I Vamani Lava Nga Tsakelaka Dyondzo Ya Bibele?
1 Muprofeta Amosi u vule leswaku ku ta wa ndlala etikweni ra Israyele, “ndlala, ku nga ri ya xinkwa, ni torha, ku nga ri ra mati, kambe ra ku twa marito ya Yehovha.” (Amo. 8:11) Leswaku ku pfuniwa lava nga ni ndlala ni torha emoyeni, nhlengeletano ya Yehovha yi hangalasa tibuku to tala ta Bibele emisaveni hinkwayo.
2 Ku fikela sweswi, se hi kandziyise 70 wa timiliyoni ta buku leyi nge Vutivi ni 91 wa timiliyoni ta broxara leyi nge Leswi Xi Swi Languteleke. Loko hi dyondzisa vanhu ntiyiso, hi tsakisiwa hi ku twisiseka ka tibuku leti ni ndlela leyi ti pfunaka ha yona. Hambiswiritano, vanhu va ntsandza-vahlayi lava kumeke tibuku ta hina a va dyondzi na hina Bibele. Xana hi fanele hi endla yini mayelana ni mhaka leyi?
3 U Nga Ha Sungula Dyondzo Hi Buku Yin’wana Ni Yin’wana Leyi U Yi Fambiseke! Anakanya hi ntokoto wa muhuweleri loyi hi siku ro sungula a byeleke wansati un’wana leswaku u lava ku n’wi fambisela dyondzo. Wansati loyi u tsakele ku fambiseriwa dyondzo hi nkarhi wolowo. Hi ku famba ka nkarhi wansati loyi u byele muhuweleri a ku: “Hi wena munhu wo sungula ku ndzi byela leswaku u lava ku dyondza Bibele na mina.” Ensin’wini ya ka n’wina, i vanhu vangani lava ana se va nga ni tibuku ta hina lava nga vulaka leswi fanaka? U nga endla maendzo yo vuyela ni ku sungula dyondzo ya le kaya ya Bibele, kun’wana ni kun’wana laha u fambiseke buku kona.
4 Tanihi leswi hi hlanganaka ni vanhu lava ana se va nga ni tibuku ta hina, xana hi nga va khutaza njhani leswaku va tsakela ku dyondza rungula leri nga etibukwini ta hina? Mbhoni yin’wana yi byele n’wini wa muti hi ku kongoma leswaku loko a ri ni swivutiso swo karhi mayelana ni Bibele a nga vutisa, kambe n’wini wa muti u te, “A ndzi na xivutiso.” Makwerhu loyi u vule leswi eka n’wini wa muti, “U fanele u ri na swona swivutiso.” Wansati loyi u vutise swivutiso leswi a a ri na swona, kutani dyondzo yi sunguriwile. Ha yini u nga vutisi n’wini wa muti loko a swi tsakela ku tiva langutelo ra Bibele mayelana ni xivutiso kumbe mhaka leyi yi n’wi karhataka? Lunghekela ku vutisa xivutiso lexi nga ta n’wi endla a anakanya loko a nga tiyiseki leswaku a nga vutisa yini. Mabulo yo tano ma nga ha pfula ndlela ya ku sungula dyondzo ya nkarhi ni nkarhi ya mintiyiso ya xisekelo ya Bibele.
5 Ku fambisa tidyondzo ta Bibele hi xona xikongomelo lexikulu xa vutirheli bya hina. Tanihi leswi hi nga swi tiviki leswaku i mani la nga ta tsakela ku dyondza na hina, u nga kanakani ku byela un’wana ni un’wana loyi u hlanganaka na yena leswaku u tsakela ku n’wi fambisela dyondzo. Mhaka leyi yi byele Yehovha hi xikhongelo, naswona endla ntirho wa wena hi ku pfumelelana ni swikhongelo swa wena. Ku nga ri khale swi nga ha endleka munhu loyi u nga ta n’wi byela leswaku u lava ku n’wi fambisela dyondzo a swi tsakela!—1 Yoh. 5:14, 15.