Nghenisa Ntshembo Wa Vutomi Lebyi Nga Heriki Eka Van’wana
1 Hambileswi munhu a lavisiseke tindlela ta ku hunguta swivangelo swa ku dyuhala ni ku engetela malembe ya yena ya ku hanya, ku dyuhala ni rifu a swi papalateki. Mawaku ndlela leyi hi nkhensaka ha yona leswi Bibele yi hlamuselaka leswi endlaka vanhu va dyuhala ni ku fa, kun’we ni ndlela leyi swivangelo swa ku dyuhala swi nga ta herisiwa ha yona ni ku herisiwa ka rifu. Mintiyiso leyi yi hlamuseriwa hi ndlela leyi khorwisaka ebukwini leyi nge Vutivi Lebyi Yisaka eVuton’wini Lebyi Nga Heriki. Buku leyi yi swi hlamula kahle swivutiso leswi pfilunganyaka malunghana ni vutomi ni rifu, yi kongomisa muhlayi eka nkarhi lowu paradeyisi yi nga ta kondleteriwa ha wona.
2 Hi March hi ta fambisa buku leyi nge Vutivi hi xikongomelo xo sungula tidyondzo ta Bibele. (Mt. 28:19, 20) kutani hi ta endla maendzo yo vuyela eka hinkwavo lava kombisaka ku tsakela rungula ra Mfumo. hi ndlela leyi hi ta nghenisa ntshembo wa vutomi lebyi nga heriki eka van’wana. (Tito 1:2) Leswaku u fikelela leswi, u nga ha kuma leswaku swiringanyeto leswi landzelaka swa pfuna.
3 Loko u endla riendzo ro sungula, u nga ha vutisa xivutiso lexi:
◼ “Xana u tshama u tivutisa leswaku ha yini vanhu va navela ku hanya vutomi byo leha? [Yimela nhlamulo.] Mabudha, Mahindu, Mamoslem, Vakreste ni van’wana hinkwavo va ni ntshembo wa vutomi endzhaku ka rifu.” Pfula buku leyi nge Vutivi eka ndzima 6, “Ha Yini Hi Dyuhala Hi Tlhela Hi Fa?,” ivi u hlaya ndzimana 3. Burisanani hi matsalwa lama kombisiweke. Loko u kombetela eka swivutiso swimbirhi leswi nga emakumu ka ndzimana vutisa n’wini wa muti loko a lava ku vona tinhlamulo hi yexe. Loko a swi tsakela, yana emahlweni u burisana na yena hi tindzimana ti nga ri tingani leti landzelaka. Dyondzo se yi sunguriwile! Fambisa buku hi munyikelo wa R4,00, ni ku endla makungu ya ku tlhela u vuya, ngopfu-ngopfu endzhaku ka siku rin’we kumbe mambirhi, leswaku mi ta burisana hi tinhlamulo.
4 Loko u tlhelela laha u fambiseke buku leyi nge “Vutivi,” u nga ha ku:
◼ “Ndzi vuyile leswaku hi ta burisana hi swivutiso swimbirhi swa malunghana ni rifu, leswi hi nga swi hlamulangiki.” Tsundzuxa n’wini wa muti swivutiso swa kona. Kutani burisanani hi rungula leri nga eka ndzima 6 ehansi ka xihlokwana lexi nge “Kungu Ra Vubihi.” Loko swiyimo swi pfumela, mi nga ya emahlweni ni dyondzo kumbe mi tirhisa xivutiso lexo hetelela emakumu ka ndzimana 7 leswaku mi andlala masungulo ya xiyenge lexi landzelaka. N’wi tiyisekise leswaku u ta tlhela u vuya. Nyika n’wini wa muti xiphephana xo rhambela minhlangano, ivi u hlamusela hi ku komisa ndlela leyi eminhlanganweni yi khomiwaka ha yona. N’wi rhambe hi malwandla leswaku a va kona.
5 Hambi u nyikela vumbhoni hi yindlu na yindlu kumbe hi xitshuketa, u nga ha sungula bulo ra wena hi ku vula u ku:
◼ “Xana u tshama u tivutisa leswi vumundzuku byi hi khomeleke swona hina ni misava? [Yimela nhlamulo.] Bibele yi katsakanya vumundzuku bya kona hi rito rin’we—Paradeyisi! Yi hlamusela leswaku eku sunguleni, Xikwembu xi endle xiphemu xa misava xi va paradeyisi yo saseka laha xi vekeke mpatswa wa vanhu lava xi nga va vumba. A va ta tata misava hinkwayo, va yi endla paradeyisi hakatsongo-tsongo. Xiya nhlamuselo leyi malunghana ni ndlela leyi a yi fanele yi ve ha yona.” Pfula buku leyi nge Vutivi eka tluka 8, ivi u hlaya ndzimana 9, ehansi ka xihlokwana lexi nge “Vutomi eParadeyisini.” Kutani hlamusela tinhla eka ndzimana 10, ivi u hlaya tsalwa leri kombisiweke, ku nga Esaya 55:10, 11. Hambeta u hlamusela leswi vutomi eParadeyisini leyi kondleteriweke byi nga ta va xiswona ni ku hlaya tindzimana 11-16 mi ri swin’we. Fambisa buku hi munyikelo wa R4,00. Kumbe u khutaza munhu loyi leswaku a tihlayela tona ni ku hlela leswaku mi tlhela mi vonana leswaku mi ta burisana ha tona.
6 Loko dyondzo yi nga sunguriwanga eku sunguleni, u nga ringeta ku yi sungula eka riendzo ro vuyela hi ku vula u ku:
◼ “Hilaha hi buleke hakona eka bulo ra hina leri hundzeke, i xikongomelo xa Xikwembu leswaku misava yi hundzuriwa paradeyisi. Sweswo swi tlakusa xivutiso lexi nge, Xana Paradeyisi yi ta va njhani?” Pfula buku leyi nge Vutivi eka ndzima 1, ivi mi dyondza tindzimana 11-16, ehansi ka xihlokwana lexi nge “Vutomi eParadeyisini Leyi Kondleteriweke.” Endzhaku ka sweswo kombisa xifaniso lexi nga eka matluka 4-5, ni ku vutisa munhu loyi loko a swi rhandza ku hanya etindhawini to tano to saseka. Kutani hlaya xivulwa xo sungula eka ndzimana 17 eka tluka 10. Loko swiyimo swi pfumela, mi nga ya emahlweni ni dyondzo kumbe u n’wi byela leswaku eka riendzo ra n’wina leri landzelaka u ta n’wi hlamusela leswi languteriweke eka munhu leswaku a hanya eParadeyisini leyi kondleteriweke. N’wi siyele xiphephana lexi kombisaka minkarhi ya minhlangano, ivi u n’wi rhamba hi malwandla leswaku a va kona eHolweni ya Mfumo.
7 Buku leyi nge Vutivi i xitirho lexinene lexi paluxelaka van’wana “vutomi lebyi nga heriki” lebyi tshembisiweke hi Xikwembu. Ku fambisa ka wena tidyondzo ta Bibele ni vanhu swi nga nghenisa ntshembo lowukulu eka vona lowu huhuteriweke hi Xikwembu “lexi xi nga hembiki.”