Akanani Hi Ku Hlamula Eminhlanganweni
1 Eka Vaheveru 10:24 ha khongoteriwa leswaku hi “khutazana erirhandzwini ni le mintirhweni leyinene.” Leswi swi katsa ku akana hi ku hlamula hi ndlela leyi khutazaka eminhlanganweni ya vandlha. Ha yini hi fanele hi hlamula? Xana leswi hi nga swi endlisa ku yini? I vamani lava vuyeriwaka?
2 Anakanya hi minkarhi yo tala leyi ha yona u vuyeriweke hi ku twa van’wana va tiphofula hi marito yo olova, lama twisisekaka lama engeteleke ku twisisa ka wena ni ku ku tiyisa emoyeni. Na wena u ni lunghelo ro va endlela leswi fanaka. Loko u hlamula, u kombisa ku navela ka wena ka ku “nyika nyiko yo karhi ya moya” leswaku u khutaza hinkwavo lava nga eminhlanganweni.—Rhom. 1:11, 12.
3 Ndlela Yo Hlamula Kahle: U nga nyikeli tinhlamulo to leha, leti hlanganisaka mhaka hinkwayo ya ndzimana. Hakanyingi tinhlamulo to leha a ti yi humesi nhlamulo leyi lavekaka naswona ti nga ha endla leswaku van’wana va nga swi koti ku hlamula. Nhlamulo yo sungula eka ndzimana yi fanele yi koma, yi hlamula xivutiso hi ku kongoma. Lava nyikelaka tinhlamulo leti engetelekeke va nga ha kombisa ndlela leyi mhaka ya kona yi vuyerisaka ha yona kumbe va kombisa ndlela leyi matsalwa ma tirhaka ha yona. Vona Buku Yo Letela Ya Xikolo, matluka 90-2.
4 Loko swi ku tikela ku hlamula, lunghiselela nhlamulo yo koma ka ha ri emahlweni, ivi u kombela mufambisi leswaku a ku komba loko mi fika eka ndzimana yoleyo. Loko u ta va u endlise xileswi eminhlanganweni yi nga ri yingani, swi ta ku olovela ku hlamula. Tsundzuka leswaku Muxe na Yeremiya va vule leswaku a va nga ri ni vuswikoti byo vulavula emahlweni ka vanhu. (Eks. 4:10; Yer. 1:6, nhlamuselo ya le hansi eka NW) Kambe Yehovha u va pfunile leswaku va n’wi vulavulela, na wena u ta ku pfuna.
5 I Vamani Lava Nga Ta Pfuniwa Hi Tinhlamulo Ta Wena? Wena hi wexe wa pfuneka hikuva tinhlamulo ta wena ti dzikisa ntiyiso swinene emianakanyweni ni le mbilwini ya wena, ti endla leswaku swi ku olovela ku tsundzuka rungula ra kona enkarhini lowu taka. Nakambe, van’wana va pfuneka loko va twa tinhlamulo ta wena leti akaka. Ha khutazeka loko hina hinkwerhu, hi tikarhatela ku phofula ripfumelo ra hina eminhlanganweni ya vandlha, hambi hi ni ntokoto, hi lavatsongo, hi ni tingana, kumbe hi lavantshwa.
6 Entiyisweni hi ta swi vona leswaku ‘marito lamanene hi nkarhi lowu faneleke i manene ngopfu’ loko ma tirhiseriwa ku aka van’wana eminhlanganweni!—Swiv. 15:23.