Vana—Ha Tinyungubyisa Hi N’wina!
1 Vamambuxu, xana ma xi tiva xileriso xa Yehovha xa leswaku mi fanele mi katseka emintirhweni ya vandlha? (Det. 31:12; Ps. 127:3) I ntsako ku va na n’wina loko hi ri karhi hi gandzela Yehovha swin’we! Mi kufumeta timbilu ta hina loko mi tshamiseka ni ku rhiya tindleve eminhlanganweni. Swi tlhela swi hi tsakisa swinene loko mi ringeta ku hlamula hi marito ya n’wina. Vandlha hinkwaro ra tsaka loko mi nyikela tinkulumo eXikolweni xa Vutirheli bya le Tilweni, loko mi hlanganyela na hina hi ku hiseka entirhweni wa nsimu, ni loko hi twa leswaku mi nyikela vumbhoni hi xivindzi eka lava mi nghenaka na vona xikolo ni le ka vadyondzisi.—Ps. 148:12, 13.
2 Hi lava leswaku mi swi tiva leswaku ha tinyungubyisa hi n’wina loko hi vona mikhuva ya n’wina leyinene, maambalelo lamanene, mahanyelo lamanene ni ku xixima ka n’wina lavakulu. Ntsako wa hina wu tlhela wu va lowukulu loko mi kombisa leswaku mi ‘tsundzuka Muvumbi wa n’wina Lonkulu’ hi ku tivekela tipakani ta swa le tilweni.—Ekl. 12:1; Ps. 110:3.
3 Hi Byeleni Tipakani Ta N’wina: Mufana un’wana wa malembe ya nhungu hi vukhale u byele mulanguteri wa muganga a ku: ‘Xo sungula ndzi lava ku khuvuriwa, kutani ndzi ta tsakela ku pfuneta evandlheni hi ku tirha eka swa mpfumawulo ni ku tirha eka swikurisa-marito, ndzi va murindzi, ndzi pfuneta eka ndzawulo ya tibuku, ndzi hlaya tindzimana eka tidyondzo ta buku ni le ka Tidyondzo ta Xihondzo xo Rindza. Kutani ndzi tsakela ku va nandza wa vutirheli, endzhaku ka sweswo ndzi va nkulu. Ndzi ta tsakela ni ku va phayona ni ku ya exikolweni xa maphayona. Endzhaku ka sweswo ndzi tsakela ku ya eBethele, ndzi va mulanguteri wa xifundzha kumbe mulanguteri wa muganga.’ Mawaku ku tlangela lokunene loku a ku kombiseke eka lunghelo ro tirhela Xikwembu!
4 Loko mi ri karhi mi kula emirini ni le moyeni, ha tsaka loko hi mi vona mi fikelela tipakani ta n’wina. (Ringanisa Luka 2:52.) Lembe na lembe, magidi ya n’wina ma va vahuweleri lava nga khuvuriwangiki ni ku fanelekela nkhuvulo tanihi malandza lama tinyiketeleke ya Yehovha. Ntsako wa hina wu va lowukulu loko hi mi vona mi fanelekela ku va maphayona ya nkarhinyana hambi ku ri ku nghenela ntirho wa nkarhi hinkwawo. Entiyisweni, n’wina vana, ha tsaka hi n’wina naswona mi xihlovo xa risima xo dzunisa Tata wa hina wa le tilweni. Onge Yehovha a nga mi katekisa hilaha ku fuweke!—Swiv. 23:24, 25.