Hambeta U Rhangisa Mfumo
1 Ku rhangisa Mfumo wa Xikwembu evuton’wini ni ku hambeta hi endla tano, a swi olovi loko hi langutane ni mintshikilelo ya ikhonomi kumbe swiphiqo swin’wana. Xana hi nga swi kotisa ku yini ku hambeta hi rhangisa Mfumo loko hi langutane ni swiphiqo? Hi ta endla njhani loko hi nyikiwa ntirho lowu lavaka leswaku hi lahlekeriwa hi minhlangano kumbe lowu hi kavanyetaka ku ya ensin’wini? Xana hi ta teka Mfumo wu nga ri wa nkoka evuton’wini bya hina?
2 Ku Laveka Ripfumelo Leri Tiyeke: Loko ripfumelo ra hina ri ringiwa hi swiyimo sweswo, hi nga xi rivali xitshembiso xa Yehovha ni xitiyisekiso xa Yesu xa leswaku hi ta kuma nseketelo wa Xikwembu loko hi lava Mfumo ku sungula. (Ps. 37:25; Mat. 6:31-34) Minkucetelo ni mintshikilelo ya misava swi nga kavanyeta langutelo ra hina kutani swi hi sivela ku hambeta hi teka Mfumo wu ri wa nkoka. Van’wana va pfumelele ku tshembisiwa swikhundlha emintirhweni kumbe ku kuma mali leyi engetelekeke, ku va nchumu wa nkoka evuton’wini bya vona. Kambe, ku fana na Pawulo, hi fanele ku swi kambisisa kahle swilo leswi nga swa nkoka hakunene evuton’wini.—Filp. 3:7, 8.
3 Xana Ku Fanele Ku Endliwa Mindzulamiso Yo Karhi? Muhuweleri un’wana u te: “A ndzi tshama ndzi ri karhi ndzi ehlekete bindzu ra mina—a ndzi ri rhandza hi mbilu hinkwayo. Ndzi vone onge ndzi nga swi kota ku ya emahlweni ndzi ri Mbhoni hambiloko ndzi heta nkarhi wo tala etimhakeni ta bindzu.” Kambe ripfalo ra yena a ri n’wi byela leswaku u fanele ku endla leswi engetelekeke leswaku a tirhela Yehovha. Hi ku famba ka nkarhi u ri tshikile bindzu leri a ri kavanyeta nhluvuko wa yena wa moya. Xikan’we loko a tinyiketele hi ku helela entirhweni wa Mfumo, u kote ku vula a ku: “Sweswi ndzi vona vutomi bya mina byi ri lebyi amukelekaka ematihlweni ya Yehovha, ku nga swona leswi nga swa nkoka swinene.”
4 Lexi tsakisaka, vamakwerhu vo tala va tshike mintirho ya vona ya ku tihanyisa ni ku tshembisiwa mali yo tala kutani va olovisa vutomi bya vona ivi va nghenela ntirho wa nkarhi hinkwawo. Malandza ya vutirheli lama ha riki vantshwa ni vakulu, lava veke kona eXikolweni xa Ndzetelo wa Vutirheli va endle tano naswona sweswi va nyikiwe malunghelo lamanene ya ntirho. Hi ku tekelela xikombiso lexikulu xa Pawulo, va eneriseka hi mbilu hinkwayo hi swilo leswi vonakaka leswi va nga na swona.—1 Kor. 11:1; 1 Tim. 6:6-8; Hev. 13:5.
5 Hambiloko misava yi hlekula langutelo ra hina hi vutomi, Yehovha wa hi katekisa. (1 Kor. 1:26-31) Xana a swi khutazi ku tiva leswaku u ta hi tirhisa hi xitalo hilaha swi nga kotekaka hakona nileswaku u ta hi pfuna ku hetisisa ntirho wa yena? Lunghelo leri hi nga na rona sweswi ra ku chumayela hi Mfumo wa Xikwembu a hi nge tlheli hi ri kuma. Hikwalaho, sweswi i nkarhi wa ku hambeta hi rhangisa Mfumo evuton’wini bya hina.