Xana Wa Ri Amukela Rirhandzu Ra Kreste?
1 Loko a anakanyisisa hi vutomi bya N’wini wa yena, muapostola Yohane u tsarile: “Yesu u va rhandzile vanhu vakwe lava a va ri emisaveni, u va rhandze ku fikela emakumu.” (Yoh. 13:1) Hi nguva leyi ya Xitsundzuxo, hi anakanya ngopfu hi xikombiso lexikulu xa rirhandzu ra Kreste. Hi nga amukela rirhandzu rolero hi ku kombisa ripfumelo eka nkutsulo, hi ku hlanganyela hi ku hiseka entirhweni wo chumayela, ni hi ku tiyisela “ku fika emakumu” ku fana na Yesu.—Mat. 24:13; 28:19, 20; Yoh. 3:16.
2 Ku Amukela Rirhandzu Ra Kreste: Yesu a a hiseka swinene eka vhiki ro hetelela ra vutomi bya yena bya laha misaveni. (Mat. 21:23; 23:1; 24:3) Tanihi vatekeleri va Kreste, na hina hi susumetiwa hi rirhandzu leswaku hi ‘tikarhata hi matimba’ entirhweni wa Yehovha. (Luka 13:24) Xana u nga tirhisa malunghiselelo ya ntirho wo nyikela vumbhoni ensin’wini hi ku tirha nkarhi lowu engetelekeke hi April?
3 Nan’waka Xilalelo xa Hosi xi ta va hi Ravunharhu nimadyambu, hi April 19. I vangani lava nga ta va va ri kona eka xiendlakalo lexi xa nkoka? Sweswo ngopfu-ngopfu swi titshege hi hina. Xana se u va tsale ehansi lava u kunguhataka ku va rhamba—swichudeni swa wena swa Bibele ni van’wana lava tsakelaka, maxaka, van’wamabindzu lava u va toloveleke ni lava u nghenaka na vona xikolo? Xana se u vulavule na vona u tlhela u va rhamba? Xana u ta va tsundzuxa loko ka ha sele masiku ma nga ri mangani leswaku ku fika siku ra Xitsundzuxo? Xana va lava ku pfuniwa leswaku va va kona endhawini leyi xi nga ta khomeriwa eka yona? Vakulu na vona va rhamba un’wana ni un’wana loyi a holeke. Mhaka ya leswaku Xitsundzuxo xi ta va exikarhi ka vhiki ematshan’weni ya mahelo-vhiki a yi endli leswaku swi nga vi swa nkoka leswaku hinkwerhu hi va kona.
4 Tana U Lunghekile: I swa nkoka leswaku hi ta hi lunghekile ni ku va ni langutelo lerinene ra mianakanyo loko hi ya eXitsundzuxweni. Pawulo u tsundzuxe vapfumeri-kulobye leswaku va tsundzuka nkoka wa xiendlakalo lexi. (1 Kor. 11:20-26) Mi nga ha hlaya tindzima 13 ku ya ka 17 ta Evhangeli ya Yohane 13-17, hi nkarhi wa dyondzo ya n’wina ya ndyangu ya Bibele, ivi xirho xin’wana ni xin’wana xa ndyangu xi hlamusela leswi gandzelo ra Yesu ri vulaka swona eka xona. Mi nga rivali ku hlaya ka Bibele ka siku na siku hi vhiki ra Xitsundzuxo!
5 Rirhandzu ra hina eka Kreste i rikulu swinene, naswona a ri heli hi April 19 ntsena. Hi tiyimisele ku kombisa rirhandzu ra hina eka yena hilaha ku nga heriki! Nkhuvo wa Xitsundzuxo wa nan’waka wu ta hi pfuna ku tiyisa ku tiyimisela koloko.