Mikhuva Leyinene—Yi Hlawulekisa Vanhu Lava Chavaka Xikwembu

¹ Mikhuva leyinene ya kala namuntlha. Ha yini swi ri tano? Hikuva vanhu va khomeke ngopfu lerova a va ha ehleketi hi marito ya ku xixima, yo tanihi ku “Ndza kombela,” “Ndza nkhensa,” kumbe “Ndzi rivalele.” Rito ra Xikwembu ri ku boxe ka ha ri emahlweni ku onhaka ka mikhuva leyinene emasikwini ya makumu, loko ri ku vanhu ‘va ta va lava tirhandzaka, lava titlakusaka, lava titivaka, lava nga nkhensiki, lava nga riki na xinakulobye xa ntumbuluko, lava nga tikhomiki, lava nga rhandziki vunene ni lava omeke tinhloko.’ (2 Tim. 3:1-4) Mikhuva leyi hinkwayo yi bihile. Tanihi vanhu lava chavaka Xikwembu, Vakreste va fanele va tivonela leswaku va nga tekeleli misava leyi nga va xiximiki vanhu van’wana.

² I Yini Mikhuva Leyinene? Mikhuva leyinene yi nga hlamuseriwa tanihi langutelo lerinene hi mintlhaveko ya van’wana ni ku kota ku hanya ni van’wana hi ku rhula. Mikhuva leyinene yi fambisana ni ku anakanyela, mahanyelo lamanene, tintswalo, ku titsongahata ni vuxiyaxiya. Mikhuva leyi yi sekeriwe eka ku rhandza Xikwembu ni muakelani. (Luka 10:27) A yi koxi mali, kambe i ya nkoka eku antswiseni ka vuxaka bya hina ni van’wana.

³ Yesu Kreste u veke xikombiso lexi hetisekeke. Minkarhi hinkwayo a a hanya hi Nawu-nsinya lowu nge: “Leswi mi lavaka vanhu va swi endla eka n’wina, swi endleni eka vona hilaha ku fanaka.” (Luka 6:31) Xana a hi wu tlangeli nkhathalelo ni rirhandzu leswi Yesu a swi kombiseke loko a tirhisana ni vadyondzisiwa vakwe? (Mat. 11:28-30) Mikhuva yakwe leyinene a yi nga humi eka milawu leyi tsariweke etibukwini leti hlamuselaka mahanyelo. A yi huma embilwini leyi tshembekeke ni leyi nga ni tintswalo. Hi fanele hi ringeta ku tekelela xikombiso xakwe lexinene.

⁴ Hi rini laha Vakreste va faneleke va kombisa mikhuva leyinene? Xana va fanele ku yi kombisa eka swiendlakalo swo hlawuleka loko va lava ku tiendlela vito lerinene? Xana va fanele ku yi kombisa loko va ringeta ku khutaza vanhu van’wana? Doo! Hi fanele ku kombisa mikhuva leyinene minkarhi hinkwayo. Hi tihi tindlela tin’wana leti hi faneleke hi khathala ngopfu ha tona emhakeni leyi loko hi hlangane ni van’wana evandlheni?

⁵ EHolweni Ya Mfumo: Holo ya Mfumo i ndhawu leyi hi gandzelaka eka yona. Hi rhambiwe hi Yehovha Xikwembu. Hi ndlela yoleyo hi vaendzi. (Ps. 15:1) Xana hi vaendzi lava nga xikombiso lexinene loko hi ta eHolweni ya Mfumo? Xana hi ambala ni ku tisasekisa hi ndlela leyi faneleke? Hakunene hi fanele hi papalata ku ambala onge hi ya eku hungaseni kumbe hi hundzeleta. Ku nga khathariseki leswaku vanhu va Yehovha va le mintsombanweni kumbe eminhlanganweni ya vandlha ya vhiki ni vhiki, va xiyiwa hi mikhuva ya vona leyinene leyi fanelaka lava vulaka leswaku va chava Xikwembu. (1 Tim. 2:9, 10) Xisweswo hi kombisa ku anakanyela ni ku xixima loku faneleke eka Murhambi wa hina wa le matilweni ni le ka vaendzi van’wana lava rhambiweke.

⁶ Ndlela yin’wana leyi hi kombisaka mikhuva leyinene ha yona malunghana ni minhlangano i ku fika hi nkarhi. Ku vula ntiyiso, sweswo a swi olovi minkarhi hinkwayo. Van’wana va nga ha va va tshama ekule kumbe va ri ni mindyangu leyikulu leyi va faneleke va yi pfuna leswaku yi lungheka. Kambe swi xiyiwile leswaku emavandlheni man’wana vahuweleri va nga ri vangani va ni mukhuva wa ku fika endzhaku ko yimbeleriwa ka risimu ro pfula ni xikhongelo xa kona. Mhaka leyi ya vilerisa swinene! Hi fanele hi tsundzuka leswaku mikhuva leyinene yi fambisana ni ku khathala hi mintlhaveko ya van’wana. Yehovha, Murhambi wa hina la nga ni tintswalo, u lunghiselele minkhuvo leyi ya moya leswaku hi ta vuyeriwa. Hi kombisa ku tlangela ni ku khathala hi mintlhaveko yakwe hi ku fika hi nkarhi. Ku engetela kwalaho, ku hlwela ku fika eminhlanganweni swa kavanyeta swi tlhela swi kombisa ku nga va xiximi lava fikeke hi nkarhi.

⁷ Loko hi ri eminhlanganweni, xana ha khathala hi vanhu lavantshwa lava vaka kona? Ku va amukela ku fambisana ni ku va ni mikhuva leyinene. (Mat. 5:47; Rhom. 15:7) Ku xeweta hi musa, ku qhavula hi ntsako, ku n’wayitela hi tintswalo—hambileswi hinkwaswo swi nga swilo switsongo, kambe swi hoxa xandla eka leswi swi hi hlawulekisaka tanihi Vakreste va ntiyiso. (Yoh. 13:35) Endzhaku ka loko wanuna un’wana a te eHolweni ya Mfumo ro sungula, u te: “Hi siku rin’we ndzi hlangane ni vanhu lava nga ni rirhandzu ra xiviri, lava ndzi nga va tiviki nikatsongo ku tlula lava ndzi hlanganeke na vona ekerekeni leyi ndzi kuriseriweke eka yona. A swi ri erivaleni leswaku ndzi kume ntiyiso.” Hikwalaho ka sweswo, u hundzule mahanyelo yakwe, naswona endzhaku ka tin’hweti ta nkombo, u khuvuriwile. Ina, mikhuva leyinene yi pfuna eka swo tala!

⁸ Loko hi ri ni mikhuva leyinene eka vanhu vambe lava hi hlanganaka na vona, xana a hi fanelanga hi yi kombisa “ngopfu-ngopfu [eka] lava nga swin’we na hina eripfumelweni”? (Gal. 6:10) Nsinya lowu wa nawu wa tirha: “U fanele u komba xichavo eka munhu la kuleke.” (Lev. 19:32) Hi nga tshuki hi honisa vanhu vo tano nikatsongo eminhlanganweni ya hina.

⁹ Ku Nyikela Nyingiso Lowukulu: Hi nkarhi wa minhlangano ya vandlha, Vakreste lava nga vatirheli va Xikwembu va vulavula hi ndlela leyi hi kotaka ku kuma nyiko yo karhi ya moya leyi nga ta hi aka. (Rhom. 1:11) Hakunene swi ta kombisa ku va ni mikhuva leyo biha loko hi etlela, hi cakunya chepisi hi ndlela leyi kavanyetaka van’wana, hi hambeta hi khwenuta loyi a tshameke ekusuhi na hina, hi ya exihambukelweni swi nga fanelanga, hi hlaya tibuku tin’wana leti nga fambisaniki ni leswi dyondziwaka kumbe hi endla swin’wana hi nkarhi wa nhlangano. Vakulu va fanele va va xikombiso emhakeni leyi. Mikhuva leyinene ya Vakreste yi ta endla leswaku hi xixima xivulavuri ni rungula ra xona leri sekeriweke eBibeleni hi ku rhiya ndleve.

¹⁰ Ku engetela eku anakanyeleni xivulavuri ni vayingiseri, hi fanele hi tima swiciyoti ni tiselfoni leswaku ti nga kavanyeti minhlangano ya hina.

¹¹ Mikhuva Leyinene Ni Vana: Vatswari va fanele va tshama va xalamukele ndlela leyi vana va vona va tikhomaka ha yona. Loko n’wana a sungula ku rila kumbe a karhata hi nkarhi wa nhlangano naswona leswi swi kavanyeta van’wana, i swinene ku huma ni n’wana hi ku hatlisa hilaha swi nga kotekaka, leswaku u ya n’wi miyeta. Leswi swi nga ha nonon’hwa minkarhi yin’wana, kambe tsundzuka leswaku sweswo swi kombisa leswaku wa va twela vanhu van’wana. Hakanyingi vatswari lava nga ni vana lava swi nga endlekaka leswaku va nga lawuleki, va hlawula ku tshamela endzhaku eholweni leswaku va nga kavanyeti vanhu vo tala loko va fanele ku huma hi nkarhi wa nhlangano. Ina, vayingiseri lavan’wana hinkwavo va nga kombisa ku anakanyela mindyangu leyi hi ku nga tshami eswitshan’wini swa le ndzhaku, leswaku yi ta tshama eka swona.

¹² Vatswari va fanele va xalamukela ku tikhoma ka vana va vona loko minhlangano yi nga si sungula ni loko yi herile. Vana a va fanelanga va tsutsuma-tsutsuma endzeni ka holo, hikuva sweswo swi nga vavisa van’wana. Ku tsutsuma-tsutsuma erivaleni ra Holo ya Mfumo na swona swi nga ha va ni khombo, ngopfu-ngopfu nimadyambu loko ku dzwiharile. Ku vulavulela ehenhla loko hi ri ehandle ka holo swi nga ha kavanyeta vaakelani ni ku susa xindzhuti xa vugandzeri bya hina. Vatswari lava endlaka matshalatshala lamakulu yo lawula vana va vona endzeni ni le handle ka Holo ya Mfumo va bumabumeriwa hikuva sweswo swi engetela ntsako wa hina wo tshama swin’we hi vun’we.—Ps. 133:1.

¹³ EDyondzweni Ya Buku Ya Vandlha: Hi tlangela malwandla ya vamakwerhu lava pfulaka makaya ya vona leswaku ku khomeriwa minhlangano ya vandlha eka wona. Loko hi ya kona, hi fanele ku kombisa xichavo ni ku anakanyela nhundzu ya vona. Hi nga si nghena endlwini, hi fanele hi sula tintanghu ta hina leswaku hi nga thyakisi ehansi kumbe mete wa vona. Vatswari va fanele va lawula vana va vona, va tiyiseka leswaku va tshama ekamareni leri ku khomeriwaka dyondzo ya buku eka rona. Hambileswi ntlawa wolowo wu nga vaka wu ri wutsongo naswona hi titwa hi ntshunxekile, hi nga ntshunxeki ku tlula mpimo emakaya ya van’wana. Mutswari la nga ni n’wana lontsongo u fanele a n’wi heleketa loko a lava ku ya exihambukelweni. Ku tlula kwalaho, tanihi leswi dyondzo ya buku ku nga nhlangano wa vandlha, hi fanele hi ambala ku fana niloko hi ya eHolweni ya Mfumo.

¹⁴ Mikhuva Leyinene I Ya Nkoka: Ku hanya hi mikhuva leyinene ya Vukreste a ku yimeli vutirheli bya hina kahle ntsena, kambe ku tlhela ku kondletela vuxaka lebyinene ni vanhu van’wana. (2 Kor. 6:3, 4, 6) Leswi hi nga vagandzeri va Xikwembu lexi tsakeke, swi fanele swi hi olovela ku n’wayitela, ku anakanyela van’wana, hambi ku ri ku endla swilo leswi nga nyawuriki swa tintswalo leswi tiselaka van’wana ntsako. Mikhuva leyi yinene yi ta tisa ku dzuneka emahanyelweni ya hina tanihi leswi hi nga vanhu lava chavaka Xikwembu.