“Tshamani Mi Ri Karhi Mi Endla Leswi Leswaku Mi Ndzi Tsundzuka”

¹ Vanhu va tshamela ku rivala swiendlakalo swa nkoka hi ku famba ka nkarhi. Lexi hi xin’wana xa swivangelo leswi endleke leswaku loko Yesu a simeke “xilalelo xa Hosi,” a leriseke vadyondzisiwa va yena a ku: “Tshamani mi ri karhi mi endla leswi leswaku mi ndzi tsundzuka.” Ku sukela enkarhini wolowo, loko va tlangela rifu ra Yesu, Vakreste hi ku yingisa va hambete va “huwelela rifu ra Hosi, yi kondza yi fika.”—1 Kor. 11:20, 23-26.

² Ku nga ri khale, Yesu u ta amukela vanhu vo hetelela evuakweni bya le tilweni lava nga va masalela ya “ntlhambinyana” lowu hungutekaka. (Lk. 12:32; Yoh. 14:2, 3) Nan’waka masalela ya vatotiwa kun’we ni ntshungu lowukulu lowu engetelekaka swinene wa “tinyimpfu tin’wana” va ta tlhela va va ni lunghelo ra ku tlangela Xilalelo xa Hosi, hi April 11. (Yoh. 10:16; Nhlav. 7:9, 10) Ku ta kandziyisiwa ku tlangela rirhandzu ra Yehovha lerikulu hi ku rhumela N’wana wakwe la tswariweke a ri swakwe leswaku ku pfuneka vanhu. Ku ta kandziyisiwa xikombiso xa Yesu, rirhandzu rakwe, vutshembeki byakwe ku fikela eku feni ni ku nyikela nkutsulo, ni ku fuma kakwe sweswi tanihi Hosi ya Mfumo wa Xikwembu lowu simekiweke, kun’we ni mikateko leyi Mfumo wu nga ta yi tisela vanhu. Entiyisweni lexi i xiendlakalo lexi faneriwaka hi ku tsundzukiwa!

³ Lunghiselela Sweswi: Hinkwerhu ka hina a hi tikarhateleni ku endla nguva leyi ya Xitsundzuxo yi va ya ntsako lowukulu ni ku tlangela ka hina swin’we ni lava nga ta hlanganyela na hina. Hi nga kurisa ku tlangela ka hina hi ku tlhela hi hlaya timhaka leti nga eBibeleni malunghana ni masiku ma nga ri mangani yo hetelela ya vutirheli bya Yesu ni swiendlakalo leswi yisaka eka rifu rakwe. Dyondzo ya hina ya ndyangu eka mavhiki ma nga ri mangani ku nga si fika Xitsundzuxo yi nga ha katsa ku pfuxetiwa ka tindzima 112-16 ebukwini leyi nge Nghwazi.

⁴ I vanhu vangani lava u va tivaka lava nga ha taka eXitsundzuxweni loko wo sungula u aka ku tlangela xiendlakalo lexi, u va rhamba ni ku endla leswaku va titwa va amukelekile? Endla nxaxamelo wa vona sweswi, ivi u endla hilaha u nga kotaka hakona leswaku u va pfuna ku ta. Endzhaku ka sweswo, va pfune leswaku va hambeta va kula hi tlhelo ra moya hi ku va khutaza ku va kona eminhlanganweni nkarhi na nkarhi.

⁵ Hi nkarhi wa nguva ya Xitsundzuxo, ku ta endliwa malunghiselelo yo hlawuleka leswaku ku engeteriwa minkarhi yo chumayela ya munhu un’wana ni un’wana. Hi ku endla xiyimiso lexinene, xana u nga swi kota ku phayona nkarhinyana hi April? Hi May? Yin’wana ya tindlela letinene ngopfu to kombisa leswaku hi swi tsundzuka hi ku tlangela leswi gandzelo ra Yesu ri vulaka swona eka hina i ku vulavula hi Yehovha, Xikwembu xa hina ni mikateko leyi ku fuma ka Mfumo hi N’wana wakwe ku nga ta yi tisa.—Ps. 79:13; 147:1.