Hi Fanele Hi Va Vadyondzisi, Hi Nga Vi Vachumayeri Ntsena
1 Swi xiyiwile leswaku “Timbhoni ta Yehovha ti yi hlanganisile misava hi ku nyikela ka tona vumbhoni.” Xana leswi swi endlisiwe ku yini? Ku nga ri hi matimba ya munhu, kambe hi moya wa Xikwembu lowu tirhaka eka malandza ya xona loko ma ri karhi ma tirhisa malunghiselelo yo hambana-hambana leswaku ma endla ntirho wo chumayela ni ku dyondzisa.—Zak. 4:6; Mint. 1:8.
2 Ku tirhisa tibuku i ndlela ya hina yo chumayela leyi humelelaka. Hi malembe layo tala, ku kandziyisiwe tibuku, swibukwana, tibroxara, timagazini ni swiphephana swo tala leswi hangalasiweke hi Timbhoni ta Yehovha leswaku swi ta pfuna ku twarisa mahungu lamanene ya Mfumo. Xiviko lexi nga eka 1997 Yearbook xi kombisa leswaku ku humesiwa ka tibuku ku tshove rhekhodo. Namuntlha, ku kandziyisiwe tikopi ta New World Translation to tlula 91 wa timiliyoni. Hi lembe rin’we ntsena nhlayo ya timagazini ta Xihondzo xo Rindza ni Xalamuka! leti kandziyisiweke eUnited States yi andze hi 7,1 wa tiphesente. Le Jarimani, ku humesiwa ka timagazini ku tlakuke hi 35 wa tiphesente. Ku tlula n’we-xa-nharhu xa timagazini leti kandziyisiweke kona a ti ri ta nsimu ya Xirhaxiya.
3 Ha yini ku laveka tibuku to tarisa xileswi? Emisaveni hinkwayo, ku vile ni n’wangulo lowukulu wa xikhutazo lexi hi nyikiweke xona xa leswaku hi nyikela vumbhoni hinkwako-nkwako lomu vanhu va kumekaka kona. Tanihi leswi vo tala va hina hi ndlandlamuxaka ntirho wa hina wa ku nyikela vumbhoni—etindhawini ta mani na mani, eswitarateni ni le nsin’wini ya mabindzu—tibuku to tala swinene ti fambiseriwa vanhu lava kombisaka ku tsakela. Vunyingi bya vanhu lava a va si tshama va twa mahungu lamanene ya Mfumo. Leswaku ku ta fikeleriwa xilaveko lexi, mavandlha ma ni tibuku to hambana-hambana ta ku ti tirhisa eka swiyenge swo hambana-hambana swa vutirheli.
4 Hi Yihi Pakani Ya Hina Eku Hangalaseni Ka Tibuku? Pakani ya hina a hi ku fambisa tibuku ntsena. Ntirho wa ku endla vadyondzisiwa wu ni swiyenge swimbirhi—ku chumayela ni ku dyondzisa. Xo sungula, hi ni lunghelo ro chumayela mahungu lamanene ya Mfumo, hi endla vanhu va swi vona leswaku i ntshembo wu ri woxe wa vanhu. (Mt. 10:7; 24:14) Tibuku ta hina leti sekeriweke eBibeleni i switirho leswi nga heleriwiki hi nkarhi ni leswi humelelaka eku endleni ka leswaku van’wana va tsakela ni ku amukela rungula ra Mfumo.
5 Xa vumbirhi, loko hi ta endla vadyondzisiwa, hi fanele hi dyondzisa hinkwaswo leswi Yesu a hi leriseke swona. (Mt. 11:1; 28:19, 20) Nakambe, tibuku ti ni xiphemu xa nkoka eku dzikiseni ka hina ntiyiso etimbilwini ta swichudeni, hi swi pfuna ku va vadyondzisiwa.
6 Lava amukelaka tibuku va nga ha va ‘vatwi va rito,’ kambe a hi kanyingi va nga vaka vaendli va rona loko va nga pfuniwi hi munhu. (Yak. 1:22-25) A va talanga lava nga vaka vadyondzisiwa handle ka loko un’wana a va kongomisa. (Mint. 8:30, 31) Va lava mudyondzisi la nga ta va pfuna leswaku va tivonela hi voxe ntiyiso lowu nga eMatsalweni. (Mint. 17:2, 3) Pakani ya hina i ku va pfuna va endla nhluvuko ku fikela laha va nga ta tinyiketela ni ku khuvuriwa, naswona hi va letela leswaku va fanelekela ku dyondzisa van’wana.—2 Tim. 2:2.
7 Ku Laveka Vadyondzisi Vo Tala: Loko hi chumayela, hi va hi ri eku twariseni ka mahungu lamanene erivaleni. Hambiswiritano, ku dyondzisa swi katsa ku letela munhu un’wana hakatsongo-tsongo. Hambileswi ku chumayela ku endlaka van’wana va twa rungula ra Mfumo, ku dyondzisa ku pfuna munhu leswaku a amukela mahungu lamanene ni ku teka goza. (Lk. 8:15) Mudyondzisi a ngo vulavula ntsena; wa hlamusela, a veka mhaka erivaleni, a nyikela swivangelo ni ku khorwisa.
8 Hinkwerhu ka hina hi fanele hi va vadyondzisi, hi nga vi vachumayeri ntsena. (Hev. 5:12a) Ku hangalasa tibuku i xiyenge xa nkoka xa ntirho wa hina, kambe leswaku hi fikelela xikongomelo xa vumbirhi xa vutirheli bya hina swi titshege hi leswi hi swi endlaka tanihi vadyondzisi. Hambileswi hi nga tsakisiwaka hi ku fambisa tibuku, leswaku hi hetisisa vutirheli bya hina hi xitalo, a hi fanelanga hi languta ku fambisa ka hina tibuku tanihi makumu ya ntirho. (2 Tim. 4:5) Ku fambisa tibuku i ndlela leyi humelelaka ya ku pfula nyangwa wa malunghelo yo dyondzisa ntiyiso eka van’wana.
9 Endla Maendzo Yo Vuyela Leswaku U Ta Sungula Tidyondzo Ta Bibele: Swi nga endleka hinkwerhu ka hina hi fambise tibuku, tibroxara ni timagazini to tala, hi va ni maendzo yo tala yo vuyela. Hi fanele hi va ni xiyimiso nkarhi na nkarhi leswaku hi ya hlakulela ku tsakela. Xikongomelo xa hina loko hi tlhelela a hi ku fambisa tibuku to tala ntsena kambe i ku khutaza vanhu leswaku va hlaya ni ku vuyeriwa eka leswi ana se va nga na swona. Hina hi hexe a hi ta va hi endle nhluvuko wo tanihi kwihi loko a ku nga ri un’wana la tlheleleke nkarhi na nkarhi leswaku a hi pfuna ku kuma vutivi?—Yoh. 17:3.
10 Tlhelela eka hinkwavo lava kombiseke ku tsakela hi xikongomelo xo sungula dyondzo ya Bibele hi ku tirhisa broxara leyi nge I Yini Leswi Xikwembu Xi Swi Languteleke Eka Hina? kumbe buku leyi nge Vutivi Lebyi Yisaka eVuton’wini Lebyi Nga Heriki. Tibuku letimbirhi ti hlamusela rungula ra Mfumo hi ndlela leyi twisisekaka hi ku olova. Broxara leyi nge Leswi Xi Swi Languteleke yi dyondzisa kahle, yi hlamusela tidyondzo ta xisekelo ta Bibele. Buku leyi nge Vutivi yi pfuna munhu leswaku a dyondzisa ntiyiso hi vuenti, kambe hi ndlela yo olova, leyi twisisekaka naswona hi ku komisa.
11 Nongonoko wa ku dyondzisa lowu olovisiweke, lowu hlamuseriweke eka xiengetelo xa Vutirheli Bya Hina Bya Mfumo bya June 1996, wu endla leswaku mudyondzisi swi n’wi olovela ku letela ni ku olovisela xichudeni ku dyondza. Tshama u ri ni xiengetelo lexi leswaku u ta pfuxeta tindlela to dyondza ni maendlelo lama tikombiseke ma pfuna. Swin’wana swa swiringanyeto leswi xi swi nyikelaka swi katsa ku rhandza xichudeni hi mbilu hinkwayo, leswaku i rungula ro tanihi kwihi leri faneleke ri hlanganisiwa eka xiyenge xin’we, ndlela yo hlamula swivutiso leswi nga riki kona emhakeni, ndlela leyi mudyondzisi ni xichudeni va nga lunghiselelaka ha yona ka ha ri emahlweni ni ndlela yo kongomisa swichudeni enhlengeletanweni ya Yehovha. Hi ku landzela swiringanyeto leswi, vo tala va hina, ku katsa ni lavantshwa, hi nga kota ku fambisa tidyondzo leti endlaka nhluvuko.
12 Swiviko Swa Ku Humelela Lokunene Leswi Humaka eNsin’wini: Broxara leyi nge Leswi Xi Swi Languteleke ni buku leyi nge Vutivi ta pfuna swinene eku hatlisiseni ka ntirho wa ku endla vadyondzisiwa. Endzhaku ka loko a kume broxara leyi nge Leswi Xi Swi Languteleke, makwerhu wa xinuna wa le Bolivia u sungule dyondzo ni wanuna un’wana xikan’we-kan’we. Endzhaku ka tin’hweti ta mune entsombanweni wa muganga, xichudeni lexi a xi ri un’wana wa vanhu lava tsakeke lava yaka eku khuvuriweni!
13 Vo tala va susumeteriwa ku nyiketela vutomi bya vona eka Yehovha loko va hetile ku dyondza buku leyi nge Vutivi. Evandlheni rin’wana ra le Angola, nhlayo ya tidyondzo ta Bibele leti fambisiwaka hi vahuweleri yi suke eka 190 yi ya eka 260 naswona nhlayo ya lava vaka kona eminhlanganweni yi suke eka 180 yi ya eka 360 hi tin’hweti ta mune ntsena endzhaku ka loko buku leyi nge Vutivi yi sungule ku tirhisiwa endhawini yoleyo. Endzhakunyana ka sweswo, a ku fanele ku simekiwa vandlha rin’wana.
14 Endzhaku ka loko a sungule dyondzo yakwe yo sungula hi ku tirhisa buku leyi nge Vutivi, makwerhu un’wana wa xinuna u vule leswaku ku yi fambisa “a swi olova loko mufambisi a vutisa swivutiso ntsena, a hlaya matsalwa lama kombisiweke ni ku tiyiseka leswaku xichudeni xa swi twisisa.” Hambileswi a a tshamela ku anakanya leswaku i vahuweleri lava fanelekaka ntsena lava nga fambisaka tidyondzo ta Bibele leti humelelaka ni leswaku yena a nge swi koti, u swi vonile leswaku a nga swi kota, ivi a ku: “Loko mina ndzi swi kota, un’wana ni un’wana a nga swi kota.”
15 Hi hetisisa ntirho wa ku endla vadyondzisiwa hi ku fambisa tidyondzo ta Bibele tanihi xiyenge xa vutirheli bya hina. Lava koteke ku hlanganyela eka xiyenge lexi xa vutirheli va eneriseka naswona va vuyeriwa ngopfu. Onge ku nga vuriwa leswi fanaka hi hina leswaku hi “twarisa Mfumo wa Xikwembu . . . [ni ku] dyondzisa ta Hosi Yesu Kriste [hi] nga chavi nchumu.”—Mint. 28:31.