; 2 Tim. 3:1) Xana leswi swi vula leswaku hi tsandzekile eku tinyiketeleni ka hina eka Yehovha? A swi tano loko hi n’wi tirhela hi ku tikarhata ka hina hinkwako.
4 A hi vutlharhi ku ringeta ku tiringanisa ni van’wana hi leswi va kotaka ku swi endla. Ematshan’weni ya sweswo, Matsalwa ma hi khutaza leswaku “un’wana ni un’wana a a kambisise ntirho wa yena.” Ku tinyiketela ka hina hi mbilu hinkwayo eka leswi hina hi hexe hi nga kotaka ku swi endla swi tsakisa Yehovha naswona swi hi endla hi “tidzunisa.”—Gal. 6:4; Kol. 3:23, 24.
5 Onge hi nga yingisa marito ya Petro ya leswaku hi ‘chivirika leswaku Xikwembu xi hi kuma hi nga ri na xivati kumbe xisandzu naswona hi ri ni ku rhula.’ (2 Pet. 3:14) Moya wo tano wu ta hi endla hi titwa hi hlayisekile naswona wu ta hi tisela ku rhula ka mianakanyo loku ku nga Yehovha ntsena la nga hi nyikaka kona.—Ps. 4:8.