Vugandzeri Bya Ntiyiso Bya Ndlandlamuka eYuropa Vuxa

¹ Vakreste va lembe-xidzana ro sungula a va ri vachumayeri va Mfumo lava hisekaka. A va tsaka loko mavandlha ma “andza hi nhlayo siku rin’wana ni rin’wana.” (Mint. 16:5) Ku chumayela ka vona hi xivindzi ku yise vugandzeri bya ntiyiso eAsia, Afrika ni le Yuropa, leswi endleke leswaku vapfumeri va andza swinene.

² Enkarhini lowu wa makumu, vugandzeri bya ntiyiso bya ha ndlandlamuka, ngopfu-ngopfu ematikweni ya le Yuropa Vuxa. Ematikweni lawa a hi yirisiwile hi hulumendhe ku fikela eku sunguleni ka va-1990, sweswi hi vona ku andza loku hlamarisaka. Mambirhi eka matiko wolawo, ku nga Russia na Ukraine, 1999 Yearbook yi kombisa leswaku ha rin’we ri vike vahuweleri lava tlulaka 100 000 lava hlanganyelaka evutirhelini bya le rivaleni. Emasin’wini ya 15 ya le khale ka Soviet Union, ku sukela hi 1991, vanhu vo tlula 220 000, va nyiketele vutomi bya vona eka Yehovha naswona va khuvuriwile! Ku andza loku ka xihatla ku vange leswaku ku akiwa Tiholo ta Mfumo ni Tiholo ta Nhlengeletano letintshwa kun’we ni ku ndlandlamuxa miako yo hlayanyana ya marhavi.

³ Mali yin’wana ya Nkwama wa Sosayiti wa Tiholo ta Mfumo yi lombiwa mavandlha lama nga ematikweni lawa ku nga ni xilaveko xa xihatla xa Tiholo ta Mfumo leti engetelekeke, kambe lama nga riki na swilo swo ringana naswona ma nga ni swiphiqo leswikulu swa timali. Exikarhi ka March 1996 na October 1998, marhavi lama langutelaka matiko ya 11 ya le Yuropa Vuxa, ma endle swikombelo swa ku lomba mali ya ku aka Tiholo ta Mfumo ta 359, kutani Sosayiti yi nyike mpfumelelo wa leswaku ti akiwa. Minyikelo leyi yi tirhiseriwa ku xava ndhawu ni ku xava nhundzu yo aka Tiholo ta Mfumo letintshwa ni le ku pfuneni ka mavandlha leswaku ma antswisa tiholo leti ana se ti nga kona. Swifaniso leswi kombisiweke laha, swi hi kombisa ndlela leyi minyikelo leyi nghenisiwaka eka Nkwama wa Sosayiti wa Tiholo ta Mfumo eUnited States ni le matikweni mambe yi pfunaka vamakwerhu ha yona eYuropa Vuxa.

⁴ Hi 1998, Bulgaria ri ve ni ku andza ka 12 wa tiphesente, naswona vamakwerhu a va tsake ngopfu loko Holo ya vona ya Mfumo yo sungula yi nyiketeriwa hi April wa lembe rero. Le Croatia ku ve ni ku andza ka mune wa tiphesente, sweswi vamakwerhu va le ku akeni ka Tiholo ta Mfumo leti engetelekeke leswaku va ndlandlamuxa vugandzeri bya ntiyiso. Le Hungary, mavandlha ya 144 ma tirhisa Tiholo ta Mfumo ta kwalomu ka 80. Leswi swi vula leswaku 61 wa tiphesente ta mavandlha ya 235 lama nga eka tiko leri, ma ni ndhawu ya wona ya vugandzeri. Le Makedoniya, hikwalaho ka tsima ra ku aka Tiholo ta Mfumo, ku hetiwe tiholo timbirhi letintshwa naswona tin’wana ta ha ta akiwa. Hi ximumu xa 1999, (ematikweni ya le n’walungu) muako lowu nga ni Tiholo timbirhi ta Mfumo wu hetiwile le ntsindza wa Skopje. Holo leyi i yikulu lerova yi nga tirhisiwa hi mavandlha ya kwalomu ka tsevu.

⁵ N’wexemu, le Russia a ku khuvuriwa vanhu vo tlula 260 vhiki ni vhiki, hi xiringaniso! Hi ku landzela xikombiso xa matiko man’wana, rhavi ra le Russia ri simeke Tikomiti to Aka ta Xifundzha ta 12 ensin’wini hinkwayo ya rhavi leri, leswaku ri ta seketela ku akiwa ka Tiholo ta Mfumo. En’walungwini wa St. Petersburg, Holo ya Nhlengeletano leyi nga ta rhurhela vanhu va 1 600 yi karhi ya akiwa. Muako lowu wu ta tlhela wu va ni Tiholo ta Mfumo ta ntlhanu, yin’wana ni yin’wana ya tona yi ta va ni switshamo swa 200. Leswaku ku khathaleriwa swilaveko swa vamakwerhu ni vunyingi bya vanhu lava tsakelaka le Ukraine, 84 wa Tiholo ta Mfumo ti herile naswona tiholo ta 80 ta ha ri eku akiweni.

⁶ Xana ku andza loku nga eYuropa Vuxa a ku wu tisi ntsako etimbilwini ta hina? Ku nga khathariseki leswaku hi tshama kwihi, ku ndlandlamuka ka vugandzeri bya ntiyiso ku hi tsundzuxa leswaku Xikwembu a xi yi hi ngohe naswona ku lehisa ka xona mbilu ku ta endla leswaku ku pona “ntshungu lowukulu.” (Nhlav. 7:9; 2 Pet. 3:9) Mayana lunghelo ronghasi leri hi nga na rona ra ku pfuna van’wana leswaku va kula hi tlhelo ra moya, hambi ku ri lava nga ematikweni ya le kule! Swivuriso 28:27 ya hi tiyisekisa leswaku “l’a pfunaka v̌apfumari a nga ka a nga pfumali.” Ku tiyimisela ka hina ku seketela ntirho lowu wo aka hi timali ku endla leswaku “ku va ni ku ringana-ringana” ka swilo leswi vonakaka, ku endla leswaku hinkwavo va kuma ntsako lowu tisiwaka hi ku nyika ni ntsako lowu vangiwaka hi ku vona vugandzeri bya ntiyiso byi ndlandlamuka emisaveni hinkwayo.—2 Kor. 8:14, 15; Mint. 20:35.

[Xifaniso lexi nga eka tluka 3]

Săcele, Romania

[Xifaniso lexi nga eka tluka 3]

Maardu, Estonia

[Xifaniso lexi nga eka tluka 3]

Sevnica, Slovenia

[Xifaniso lexi nga eka tluka 3]

Tiszavasvári, Hungary

[Swifaniso leswi nga eka tluka 4]

Jūrmala, Latvia

[Xifaniso lexi nga eka tluka 4]

Tallinn, Estonia

[Xifaniso lexi nga eka tluka 4]

Taurage, Lithuania

[Xifaniso lexi nga eka tluka 4, 5]

Belgrade, Yugoslavia

[Swifaniso leswi nga eka tluka 5]

Prievidza, Slovakia

[Xifaniso lexi nga eka tluka 5]

Mátészalka, Hungary

[Xifaniso lexi nga eka tluka 6]

Ruma, Yugoslavia

[Swifaniso leswi nga eka tluka 6]

Vranov nad Topl’ou, Slovakia

[Xifaniso lexi nga eka tluka 6]

Tornakalns, Latvia