Tirhisa Minkarhi Yo Nyikela Vumbhoni Hi Ximumu
1 Matsalwa ma hi khutaza: “Hambi ma dya, hambi ma nwa, hambi mi endla yini na yini, endlani hinkwaswo ku dzunisa Xikwembu.” (1 Vakor. 10:31) Nkarhi wa ximumu wu nyikela minkarhi yo endla leswi hi tindlela to tala.
2 Vo tala va ta teka nkarhi wo wisa eku heleni ka lembe. Hambi swi ri tano, ku hava ni un’we wa hina loyi a fanelaka ku honisa ntirho wa hina wa ku chumayela ni wa ku dyondzisa ku nga khathariseki leswaku i nguva yihi. Hikwalaho, loko u ri eku wiseni, u va kona entsombanweni kumbe hi nkarhi wa ku wisa ka swikolo, tiyimiseli ku chumayela eka van’wana. Xana hi nga swi endlisa ku yini leswi ke?
LOKO U RI EKU WISENI
3 Xana u kunguhata ku endzela maxaka loko u ri eku wiseni? Vo tala va hina va tsakela ku pfuxeta swiboho swa ndyangu. Loko maxaka ya wena ma nga ri entiyisweni, u nga swi kota ku avelana rungula ra Mfumo na vona. Vamakwerhu vo tala va ve ni ku humelela lokunene hi ku rindzela handle ko hela mbilu ku kondza ku fika nkarhi lowunene wo nyikela vumbhoni eka maxaka ya vona. Hi ndlela leyi, van’wana va maxaka ya vona va dyondze ntiyiso.—Vona Xihondzo xo Rindza, February 15, 1990, matluka 25-7.
4 Loko u kunguhata ku ya ekule ni le kaya leswaku u ya eku wiseni, ha yini u nga endli malunghiselelo yo va kona eminhlanganweni ni ku tirha ntirho wa nsimu ni bandlha ra kwalaho? Hi ‘na rirhandzu eka nhlengeletano hinkwayo ya vamakwerhu,’ naswona ku tirha entirhweni wa nsimu na vona swi hi nyika nkarhi wo pfuneka hi ntokoto wa vona entiyisweni loko hi va tiva ku antswa. (1 Pet. 2:17) Hi ku va kona eminhlanganweni ni ku nghenela ntirho wo chumayela loko hi ri eku wiseni, hi nga tipfuna ni ku tsakela ku phyuphyisiwa ka xiviri ni vamakwerhu.—Mat. 11:28, 29.
LOKO U VA KONA ENTSOMBANWENI
5 Loko u va kona entsombanweni wa muganga, nyikela vumbhoni eka van’wana. Ku ambala tibeje ta hina swi nga pfuxa ku lava ku tiva ka van’wana ivi swi hi pfulela ndlela yo vulavula na vona hi ntiyiso. Languta minkarhi leyi ku pfulekeleke yo nyikela vumbhoni loko u yima leswaku u kuma petirolo, loko u dya etikhefini kumbe loko u tirhisa vutleketli bya mani na mani. Mabulo ya xitshuketa eka matshamelo lawa hakanyingi ma humesa vuyelo lebyinene. Kutani vana ni Bibele ya wena ni tibuku leti fanelaka ekusuhi, naswona tiyimiseli ku nyikela vumbhoni.
NTIRHO LOWU KURISIWEKE TANIHI NDYANGU
6 Tanihi leswi vo tala va hina va nga ta va va pfarile exikolweni kumbe va kume nkarhi wo wisa entirhweni wa ku tihanyisa hi nguva ya holideyi, ha yini u nga heti nkarhi lowu engetelekeke evutirhelini bya nsimu hi ku phayona nkarhinyana? U nga antswisa vutirheli bya wena bya nsimu ivi u ‘ndlandlamuxa’ rirhandzu ra wena hi ku tirha ni van’wana. Ha yini u nga tirhi ni vo tala hi laha swi kotekaka ha kona ebandlheni? (2 Vakor. 6:11-13) Mindyangu hinkwayo yi tirhise tin’hweti ta ximumu ku phayona nkarhinyana swin’we. Leswi swi tiyise ripfumelo ra vona naswona swi va tshinete ekusuhi na Yehova ni le ka vona vini tanihi ndyangu. Nakambe, leswi swi khutaza bandlha, naswona hikwalaho van’wana va nga susumeteriwa eka ntirho lowukulu.
7 Nkarhi wa ximumu hakanyingi wu tele hi ku gingiriteka. Hikwalaho ka leswi swilo swo tala swinene swi nga tekaka nkarhi wa hina, hi fanele ku khathalela ku hlayisa mukhuva lowunene leswaku hi ta kota ku tirhisa wo tala wa nkarhi wa hina. Hi ku veka swilo swa moya emahlweni sweswi, hi ta ‘endla leswaku ku vonakala ka hina ku vangama emahlweni ka vanhu.’ Loko va vona mintirho ya hina leyinene, van’wana va nga ha susumeteriwa ku dzunisa Yehova, hinkwaswo leswi swi endleka hikwalaho ka leswi hi tirhiseke nkarhi wo avelana ntiyiso ni van’wana hi nkarhi wa ximumu.—Mat. 5:16.