Tirhisa Ximumu Hi Vutlhari

1 Vana va xikolo hakanyingi va vutisiwa leswi va kunguhataka ku swi endla hi ximumu, naswona loko va tlhelela exikolweni, va nga ha komberiwa ku endla xiviko hi leswi va swi endleke. Hakunene, hikwerhu ka hina, lavatsongo ni lavakulu, hi endla kahle hi ku tivutisa: ‘I yini leswi hi kunguhateke ku swi endla hi ximumu? Loko xi hundzile, xana hi ta swi kota ku nyika xiviko xa ximumu xa nkoka, lexi nga ni mihandzu?’—Vaef. 5:15, 16.

2 Pfuneka eMintsombanweni: Vo tala va ta va kona eka Ntsombano wa Muganga wa “Varhandzi Va Ntshunxeko.” Endzhaku ka sweswo, hi endla kahle hi ku pfuxeta tinotsi ta hina ku vona tinhla leti hi ti dyondzeke ni leti hi nga ti tirhisaka evuton’wini bya hina tanihi vadzunisi va Yehova. Eka Vaefesa 4:25 hi khutaziwa leswaku “un’wana ni un’wana a a vule ntiyiso eka munhu-kulobye.” Vaakelani va hina lavakulu i swirho swa ndyangu wa hina. Hi nga bula na vona kumbe ni swirho swa ndyangu wa hina wa moya hi swakudya swin’wana swa moya leswi nyikeriweke enongonokweni wa ntsombano.

3 Hlanganyela eVutirhelini Bya Nsimu: Xana hi kunguhate ku va ni xiphemu lexikulu hi laha swi kotekaka ha kona evutirhelini hi ximumu lexi? Loko hi ri swin’we ni bandlha ra ka hina vini, hi ta lava ku seketela malunghiselelo ya hina ya ntirho wa nsimu ya nkarhi na nkarhi. Hi nga ha swi kota ku hlanganyela eku nyikeleni ka vumbhoni ni madyambu, tanihi leswi nkarhi wa ni nhlikanhi wu leheke. Vanhu vo tala va le makaya ni madyambu naswona va tala ku va va wisile, xisweswo swa hi olovela ku vulavula na vona hi mahungu lamanene ya Mfumo.—Esa. 50:4.

4 Loko hi endla malunghiselelo yo endza, hi ya entsombanweni kumbe eku wiseni, hi fanele hi hlela ku famba ni tibroxara to karhi. Loko minkarhi yo nyikela vumbhoni hi xitshuketa yi humelela, hi nga yisa nyingiso eka yin’wana ya tibroxara. Loko hi nga ri ekaya, hi nga ha swi kota ku kuma Holo ya Mfumo, hi va kona eminhlanganweni ni ku hlanganyela entirhweni wa nsimu ni vamakwerhu va xinuna ni va xisati va kwalaho. Leswi swi fanele swi va xihlovo lexinene xa xikhutazo eka hina ni vamakwerhu lava hi hlanganyelaka na vona.—Varhoma 1:12.

5 Loko hi ta va hi nga ri kona ebandlheni ra ka hina eku heleni ka n’hweti, hi fanele hi posa xiviko xa ntirho wa hina wa nsimu eka matsalani ka ha ri na nkarhi kahle leswaku xi katsiwa ni xiviko lexi a xi rhumelaka hi siku ra vutsevu n’hweti leyi landzelaka. Kumbexana hi nga xi siya na yena hi nga si suka, naswona ntirho wun’wana ni wun’wana lowu endliwaka endzhaku ka sweswo wu nga katsiwa eka xiviko xa n’hweti leyi landzelaka.

6 Lwela Ku Fambisa Tidyondzo: Hakanyingi i tidyondzo titsongo leti fambisiwaka hi tin’hweti ta ximumu hikuva swichudeni swo karhi swa Bibele swi ya eku wiseni. Loyi a fambisaka dyondzo a nga ha famba na yena kambe hi nkarhi wun’wana. Ematshan’wini yo tshika mavhiki ma hundza dyondzo yi nga fambisiwi, xana hi nga swi kota ku hlela leswaku un’wana ebandlheni a fambisa dyondzo loko hi nga ri kona? I swinene leswaku dyondzo yi fambisiwa nkarhi na nkarhi hi laha swi kotekaka ha kona ku nghenisa xilaveko xa ku tiwundla hi swa moya nkarhi na nkarhi emianakanyweni ya xichudeni.

7 Tanihi malandza lama tinyiketeleke ya Yehova, onge hinkwerhu hi nga swi kota ku tsundzuka ximumu xa 1991 ivi hi swi vona leswaku, hakunene hi tirhise nkarhi hi vutlhari hi ku “tiyisela entileni wa timhaka ta ku hanyisa” ni ku pfuna van’wana ku dyondza marito lama hanyisaka ya ntiyiso lama humaka eRitweni ra Yehova.—2 Tim. 1:13, BX.