Xana Hi Nga Tlhela Hi Swi Endla?—Xirhambo Xin’wana Xa Maphayona Ya Nkarhinyana
1 I yini lexi hi nga ta tlhela hi xi endla? Xana hi nga va maphayona ya nkarhinyana hi nguva ya Xitsundzuxo? Xiengetelo xa Vutirheli Bya Hina Bya Mfumo bya February 1997 xi koke nyingiso wa hina hi nhloko-mhaka ya xona leyi tsariweke hi maletere yo dzwihala leyi nge: “Ku Laveka—Maphayona Ya Nkarhinyana Yo Ringana 10 000.” A hi ri ni ntshembo wa leswaku mi ta anakanyisisa hi xirhambo xolexo hi vuenti. Loko ku hlanganisiwa xiviko xa ntirho wa March 1997, hi tsakisiwe hi ku vona leswaku vanhu vo ringana 8728 va nghenele ntirho wa vuphayona bya nkarhinyana! Loko hi hlanganisa nhlayo yoleyo ni ya maphayona ya nkarhi hinkwawo yo ringana 4803 ni maphayona yo hlawuleka yo ringana 174 lama vikeke n’hweti yoleyo, hi kume leswaku 20 wa tiphesente ta vahuweleri hinkwavo lava nga ehansi ka rhavi ra Afrika Dzonga a va ri entirhweni wa vuphayona. Xana hi nga tlhela hi swi endla eka nguva leyi ya Xitsundzuxo?
2 Hi bumabumela hinkwavo hi rirhandzu lava tikarhateleke ku andzisa ntirho wa vona wa nsimu eka lembe leri nga hundza. Entiyisweni, hinkwenu ka n’wina mi susumetiwe hi rirhandzu ro pfumala vutianakanyi eka Yehovha Xikwembu ni le ka vanhu-kuloni. (Lk. 10:27; 2 Pet. 1:5-8) Vahuweleri lava nga eswiyin’weni swo hambana-hambana swa vutomi va lulamise swiyimo swa vona leswaku va phayona nkarhinyana. Evandlheni rin’wana, vahuweleri vo ringana 51 va phayone swin’we hi n’hweti yin’we, ku katsa ni vakulu vo tala, manana la nga ni ricece ra tin’hweti ta 15, makwerhu wa xisati la tshikeke ntirho wakwe ivi a kuma ntirho wa nkarhinyana leswaku a ta kota ku phayona kun’we ni makwerhu wa xisati la dyuhaleke loyi a nga si tshama a phayona. Mulanguteri wa xifundzha u tsarile: “Matshalatshala lamakulu entirhweni wo chumayela ma sunguriwile. . . . Leswi a swi tisi vuyelo ensin’wini ntsena, kambe ni mavandlha ma hiseka swinene. Vamakwerhu va tsakela ku tivana ku antswa kun’we ni ku vona vuyelo lebyinene evutirhelini.”
3 N’wexemu vantshwa a va nga rivariwanga. Muhuweleri la nga khuvuriwangiki wa malembe ya 13 hi vukhale eUnited States a a langutele nkarhi lowu a nga ta kombisa ku tinyiketela ka yena eka Yehovha ha wona. Endzhaku ka loko a khuvuriwile hi February, u tsarile malunghana ni ku navela ka yena ku va phayona ra nkarhinyana hi March: “Tanihi leswi ku nga riki na nchumu lexi ndzi sivelaka sweswi, ndzi endle xikombelo xa mina hi ku hatlisa. . . . Mintokoto yo tala leyi hi veke na yona ingi hi nga vanga na yona loko a ku nga ri xirhambo xa n’wina xa vuphayona. Ndzi tlangela Yehovha leswi ndzi veke ni lunghelo ro va un’wana wa lava anguleke vo ringana 100 000 [eUnited States].” U tivekele pakani yo tlhela a phayona.
4 Kumbexana a wu ri un’wana wa lava 8728 lava ngheneleke ntirho wa vuphayona bya nkarhinyana hi March n’wexemu, kumbe vo ringana 7264 hi April, kumbe vo ringana 4564 hi May. Xana u nga tlhela u swi endla nan’waka? Loko u nga swi kotanga ku phayona eka lembe leri hundzeke, xana u nga swi endla nan’waka? Xana hi nga hundza nhlayo yo ringana 10 198 ya maphayona ya nkarhinyana ya April 1990? Yoleyo a ku ri nhlayo leyikulu swinene ya maphayona ya nkarhinyana eka n’hweti yihi na yihi ematikweni hinkwawo lama nga ehansi ka rhavi ra Afrika Dzonga.
5 Nyikela Nyingiso Eka April Na May: Nan’waka, Siku ro hlawuleka ra Timagazini ri ta va hi Mugqivela, April 4, naswona Xitsundzuxo xi ta va hi Mugqivela, April 11, leswi nga ta endla leswaku April yi va n’hweti leyinene ya ntirho lowu engetelekeke evutirhelini. (2 Kor. 5:14, 15) Emasikwini yo sungula ya 11 en’hwetini, hi ta tikarhatela ku rhambela vanhu vo tala lava tsakelaka hilaha swi nga kotekaka hakona leswaku va va kona eXitsundzuxweni. Loko u kunguhate ku phayona nkarhinyana, hi kombela u endla xikombelo xa wena ka ha ri ni nkarhi ku nga si fika siku leri u tsakelaka ku sungula ha rona.—1 Kor. 14:40.
6 Tanihi leswi n’hweti ya May yi nga ni mahelo-vhiki ya ntlhanu, vahuweleri lava nghenaka xikolo kumbe lava tirhaka nkarhi hinkwawo va nga ha kuma swi olova ku phayona nkarhinyana en’hwetini yoleyo. Loko u tirha tiawara ta khume entirhweni wa nsimu eka mahelo-vhiki man’wana ni man’wana ya ntlhanu, u nga ha kunguhata ku tirha tiawara tin’wana ta khume leti engetelekeke n’hweti yoleyo leswaku u ta fikelela tiawara ta 60 leti languteriweke.
7 Etin’hwetini timbirhi ta April na May, hi ta fambisa swikhokhelo swa Xihondzo xo Rindza. Loko xikhokhelo xi ariwa, fambisani tikopi ta timagazini. Leswi swi fanele swi khutaza vo tala va hina leswaku hi nghenela ntirho wa vuphayona. Ha yini hi vula tano? Swa olova ku fambisa timagazini leti, naswona i ntirho wo tsakisa swinene ku ti tirhisa evutirhelini. Swa olova ku ti fambisa eka swiyenge hinkwaswo swa vutirheli—hi yindlu ni yindlu ni le ntirhweni wa le switolo, kun’we ni loko hi burisana ni vanhu exitarateni, etindhawini to paka ni le mintangeni hambi ku ri eka vumbhoni bya xitshuketa. Xa nkoka ngopfu, timagazini ta Xihondzo xo Rindza ni Xalamuka! ti seketela mintiyiso ya Mfumo. Ti yisa nyingiso eku hetisekeni ka vuprofeta bya Bibele, ti kombisa leswaku Mfumo wa Xikwembu wa fuma. Ti tlhela ti khumba vutomi bya vahlayi hi ku hlamusela swilo leswi vanhu va swi lavaka hakunene hi ndlela leyi kombisaka ku anakanyela. Loko hi ehleketa hi ndlela leyi vutomi bya hina byi khumbiweke ha yona hi timagazini leti ta risima, hi ta susumeteleka ku hlanganyela eku ti hangalaseni hi xitalo hilaha swi nga kotekaka ha kona hi April na May.
8 Loko u lunghiselela ntirho lowu lowukulu wa timagazini, u ta vuyeriwa loko u pfuxeta swihloko leswi: “Xihondzo xo Rindza ni Xalamuka!—Timagazini Leti Nga Enkarhini Leti Nga Ni Ntiyiso” (Xihondzo xo Rindza xa January 1, 1994), “Tirhisa Timagazini Ta Hina Hi Ndlela Leyinene” (Vutirheli Bya Hina Bya Mfumo bya September 1995) ni lexi nge “Lunghiselela Xingheniso Xa Wena N’wini Xa Ku Fambisa Timagazini” (Vutirheli Bya Hina Bya Mfumo bya October 1996).
9 Vakulu Rhangelani: Leswaku ku pfuneka vahuweleri vo tala lava a va phayona eka lembe leri nga hundza, vakulu va vandlha rin’wana va hlawule Mugqivela wun’we en’hwetini leswaku wu va siku ro hlawuleka ra ntirho wa nsimu wa vandlha hinkwaro. Ku endliwe malunghiselelo yo hlangana minkarhi yo hambana-hambana esikwini rolero leswaku hinkwavo lava nga evandlheni va kuma nkarhi wo hlanganyela eka swiyenge swo hambana-hambana swa ku nyikela vumbhoni. Leswi swi katsa ku tirha etindhawini ta mabindzu, ku nyikela vumbhoni exitarateni, ku famba hi yindlu ni yindlu, ku endla maendzo yo vuyela, ku tsala mapapila ni ku nyikela vumbhoni hi ku tirhisa riqingho. N’wangulo wa kona a wu hlamarisa, vahuweleri vo ringana 117 va hlanganyele entirhweni wa nsimu esikwini rolero. Va tirhe tiawara to ringana 521 naswona va fambise timagazini, tibroxara ni tibuku to ringana 617! Ntsako lowu veke kona hi Mugqivela wu ve kona na hi Sonto, laha ku veke ni vanhu vo tala swinene eNhlanganweni wa le Rivaleni ni le ka Dyondzo ya Xihondzo xo Rindza.
10 Eka Nhlangano wa Ntirho wun’wana ni wun’wana hi April na May, vandlha ri ta tsundzuxiwa malunghana ni nkarhi ni ndhawu leyi minhlangano ya ntirho wa nsimu yi nga ta khomiwa eka yona evhikini leri landzelaka, ngopfu-ngopfu loko ku ri ni malunghiselelo lama engetelekeke lama nga ta endliwa handle ka lama ntolovelo. Maphayona ya nkarhi hinkwawo kun’we ni vahuweleri lava nga riki maphayona ya nkarhinyana va khutaziwa ku seketela malunghiselelo lawa ya mintlawa loko swiyimo swa vona swi va pfumelela.
11 Mulanguteri wa ntirho u fanele ku hlangana ni makwerhu la avelaka nsimu leswaku va endla malunghiselelo ya ku tirha nsimu leyi nga hlanganisiwiki nkarhi na nkarhi. Ku nga ha nyikeriwa nyingiso lowukulu eka lava nga riki kona ekaya ni ku nyikela vumbhoni eswitarateni ni le switolo. Loko swi koteka, kandziyisa tindlela ta ku nyikela vumbhoni nimadyambu. Ku fanele ku odiwa timagazini leti eneleke ta tin’hweti ta April na May hikwalaho ka ntirho lowu lowu engetelekeke.
12 Vahuweleri Vo Tala Va Nga Faneleka: Xivulwa xo sungula eka fomo yo endla xikombelo xa vuphayona bya nkarhinyana xi ri: “Hikwalaho ka rirhandzu ra mina ha Yehovha ni ku navela ka mina ku pfuna van’wana leswaku va dyondza hi ta yena ni swikongomelo swa yena, ndzi tsakela ku engetela ku hlanganyela ka mina entirhweni wa nsimu hi ku tsarisa tanihi phayona ra nkarhinyana.” Ku rhandza Yehovha ni ku lava ku pfuna van’wana hi tlhelo ra moya i swivangelo swa ku tinyiketela ka hina. (1 Tim. 4:8, 10) Leswaku munhu a va phayona ra nkarhinyana, u fanele a khuvuriwile, a va xikombiso lexinene hi tlhelo ra mahanyelo, naswona a ta swi kota ku tirha tiawara ta 60 evutirhelini hi n’hweti. Tanihi leswi hinkwerhu ka hina hi xiyisisaka swiyimo swa hina, xana van’wana va hina lava nga si tshamaka va phayona va nga swi kota ku endla tano hi April kumbe hi May?
13 Vo tala evandlheni va nga vona onge na vona va nga kota ku phayona loko va vona van’wana lava nga ni swiyimo swo fana ni swa vona va tsarisa. Vana va xikolo, vadyuhari, vanhu lava tirhaka nkarhi hinkwawo, ku katsa ni vakulu ni malandza ya vutirheli, ni van’wana lava phayoneke nkarhinyana hilaha ku humelelaka. Manana wa ndyangu la nga ni vana vambirhi la tirhaka nkarhi hinkwawo u tirhe tiawara to ringana 60, a fambisa timagazini to ringana 108 ni ku sungula tidyondzo ta Bibele tinharhu hi n’hweti yin’we ya ku phayona nkarhinyana. Xana u swi endlise ku yini? U tirhise nkarhi wa yena wa swakudya swa ni nhlikanhi leswaku a chumayela ensin’wini ya kwala kusuhi, u nyikele vumbhoni hi ku tsala mapapila, naswona u hlanganyerile eku nyikeleni ka vumbhoni etindhawini to paka ni le switarateni. U tlhele a tirhisa masiku lawa a nga tirhi ha wona vhiki rin’wana ni rin’wana leswaku a hlanganyela ni vandlha entirhweni wa nsimu. Hambileswi eku sunguleni a ehleketeke leswaku vuphayona bya nkarhinyana i pakani leyi nga fikelelekiki, u kote ku hlula swihinga hikwalaho ka xikhutazo xa van’wana ni hi ku endla xiyimiso lexinene.
14 Yesu u tiyisekise vadyondzisiwa vakwe a ku: “Joko ra mina ra olova ni mpingu wa mina wa vevuka.” (Mt. 11:30) Yoleyo a ku ri nhloko-mhaka leyi khutazaka eka Xihondzo xo Rindza xa August 15, 1995. Yi vulavula hi makwerhu wa xisati loyi a ri ni ntirho wa ku tihanyisa lowu tikaka. Xana yena u ehlekete leswaku vuphayona bya nkarhinyana a hi ntirho wa yena? E-e. Entiyisweni, u swi kotile ku va phayona ra nkarhinyana n’hweti yin’wana ni yin’wana. Ha yini? Hikuva u vone leswaku entiyisweni ku phayona swi n’wi pfune ku va munhu la ringaniselaka. Ku pfuna vanhu ku dyondza ntiyiso wa Bibele ni ku va vona va hundzula vutomi bya vona leswaku va ta amukeriwa hi Xikwembu a ku ri xihlovo xa ntsako wa yena lowukulu evuton’wini byakwe lebyi nga ni mintirho yo tala.—Swiv. 10:22.
15 Ku lahlekeriwa kwihi na kwihi ni mindzulamiso leyi munhu a faneleke a yi endla leswaku a ta phayona swi hakeriwa hi mikateko yo tala leyi munhu a yi kumaka. Makwerhu wa xisati u tsarile malunghana ni ntokoto wakwe wa vuphayona bya nkarhinyana: “Byi ndzi pfune ku tshika vutianakanyi ni ku va ndzi yisa nyingiso wa mina eku pfuneni ka vanhu van’wana. . . . Ndzi khutaza hinkwavo lava nga byi nghenelaka leswaku va endla tano.”
16 Swi Lava Ku Endla Xiyimiso Lexinene: Eka tluka ro hetelela ra xiengetelo lexi, hi tlhele hi endla xiyimiso lexi nga eka Vutirheli Bya Hina Bya Mfumo bya February 1997. Kumbexana xin’wana xa swona xi fambisana ni swiyimo swa wena. Loko u ri karhi u swi kambisisa, ehleketisisa hi tirhelo ra wena ra ntolovelo ra ntirho wa n’hweti na n’hweti. Hi yihi mintirho ya le kaya ka wena leyi nga endliwaka u nga si sungula ku phayona kumbe leyi nga vekeriwaka etlhelo leswaku yi ta endliwa endzhaku? Xana swi nga koteka ku hunguta nkarhi lowu tirhiseriwaka ku tihungasa, mintlangu kumbe swilo swin’wana swa ku titsakisa? Ematshan’weni yo langutela tiawara ta 60 leti lavekaka, endla xiyimiso xa wena xa siku na siku kumbe xa vhiki na vhiki. Ku laveka tiawara timbirhi ntsena hi siku kumbe tiawara ta 15 hi vhiki leswaku u va phayona ra nkarhinyana. Languta swiyimiso leswi nga xikombiso, naswona u tirhisa xitsalo ku endla xiyimiso xa wena n’wini lexi fanelaka wena ni ndyangu wa wena.
17 N’wangulo lowunene ni nseketelo lowu engetelekeke lowu vandlha ri wu kombiseke evutirhelini n’wexemu swi tiyise phayona rin’wana leri nga tsala ri ku: “Ndzi nkhensa ngopfu xikhutazo xa n’wina xa rirhandzu xa leswaku hi tikarhatela ku seketela ntirho wa vuphayona bya nkarhinyana. . . . Swiyimiso swa n’wina leswi ringanyetiwaka swi pfune vo tala lava nga si tshamaka va phayona ku vona leswaku va nga swi kota. . . . I ntsako lowukulu eka mina ku va xiphemu xa nhlengeletano ya Yehovha ni ku landzela vurhangeri bya hlonga ro tshembeka ni ro tlhariha lebyi endliwaka hi rirhandzu ni ntsako.”
18 Swivuriso 21:5 ya hi tiyisekisa: “Makungu ya l’a gingiritekaka ma yisa e nḍalweni.” Swivuriso 16:3 ya hi khutaza: “Nyiketa Yehova e timhaka ta wena hikwato, kutani makungu ya wena ma ta tiya.” Ina, hi ku khongela Yehovha loko hi endla swiboho ni ku titshega hi yena swinene leswaku a hi pfuna ku humelela, hi nga va ni langutelo lerinene eka makungu ya hina ya ku phayona nkarhinyana. Swi nga ha endleka leswaku endzhaku ka ku vona ndlela leyi u humelelaka ha yona eka xiyimiso xa hina endzhaku ka n’hweti yin’we kumbe timbirhi ta vuphayona bya nkarhinyana, hi kota ni ku endla mfungho ebokisini leri nga eka fomo yo endla xikombelo xa vuphayona bya nkarhinyana leri nge: “Fungha laha loko u lava ku tirha nkarhi wo leha u ri phayona ra nkarhinyana kukondza u hi tivisa.” Entiyisweni, hi nga tiyimisela ku tlhela hi phayona nkarhinyana hi August, laha ku nga ta va ni mahelo-vhiki yo ringana ntlhanu. Loko hi heta lembe ra ntirho hi August, ku ta pfuniwa munhu un’wana ni un’wana leswaku a hlanganyela hi xitalo evutirhelini hilaha swi nga kotekaka hakona.
19 Yesu u profetile: “Loyi a kombisaka ripfumelo eka mina, na yena u ta endla mintirho leyi ndzi yi endlaka; naswona u ta endla mintirho leyikulu ku tlula leyi.” (Yoh. 14:12) I lunghelo ra hina leri tsakisaka ku tirha tanihi vatirhi-kulobye ni Xikwembu loko vuprofeta lebyi byi ri karhi byi hetiseka swinene. Lowu i nkarhi wa ku chumayela mahungu lamanene hi xitalo ku tlula rini na rini, hi xava nkarhi lowunene wa ku endla ntirho lowu. (1 Kor. 3:9; Kol. 4:5) Ku hlanganyela entirhweni wa vuphayona bya nkarhinyana hi xitalo hilaha swi nga kotekaka hakona i ndlela leyinene ngopfu ya ku endla ntirho wa hina tanihi vahuweleri va Mfumo. Hi mahlo-ngati hi langutele ku vona ndlela leyi risimu ra ku dzunisa leri humaka eka maphayona ya nkarhinyana ri nga ta pfuma ha yona eka nguva leyi ya Xitsundzuxo. (Ps. 27:6) Loko hi ehleketa hi vuyelo bya n’wexemu, ha tivutisa, ‘Xana hi nga tlhela hi swi endla?’ Ha tiyiseka leswaku hi ta swi endla!
[Box on page 3]
Xana U Nga Va Phayona Ra Nkarhinyana?
“Ku nga khathariseki leswaku swiyimo swa wena hi swihi, loko u khuvuriwile, u ri xikombiso lexinene hi tlhelo ra mahanyelo, u ta swi kota ku tirha tiawara to ringana 60 hi n’hweti evutirhelini bya nsimu naswona u tshemba leswaku u nga tirha n’hweti yin’we kumbe leti engetelekeke tanihi phayona ra nkarhinyana, vakulu va vandlha va ta tsakela ku amukela xikombelo xa wena xa lunghelo leri ra ntirho.”—Ku Hleleriwa Ku Hetisisa Vutirheli Bya Hina, tluka 114.
[Box on page 6]
Xiyimiso Xa Vuphayona Bya Nkarhinyana
Xikombiso Xa Tindlela To Fikelela Tiawara Ta 15 eNtirhweni Wa Nsimu Vhiki Rin’wana Ni Rin’wana
Nimixo—Musumbhunuku ku fika hi Mugqivela
Sonto ri nga ha siviwa hi siku rihi na rihi
Siku Nkarhi Tiawara
Musumbhunuku Nimixo 2 1⁄2
Ravumbirhi Nimixo 2 1⁄2
Ravunharhu Nimixo 2 1⁄2
Ravumune Nimixo 2 1⁄2
Ravuntlhanu Nimixo 2 1⁄2
Mugqivela Nimixo 2 1⁄2
Ntsengo Wa Tiawara: 15
Masiku Mambirhi Lama Teleke
Ku nga ha hlawuriwa masiku wahi na wahi mambirhi ya vhiki
Siku Nkarhi Tiawara
Ravunharhu Siku Hinkwaro 7 1⁄2
Mugqivela Siku Hinkwaro 7 1⁄2
Ntsengo Wa Tiawara: 15
Madyambu Ya Masiku Mambirhi Ni Mahelo-vhiki
Ku nga ha hlawuriwa madyambu wahi na wahi mambirhi exikarhi ka vhiki
Siku Nkarhi Tiawara
Musumbhunuku Nimadyambu 1 1⁄2
Ravunharhu Nimadyambu 1 1⁄2
Mugqivela Siku Hinkwaro 8
Sonto Hafu Ya Siku 4
Ntsengo Wa Tiawara: 15
Ndzhenga Wa Le Xikarhi Ka Vhiki Ni Hi Mugqivela
Sonto ri nga ha siviwa hi siku rihi ni rihi
Siku Nkarhi Tiawara
Musumbhunuku Nindzhenga 2
Ravumbirhi Nindzhenga 2
Ravunharhu Nindzhenga 2
Ravumune Nindzhenga 2
Ravuntlhanu Nindzhenga 2
Mugqivela Siku Hinkwaro 5
Ntsengo Wa Tiawara: 15
Xiyimiso Xa Mina N’wini Xa Ntirho Wa Nsimu
Tivekele nhlayo ya tiawara eka nkarhi wun’wana ni wun’wana
Siku Nkarhi Tiawara
Musumbhunuku
Ravumbirhi
Ravunharhu
Ravumune
Ravuntlhanu
Mugqivela
Sonto
Ntsengo Wa Tiawara: 15