Marungula Ya Swa Mfumo

Afrika Dzonga: Hi May ku nyiketeriwe tiholo ta ntlhanu, ku nga Tableview (eCape Town), Makwane, Makong, Tseseng na Tseki (eQwa-Qwa). Tiholo leta mune eQwa-Qwa ti nyiketeriwe hi siku rin’we laha a ku ri ni vanhu vo ringana 616 loko va hlanganile.

Komiti yo Aka ya Xifundzha ya le Witwatersrand yi rhumele muchini wo foroma switina leswikulu eQwa-Qwa, ivi vamakwerhu va kwalaho va foroma switina leswikulu swo ringana 20 000 swa ku aka tiholo hi mavhiki ya mune ntsena. Hi April Komiti yo Aka ya Xifundzha ya le Witwatersrand ni vatirhi va ku tirhandzela vo tlula 200 va teke riendzo ro ya eQwa-Qwa, va famba tikhilomitara to tlula 700 ku ya ni ku vuya, leswaku va ya aka tiholo leti. Hi ku tirhisa akelo lerintshwa ra ku khomanisa switina leswikulu leswi nga oma, tiholo ta mune ti hetiwe hi masiku ya tsevu ntsena laha a ku ri ni nseketelo lowunene ngopfu wa vamakwerhu va kwalaho. Swi teke mune wa tiawara ntsena leswaku makhumbi ya holo ya vumune ma fika elwangwini!

Hi Mugqivela, May 30, 1998, vayimeri va Bethele ni swirho swa Tikomiti to Aka ta Xifundzha lava humaka eAfrika Dzonga, Angola, Malawi, Mozambhiki, Zambia na Zimbabwe va ve ni seminara ya Tiholo ta Mfumo leti akiwaka hi mali ya le hansi. Va kanerisane hi timhaka to hlayanyana hi xikongomelo xo hatlisisa nongonoko wa ku aka leswaku mavandlha yo tala ma ta kota ku va ni tiholo hi mali ya le hansi.

Ku nyiketeriwe tiholo tin’wana tinharhu hi June, ku nga Ganyesa (eNorth West), Valschfontein (eMpumalanga) na Queenstown. Leswi swi hi nyika nhlayo ya Tiholo ta Mfumo leti nyiketeriweke nan’waka ta 27.