Dyondzisa Van’wana Leswaku Va Vuyeriwa

¹ Yehovha u lava leswaku vanhu hinkwavo va vuyeriwa. (Esa. 48:17) Wa xi tiva lexi hi nyikaka ntsako wa xiviri. U rhandza ngopfu leswaku vanhu va papalata makhombo ivi va tsakela vutomi hi ku yingisa swileriso swakwe. Ha vuyeriwa swinene loko hi hanya hi ndlela ya Xikwembu. (Ps. 34:8) Hi nga va dyondzisa njhani van’wana leswaku na vona va hanya hi ndlela yoleyo?

² Xana Vanhu Va Lava Yini? Xana i yini leswi vilerisaka lava nga ni mindyangu endhawini ya ka n’wina? Xana a hi nsirhelelo wa makaya ya vona, ndlela leyi vukati bya vona byi tiyeke ha yona, vumundzuku bya vana va vona ni timhaka tin’wana leti fanaka ni teto? Loko va ri ni swiphiqo, va ya kwihi leswaku va kuma mpfuno? Va nga ha lava ku tiendlela swilo hi voxe, va nga ha lava mpfuno eka tibuku leti nyikaka mpfuno wa munhu hi xiyexe kumbe va titshega hi nkongomiso wa van’wana. Hi ku famba ka nkarhi, vo tala va pfilunganyiwa hi mianakanyo leyi nga riki yinene leyi nga twisisekiki emhakeni leyi nga vuyerisaka vona vini. Hi fanele hi va khorwisa leswaku nkongomiso lowu nyikeriwaka hi Rito ra Xikwembu i wa risima swinene. (Ps. 119:98) Hi nga endla leswi hi ku va kombisa ndlela leyi sweswi va nga antswisaka nkoka wa vutomi bya vona ha yona loko va endla matshalatshala ya ku dyondza Bibele ni ku tirhisa leswi yi swi dyondzisaka.—2 Tim. 3:16, 17.

³ Vutomi Byo Antswa Bya Ndyangu: A hi vanhu vangani lava swi tivaka leswaku ndzayo ya risima leyi huhuteriweke leyi nga eka Vaefesa 5:22–6:4 ya tirha eku tlhantlheni ka swiphiqo swa ndyangu. Leswi a swi ri tano eka mpatswa lowu a wu ri ni malembe yo tlula khume wu tekanile, kambe se a wu bohe leswaku wu lava ku hambana. Hambiswiritano, ku sunguriwe dyondzo ya Bibele ni nsati wa kona, u dyondzisiwe minsinya ya milawu ya Matsalwa malunghana ni vutomi bya ndyangu. Nuna u hatle a xiya ku cinca loku endliwaka hi nsati wakwe tanihi leswi a tirhisa minsinya ya milawu ya Bibele, nuna u sungule ku hlanganyela edyondzweni yoleyo. Endzhaku u te: “Sweswi hi kume xisekelo xa vutomi bya ndyangu lebyi tsakisaka hakunene.”

⁴ Xikongomelo Xa Xiviri eVuton’wini: Loko muntshwa un’wana loyi se a ri hlonga ra swidzidzirisi a kombele ku pfuniwa hi Timbhoni, u dyondzisiwe leswaku Yehovha wa n’wi khathalela. U te: ‘Ndzi dyondze leswaku Muvumbi u ni xikongomelo malunghana ni vanhu naswona lava n’wi tsakisaka u ta va nyika vutomi lebyi nga heriki. A yi hlamuseleki ndlela leyi mhaka leyi yi ndzi tsakiseke ha yona. Namuntlha ndzi ni rihanyo lerinene, ku rhula ka mianakanyo ni vuxaka lebyi tiyeke ni Xikwembu.’

⁵ A nga kona loyi a nga faneriwiki hi mpfuno wa risima lowu kumekaka eRitweni ra Xikwembu. Hi ku ri tirhisa tanihi nkongomiso eka hina, hi tiyisa leswaku ndlela ya Yehovha yi tlakukile ku tlula tindlela ta misava. (Ps. 116:12) I lunghelo ra hina ku byela van’wana rungula leri, hi va dyondzisa leswaku va vuyeriwa. Loko hi endla tano, hi ta kuma vuyelo byo tala lebyi tsakisaka.