Ha Tiviwa Hi Ku Chumayela Ka Hina

¹ Vanhu vo tala va ni xivutiso lexi nge, “I yini lexi endlaka Timbhoni ta Yehovha ti hambana ni vukhongeri byin’wana?” Xana wena u nga hlamurisa ku yini? U nga hlamusela tidyondzo tin’wana ta hina leti sekeriweke eBibeleni. Kambe, xana u tshame u anakanyisisa mayelana ni ndlela leyi vutirheli bya hina bya nsimu byi hi hambanisaka ha yona ni vukhongeri byin’wana?—Mat. 24:14; 28:19, 20.

² Namuntlha, a hi vangani vanhu va vukhongeri lava swi tsakelaka ku vulavula ni van’wana hi tidyondzo ta vukhongeri bya vona. Va nga ha vona swi ringene ku yingisa milawu ya Khezari, ku va ni mahanyelo lamanene kumbe ku endlela vanhu van’wana leswinene. Hambiswiritano, va tivona va nga ri na byona vutihlamuleri bya ku pfuna van’wana va dyondza leswi Bibele yi swi vulaka leswaku va ta ponisiwa. Xana hi hambane njhani na vona?

³ Vutirheli bya hina lebyi hi byi endlaka hi ku hiseka, byi hambane ngopfu ni mintirho ya vukhongeri byin’wana. Emalembeni lama tlulaka 100, Timbhoni ta manguva lawa, ti chumayele mahungu lamanene hi ku hiseka ku ya fika emakumu ya misava hi ku tekelela Vakreste vo sungula. Xikongomelo xa hina i ku pfuna vanhu vo tala hilaha swi nga kotekaka hakona leswaku va hanya hi ku pfumelelana ni ku rhandza ka Xikwembu.—1 Tim. 2:4; 2 Pet. 3:9.

⁴ Hi Yihi Ndhuma Leyi U Nga Na Yona? Xana u dume hi ku va muchumayeri wa Rito ra Xikwembu la hisekaka? (Mint. 17:2, 3; 18:25) Hikwalaho ka ntirho wa wena wo chumayela, xana vaakelani va wena swa va olovela ku vona ku hambana ka vukhongeri bya vona ni bya wena? Xana u tiviwa tanihi munhu la hisekelaka ku burisana ni van’wana hi ntshembo wa wena? Xana u hlanganyela nkarhi ni nkarhi eku chumayeleni ka mahungu lamanene evutirhelini? Tsundzuka leswaku a hi tihambanisi ni van’wana hi vito ra vukhongeri bya hina ntsena kambe ni hi ku endla swilo hi ku pfumelelana ni nhlamuselo ya vito rero—ku chumayela hi Yehovha.—Esa. 43:10.

⁵ Ku rhandza ka hina Xikwembu ni muakelani swi hi susumetela ku endla ntirho wo chumayela. (Mat. 22:37-39) Hikwalaho, ku fana na Yesu kun’we ni vaapostola, hi fanele hi tirhisa nkarhi wun’wana ni wun’wana leswaku hi byela van’wana rungula ra Mfumo. A hi hambeteni hi chumayela mahungu lamanene hi ku hiseka eka lava va swi lavaka ku yingisela. Loko hi endla tano, hi ta pfuna vanhu va timbilu letinene leswaku va “vona ku hambana exikarhi ka [loyi] . . . a tirhelaka Xikwembu ni loyi a nga xi tirheliki.”—Mal. 3:18.