Kunguhata Ka Ha Ri eMahlweni—U Kunguhata Yini?
1 Hinkwerhu hi pfa hi ehleketa hi ku kunguhatela vumundzuku bya hina. Lava nga ni ntshembo wa ku hanya emisaveni va langutele ku hanya hilaha ku nga heriki emisaveni leyintshwa ya Xikwembu ya ku lulama. Kambe ku ni minkucetelo leyi nga wutlaka ntshembo wolowo embilwini ya munhu. Ku laveka matshalatshala ya xiviri leswaku vutomi bya hina byi tshama byi voyamele etimhakeni ta Mfumo nileswaku hi nga hambukisiwi hi ku navela ka nyama loku ringaka.—1 Yoh. 2:15-17.
2 Misava a yi nge pfuki yi swi twisisile swilo leswi vanhu va moya va swi navelaka. (1 Kor. 2:14) Loko vanhu van’wana va ri karhi va lwela ku kuma ndhuma, matimba kumbe rifuwo, hina hi lwela ku kuma rifuwo ra moya. (Mat. 6:19-21) Loko a hi ringete ku cinca ndlela leyi hi anakanyaka ha yona leswaku yi fambisana ni vonelo ra misava hi vumundzuku, xana a hi ta va hi ti fikelerile tipakani ta hina ta moya? Phela a swi nga ta teka nkarhi wo leha leswaku swilo swa misava swi yenga timbilu ta hina. Hi nga swi sivela njhani sweswo?
3 “Ambalani Hosi Yesu Kreste”: Ndlela yin’wana ya ku vona loko vumundzuku bya hina byi titshege hi swilaveko swa Mfumo, i ku kambela leswi hi bulaka hi swona. Xana minkarhi hinkwayo hi bula hi swilo leswi vonakaka ni ku navela swilo swa misava? Loko swi ri tano, hi fanele ku xiya loko timbilu ta hina ti nga sungulanga ku tsana eka etimhakeni ta moya. Swi nga ha lava leswaku hi anakanyisisa hi ku ‘ambala Hosi Yesu Kreste ku ri ni ku kunguhatela ku navela ka nyama ka ha ri emahlweni.’—Rhom. 13:14.
4 Vantshwa va nga ‘ambala Kreste’ hi ku ri kunguhatela ka ha ri emahlweni siku leri va nga ta nghenela vutirheli bya nkarhi hinkwawo ha rona. Muntshwa loyi a a lava ku va phayona ra nkarhi hinkwawo u kulele endhawini leyi hi ntolovelo majaha a ma lwela ku va lama sirhelelekeke hi tlhelo ra timali. Hikwalaho, u nghene hi nhloko ebindzwini ku fikela laha ku ya ka yena eminhlanganweni ni ku hlanganyela evutirhelini a ko va ku hetisisa nawu ntsena. Xikan’we-kan’we loko a sungule ku tshemba marito ya Yesu lama kumekaka eka Matewu 6:33, kutani a tshika ku hlongorisa moya, u nghenele ntirho wa nkarhi hinkwawo. Sweswi u tirhela Yehovha hi ripfalo leri baseke, hilaha a vulaka hakona, u endla tano ‘hilaha a nga kotaka hakona.’
5 Bibele yi vula leswaku i vutlhari ku kunguhatela vumundzuku. (Swiv. 21:5) Onge hinkwerhu hi nga endla tano hi ri karhi hi tikarhatela ku rhangisa ku endla ku rhandza ka Xikwembu.—Efe. 5:15-17.