Vatswari—Vekelani Vana Va N’wina Xikombiso Lexinene

¹ Rito ra Xikwembu ri hi byela leswaku “Tata[na] ni mana wa la lulameke [va] ta ṭaka ngopfu.” (Swiv. 23:24, 25) Mayana mikateko leyi kumiwaka hi vatswari lava vekeleke vana va vona xikombiso lexinene! Xirho xin’wana xa Komiti ya Rhavi xi vule leswi hi vatswari va xona: “Ntiyiso a wu ri vutomi bya vona, na mina a ndzi lava ku wu endla vutomi bya mina.” Xana vana va fanele va dyondza yini eka vatswari va vona?

² Mikhuva Leyinene Ni Xichavo Lexikulu: I vutihlamuleri bya vatswari ku dyondzisa vana va vona mikhuva leyinene. Mikhuva leyinene ya dyondziwa, ku nga ri hi ku leteriwa hi nomu ntsena, kambe hi ku vona ni ku tekelela leswi van’wana va swi endlaka. Hikwalaho, hi yihi mikhuva leyi wena u nga na yona? Xana vana va wena va tshama va ku twa u vula marito lawa, “ndzi kombela u ndzi khomela,” “ndza kombela,” ni ku vula u ku “ndza nkhensa”? Endyangwini wa ka n’wina, xana mi kombisana xichavo lexikulu? Xana wa va yingisela van’wana loko va vulavula? Xana wa yingisela loko vana va wena va vulavula na wena? Xana ma yi kombisa mikhuva leyi loko mi ri eHolweni ya Mfumo ni loko mi ri ekaya?

³ Ku Tiya eMoyeni Ni Ku Tirha Hi Ku Hiseka: Makwerhu un’wana la heteke malembe ya 50 a ri entirhweni wa nkarhi hinkwawo u ri: “Manana na tatana a va ri swikombiso leswinene hi ku tlangela ka vona minhlangano ni hi ku hiseka ka vona evutirhelini.” Xana u va kombisa njhani vana va wena leswaku wa byi khathalela vumoya bya lava nga endyangwini wa wena? Xana mi kambisisa kun’we ndzimana ya siku? Xana mi na yona dyondzo ya ndyangu ya nkarhi ni nkarhi? Xana vana va wena va ku vona u hlaya Bibele ni tibuku ta Sosayiti? Loko u khongela, xana vana va wena va twa yini? Xana ma tiphina hi ku dya mabulo ya moya lama akaka ni vana va wena, mi burisana hi timhaka letinene mayelana ni ntiyiso ni vandlha ra ka n’wina? Xana ma swi hisekela ku va kona eminhlanganweni hinkwayo ni ku hlanganyela evutirhelini bya nsimu tanihi ndyangu?

⁴ Vatswari, anakanyani hi xikombiso lexi mi xi vekelaka vana va n’wina. Va vekeleni xikombiso lexinene, va ta xi tekelela vutomi bya vona hinkwabyo. Nsati wa mulanguteri la famba-fambaka, loyi sweswi a nga ni malembe ya kwalomu ka 70, u te: “Ni sweswi ndza ha vuyeriwa hi xikombiso lexinene xa vatswari va mina lava nga Vakreste. Hi mbilu ya mina hinkwayo, ndzi khongelela leswaku ndzi kombisa ku tlangela ka mina ngopfu, ndzhaka leyi va ndzi siyeleke yona hi ku yi tirhisa kahle enkarhini lowu taka.”