Tsima Ra Ku Aka Tiholo Ta Mfumo Ri Ya eMahlweni
1 Hi 1983 eMintsombanweni ya Muganga ya “Vun’we Bya Mfumo” eUnited States, ku tivisiwe leswaku ku ta simekiwa nkwama wo hlawuleka wo seketela ku akiwa ni ku pfuxetiwa ka Tiholo ta Mfumo etikweni hinkwaro ra United States ni le Canada. Hi nkarhi wolowo a hi nga swi tivi leswaku lunghiselelo rero ritsongo a ri ta tisa mikateko yo tanihi kwihi. Hi sungule ku swi vona kahle leswi Pisalema 92:4 yi swi vulaka loko yi ku: “Oho Yehovha, u ndzi tsakisile hikwalaho ka ntirho wa wena; ndzi huwelela hi ku tsaka hikwalaho ka mintirho ya mavoko ya wena.”
2 Sweswi ha tsaka swinene hi ntirho lowu endliweke. Namuntlha ku endliwa tsima lerikulu ra ku aka Tiholo ta Mfumo emisaveni hinkwayo. Hi ndlela yo karhi, hinkwerhu ka hina hi ni lunghelo ro hlanganyela eka ntirho lowu. Sweswo hi swi endla hi ku humesa minyikelo leyi hi nga yi kotaka leswaku hi seketela ku akiwa ka tindhawu leti engetelekeke to gandzela eka tona emisaveni hinkwayo. Vamakwerhu vo tala va pfuneta ni hi switirho swa vona kun’we ni nkarhi, vuswikoti ni vutshila bya vona entirhweni lowu. Lunghiselelo leri hinkwaro ri humelela hikwalaho ka nkongomiso, nseketelo ni mikateko leyi fuweke ya Yehovha ehenhla ka matshalatshala ya hina ya vun’we.—Ps. 127:1.
3 Marhavi yo tala ma landzele ntila lowu eku sunguleni a wu simekeriwe ku pfuna mavandlha ya le United States. ETiholweni ta Mfumo ematikweni yo tala, ku ni bokisi leri vahuweleri va hoxaka eka rona minyikelo ya Nkwama wa Tiholo ta Mfumo. Le United States, Vutirheli Bya Hina Bya Mfumo bya March 1997 byi tivise ku lulamisiwa ka tsima leri. Byi te: “Ku sukela loko ku simekiwe Nkwama wa Sosayiti wa Tiholo ta Mfumo hi 1983, vamakwerhu va nyikele hi malwandla, xisweswo swa koteka ku lomba mali ya ku aka Tiholo ta Mfumo. Ana se mavandlha ya kwalomu ka 2 700 etikweni leri ma vuyeriwile hikwalaho ka lunghiselelo leri. Mavandlha yo tala a ma nga ta swi kota ku aka Tiholo ta Mfumo letintshwa kumbe ku pfuxeta leti lavaka ku pfuxetiwa. Sweswi ku ni xilaveko xa xihatla xo tirhisa yin’wana ya minyikelo leyi leswaku yi lombiwa mavandlha ya le matikweni lama nga evuswetini. Ku hambeta ka n’wina mi seketela lunghiselelo leri ka tlangeriwa swinene hi Sosayiti ni hi mavandlha lama vuyeriwaka hi minyikelo ya n’wina.”
4 Xitiviso xexo xi tirhe tanihi xirhambo xa ku hlanganyela etsimeni ra xihatla ra ku akiwa ka Tiholo ta Mfumo. Nkwama lowu wa Tiholo ta Mfumo a wu ta ndlandlamuxiwa leswaku wu pfuneta ni le ka swilaveko swa vamakwerhu va matiko man’wana, kambe mali ya kona a yi ta hambeta yi lombiwa mavandlha ya tiko ra United States leswaku ma aka Tiholo ta Mfumo. Xihloko lexi landzeleke enkandziyisweni wa Vutirheli Bya Hina Bya Mfumo bya August 1997 bya United States xi te: “Ku ni xilaveko lexikulu xa ku akiwa ka Tiholo ta Mfumo emisaveni hinkwayo. Hi lembe ra ntirho leri hundzeke ntsena, ku simekiwe mavandlha lamantshwa ya 3 288. Yo tala ya mavandlha wolawo ma le Afrika, Asiya, Amerika Xikarhi na Amerika Dzonga ni le Yuropa Vuxa.”
5 Xana ku ve ni vuyelo byihi ku sukela hi nkarhi wolowo? Buku Ya Lembe Ya 2001 yi te: “Hikwalaho ka lunghiselelo leri, se ku hetiwe Tiholo ta Mfumo ta 453 ematikweni ya 30, kasi tin’wana ta 727 ti le ku akiweni. Ku kandziyisiwe leswaku ku va ni tipulani ta Tiholo ta Mfumo leti fambisanaka ni ndhawu ya kona etikweni rin’wana ni rin’wana. Le Kenya ku tirhisiwa ribye leri kovotliweke; le Togo swi tolovelekile ku tirhisa switina; kasi le Cameroon ku toloveleke switina leswi endliweke hi khonkhriti ivi endzhaku swi phamiwa. Hi ndlela leyi, vamakwerhu va kwalaho va kota ku hatla va va ni vutshila lebyi lavekaka leswaku va endla mintirho ya nkoka etikweni ra rikwavo.”
6 Vumbhoni bya leswaku Yehovha wa ri katekisa tsima leri byi nga voniwa etikweni-nkulu ra Afrika. Loko u languta swifaniso swa Tiholo tin’wana ta Mfumo leti akiweke, anakanya hi vuyelo lebyi ku akiwa ka tona ku veke na byona entirhweni wa Timbhoni ta Yehovha! Leswi swi tano etimhakeni tinharhu to hlawuleka—vun’we bya vamakwerhu emisaveni hinkwayo, ndlela leyi vanhu va ndhawu va khumbekaka ha yona ni ku andza ka nhlayo ya vanhu lava vaka kona eminhlanganweni ya vandlha. Hambiloko xiengetelo lexi xi vulavula ngopfu hi Tiholo ta Mfumo leti akiweke eAfrika, minkandziyiso leyi landzelaka ya Vutirheli Bya Hina Bya Mfumo yi ta kombisa ndlela leyi tsima ra ku akiwa ka Tiholo ta Mfumo ri yaka emahlweni ha yona ematikweni man’wana ya misava.
[Swifaniso leswi nga eka tluka 3]
RIPHABLIKI RA AFRIKA XIKARHI
Bimbo, Bangui
Begoua, Bangui
[Swifaniso leswi nga eka tluka 4]
Ukonga, Tanzania
[Xifaniso lexi nga eka tluka 4]
Accra, Ghana
[Xifaniso lexi nga eka tluka 4]
Salala, Liberia
[Xifaniso lexi nga eka tluka 4]
Karoi, Zimbabwe
[Swifaniso leswi nga eka tluka 4, 5]
Allada, Benin—Holo ya Mfumo ya khale
Allada, Benin—Holo ya Mfumo leyintshwa
[Xifaniso lexi nga eka tluka 5]
Kpeme, Togo
[Xifaniso lexi nga eka tluka 5]
Sokodé, Togo
[Xifaniso lexi nga eka tluka 4, 5]
Fidjrosse, Benin
[Xifaniso lexi nga eka tluka 6]
Lyenga, Zambia—Holo ya Mfumo ya khale
[Xifaniso lexi nga eka tluka 6]
Lyenga, Zambia—Holo ya Mfumo leyintshwa
[Xifaniso lexi nga eka tluka 6]
Kinshasa, Congo
[Xifaniso lexi nga eka tluka 6]
Musambira, Rwanda