Xana U Ni Tingana?

¹ A swi hi hlamarisi loko hi vona n’wana a hi hlometela a yime endzhaku ka mana wakwe kumbe tata wakwe. Tingana i ta ntumbuluko ku sukela evutsongwanini. Hambiloko vanhu va kurile, vo tala va ni tingana hi ntumbuluko. Loko tingana ti kavanyeta ku hlanganyela ka wena evutirhelini, u nga endla yini?

² Ku Langutana Ni Ku Va Ni Tingana: I swa nkoka ku nyikela nyingiso eka “munhu la nge xihundleni wa mbilu.” (1 Pet. 3:4) Tiyisa rirhandzu ra wena hi Yehovha ni muakelani. Khorwiseka hilaha ku heleleke leswaku ku hetisisisa xileriso xa ku chumayela i yin’wana ya tindlela ta ku kombisa rirhandzu ra ku tinyiketela. Vana ni lunghiselelo lerinene ra dyondzo ya munhu hi xiyexe ni ra ku va kona eminhlanganweni. Khongela minkarhi hinkwayo naswona u khongelela mpfuno wa Yehovha hi ku kongoma. Ripfumelo leri tiyeke ni ku n’wi tshemba swi ta aka ntshembo wa wena kutani swi ku nyika “xivindzi lexikulu xo vulavula rito ra Xikwembu handle ka ku chava.”—Filp. 1:14.

³ Lwana ni mintlhaveko ya ku titwa u nga faneleki. Swi tikomba onge Timotiya a a fanele ku endla tano. Pawulo u khutaze Timotiya leswaku “ku nga tshuki ku va ni munhu la byi langutelaka ehansi vuntshwa [byakwe],” a n’wi tsundzuxa leswaku “Xikwembu a xi hi nyikanga moya wa vutoya, kambe xi hi nyike moya wa matimba.” (1 Tim. 4:12; 2 Tim. 1:7) Yehovha u n’wi tirhise ngopfu Timotiya, na wena u ta ku tirhisa loko u lwela ku ya emahlweni u N’wi tshemba hi mbilu hinkwayo.—Ps. 56:11.

⁴ Ku anakanya hi tsalwa ra Bibele ro kota Matewu 10:37, swi pfune makwerhu un’wana wa xisati loyi tingana ti n’wi endleke a chava nuna wakwe loyi a a kaneta ntiyiso. Loko a ri karhi a tiyisela, vutirheli byi ye byi n’wi olovela kutani eku heteleleni, nuna wakwe, mana wakwe ni vamakwavo va xinuna va amukele ntiyiso!

⁵ Ku Lunghiselela I Swa Nkoka: U ta ya u va ni xivindzi loko u byi lunghiselela kahle vutirheli. Hlawula xingheniso xo olova ebukwini leyi nge Ku Hlamulana kumbe eka minkandziyiso ya nkarhi lowu hundzeke ya Vutirheli Bya Hina Bya Mfumo, xi nghenise kahle enhlokweni kutani u titoloveta xona. Vana ni vonelo lerinene ku ri ni ku karhateka hi swilo leswi nga vuriki nchumu. Kuma xivindzi hi ku tirha swinene ni van’wana. Tshama u ri karhi u tsundzuka leswaku vanhu vo tala lava u nga ta hlangana na vona emakaya lawa u nga ta ma endzela, na vona va ni tingana ku fana na wena. Hinkwavo va ri lava rungula ra Mfumo.

⁶ Loko u ri ni tingana, u nga heli matimba. Loko u ri karhi u lwela ku endla nhluvuko, Yehovha u ta ku pfuna leswaku u va muhuweleri la humelelaka wa mahungu lamanene. Kutani u ta kuma ntsako evutirhelini bya wena.—Swiv. 10:22.