Kunguhata Ka Ha Ri Ni Nkarhi!

¹ Nhlengeletano ya Yehovha yi lunghiselela nongonoko wa nkarhi na nkarhi wa mintirho ya swa le tilweni leyi endleriweke ku enerisa swilaveko swa hina hinkwaswo swa moya. Ku tlangela ku hi susumetela ku swi tirhisa hi ku helela hinkwaswo leswi hi lunghiseleriweke swona, ku fana ni maendzo ya mulanguteri la famba-fambaka, tinhlengeletano ni mintsombano kun’we ni mintirho yin’wana yo hlawuleka leyi kunguhatiweke evandlheni. (Mat. 5:3) Hambiswiritano, vo tala va lahlekeriwa hi malunghiselelo lawa ya moya hikwalaho ka swilo swin’wana leswi va swi kunguhateke. I yini lexi nga endliwaka ku sivela leswi? Hi nga tiyiseka njhani leswaku mintirho yin’wana leyi nga riki ya swa le tilweni a yi swi kavanyeti “swilo swa nkoka swinene”?—Filp. 1:10.

² Ku Kunguhata Hi Vutlhari I Swa Nkoka: Swivuriso 21:5 ya tsundzuxa: “Makungu ya l’a gingiritekaka ma yisa e nḍalweni, kambe šihatli ši ta wela e ndlaleni.” Leswaku hi kuma ‘ndzalo’ ya moya, hi fanele hi tikarhatela ku kunguhata ka ha ri ni nkarhi, hi fanele hi tsundzuka mintirho ya swa le tilweni leyi hleriweke. Hi fanele hi hlela xiyimiso xa mintirho ya hina ya munhu hi xiyexe leswaku yi nga hi kavanyeti leswaku hi ya kuma mikateko ya moya. Loko hi hatlisela ku kunguhata ku endla swilo leswi hina vini hi lavaka ku swi endla, hi nga kalanga hi anakanya hi mintirho ya swa le tilweni ya nkarhi lowu taka, hi nga ha va “e ndlaleni” ya moya.

³ U Nga Lahlekeriwi! Hinkwerhu ha ma endla makungu ya nkarhi lowu taka, ku katsa ni minkarhi ya ku ya eku wiseni, maendzo ya swa ntirho, ku endzela maxaka ni swin’wana. U nga si tiboha kumbe ku tiyisa makungu ya wena, languta xiyimiso xa swilo swa moya swa nkarhi lowu taka. Loko u tiva leswaku mulanguteri wa xifundzha wa ta kumbe nhlengeletano yi ta va kona hi nkarhi lowu u nga ta va u nga ri kona, endla matshalatshala leswaku u ya hlela timhaka ta wena hi ndlela yin’wana, kutani u ta swi kota ku va kona. Hi tivisiwa ka ha ri ni nkarhi kahle malunghana ni swiendlakalo leswikulu leswi nga ta va kona enkarhini lowu taka. Vakulu va vandlha ra ka n’wina va nga ku byela leswi kunguhatiweke endhawini ya ka n’wina.

⁴ Hi ku tirhisa vutlharhi ni ku kunguhata ka ha ri ni nkarhi malunghana ni swilo swa nkoka swinene, hi ta “tala mbhandzu wo lulama, . . . ku va ku vangamisiwa ni ku vongiwa ka Xikwembu.”—Filp. 1:11.