Hinkwavo Va Fanele Va ‘Amukela Rito Hi Mbilu Hinkwayo’!

¹ Vanhu va timiliyoni va dyondza Bibele ni Timbhoni ta Yehovha. Leswaku va fanelekela vutomi lebyi nga heriki, va fanele va ‘amukela rito hi mbilu hinkwayo,’ hilaha vanhu va 3000 lava hundzukeke ni ku tlhela va khuvuriwa hi siku ra Pentekosta ya 33 C.E. va endleke hakona. (Mint. 2:41) Xana leswi swi hi byarhisa vutihlamuleri byihi namuntlha?

² Hi fanele hi pfuna swichudeni swa hina swa Bibele leswaku swi tinyiketela eka Yehovha. (1 Tim. 4:7-10) Malunghana ni mhaka leyi, xiengetelo xa Vutirheli Bya Hina Bya Mfumo bya June 1996, ndzimana 20, xi ri: “Loko mi ri karhi mi dyondza, nkarhi na nkarhi lava minkarhi yo aka ku tlangela timfanelo ta Yehovha. Phofula mintlhaveko ya wena n’wini hi Xikwembu. Pfuna xichudeni leswaku xi anakanya hi ku hlakulela vuxaka lebyikulu na Yehovha.”

³ Ntlhontlho Lowu Hi Langutanaka Na Wona: Vanhu vo tala, lava kuceteriweke hi vukhongeri bya mavunwa, va enerisiwa hi vugandzeri lebyi nga laviki nkarhi wo tala ni matshalatshala lamakulu, lebyi nga laviki leswaku va cinca ndlela leyi va hanyaka ha yona. (2 Tim. 3:5) Ntlhontlho lowu hi langutaneke na wona i wa ku pfuna swichudeni swa hina swa Bibele leswaku swi vona leswaku vugandzeri bya ntiyiso byi katsa leswi engetelekeke ku tlula ku va vatwi va rito ra Xikwembu ntsena. Swi fanele swi swi tirhisa evuton’wini bya swona leswi swi swi dyondzaka. (Yak. 1:22-25) Loko ku ri ni swin’wana eka mahanyelo ya swona leswi nga amukelekiki eka Xikwembu, swi fanele swi swi tiva leswaku i vutihlamuleri bya swona ku “hundzuluka” ni ku endla leswi lulameke leswaku swi xi tsakisa. (Mint. 3:19) Leswaku swi kuma vutomi lebyi nga riki na makumu, swi fanele swi ‘tikarhata hi matimba’ ni ku yima swi tiyile entiyisweni.—Luka 13:24, 25.

⁴ Loko mi ri karhi mi burisana hi timhaka to hambana-hambana ta mahanyelo, vutisa xichudeni xa wena xa Bibele malunghana ni ndlela leyi xi ti vonaka ha yona timhaka leti ni leswi xi faneleke xi swi endla loko xi vona leswaku xi fanele xi endla ku cinca ko karhi evuton’wini bya xona. Endla leswaku xi ehleketa hi nhlengeletano leyi xi dyondzaka ntiyiso eka yona, naswona xi khutaze leswaku xi va kona eminhlanganweni ya vandlha nkarhi ni nkarhi.—Hev. 10:25.

⁵ A hi swi endleni xikongomelo xa hina ku fikelela timbilu ta xichudeni hi dyondzo ya hina. Hi ta tsaka loko hi khutaza vanhu lavantshwa leswaku va amukela rito ra Xikwembu hi mbilu hinkwayo ivi va khuvuriwa!—1 Tes. 2:13.