Hi Wahi Makungu Ya Wena Ya Tin’hweti Ta Ximumu?

¹ Xana a hi ntiyiso leswaku hi nga ti fikelela kahle tipakani ta hina ta nkoka loko hi kunguhata ndlela leyi hi nga wu tirhisaka hi ndlela leyinene nkarhi lowu hi nga na wona? Minkarhi ya ximumu yi hi nyika malunghelo yo hambana-hambana ya ku yisa mintirho ya Mfumo emahlweni. (Swiv. 21:5) Hi yihi yin’wana ya mintirho leyi?

² Ntsombano wa “Ku Hanya Hi Ndlela Ya Xikwembu” i xin’wana xa swiendlakalo leswi hinkwerhu ka hina hi faneleke hi xi katsa eka makungu ya hina. Kombela nkarhi wo wisa entirhweni leswaku u ta va kona eka siku rin’wana ni rin’wana ra ntsombano. Endla malunghiselelo ya byetlelo bya wena ni swo famba ka ha ri ni nkarhi.

³ Ha yini u nga kunguhati ku engetela ntirho wa wena wa nsimu hi nkarhi wa ximumu? Masiku yo leha ya ximumu ni maxelo layo kufumela ma nga ha ku endla u heta nkarhi wo tala entirhweni wo chumayela. Ku wisa ka swikolo ku nyika vantshwa nkarhi wo phayona nkarhinyana eka n’hweti yin’we kumbe to hlayanyana ta ximumu. Van’wana nakambe va nga kunguhata ka ha ri emahlweni leswaku va phayona nkarhinyana hi November, laha ku nga ta va ni Tisonto ta ntlhanu. Hinkwerhu a hi endleni matshalatshala hi vun’we leswaku hi hlanganyela hi xitalo hilaha swi nga kotekaka hakona evutirhelini.

⁴ Loko nsimu ya vandlha ra ka n’wina yi tirhiwa nkarhi na nkarhi, ha yini u nga kunguhati ku pfuneta vandlha leri nga ekusuhi leri lavaka ku pfuniwa eku hlanganiseni ka nsimu ya rona? Mulanguteri wa xifundzha a nga tivisa vakulu malunghana ni swilaveko endhawini ya ka n’wina. Loko u ya eku vhakeni ekule ni le kaya, kunguhata ku ya eminhlanganweni ni ku hlanganyela entirhweni wa nsimu ni vandlha ra ndhawu yoleyo. Loko u endzela maxaka lama nga riki Timbhoni ta Yehovha, lunghiselela tindlela leti u nga va avelaka ntiyiso ha tona ka ha ri emahlweni.

⁵ Hi wahi makungu ya wena ya tin’hweti ta ximumu? A swi kanakanisi leswaku u lava ku wisisa miri. Kambe u nga ma honisi malunghelo lama vaka kona ya ku titiyisa emoyeni hi ku hambeta u rhangisa Mfumo evuton’wini bya wena.—Mat. 6:33; Efe. 5:15, 16.