“Va Ta Swi Twisa Ku Yini?”
1 Yesu u vule hi ku kandziyisa a ku: “Nakambe, mahungu lamanene ma fanele ku chumayeriwa ematikweni hinkwawo ku sungula.” (Mar. 13:10) Hambileswi hi gingiritekaka, ka ha ri ni vanhu va madzana ya timiliyoni lava nga si chumayeriwaka hi ku kongoma. Tihulumendhe tin’wana ti sivela ntirho wa hina. Matiko yo tala ma ni nhlayo leyikulu ya vaaki, leyi andzaka hi ku hatlisa. Xisweswo, “va ta swi twisa ku yini?”—Rhom. 10:14.
2 Tshemba Yehovha: Hi nga rivali leswaku Yehovha u tiva xiyimo xa timbilu ta vanhu hinkwavo. Ku nga khathariseki xiyimo lexi munhu a nga vaka a ri eka xona, loko a lavisisa ntiyiso malunghana ni Xikwembu hi mbilu hinkwayo, u ta wu kuma.—1 Tikr. 28:9.
3 Abrahama a a karhatekile hi vaaki va Sodoma na Gomora. Kambe Xikwembu xi n’wi tiyisekisile leswaku a xi nge ri lovisi tiko ra Sodoma hambiloko ko kumeka khume ra vanhu lava lulameke eka rona. (Gen. 18:20, 23, 25, 32) Yehovha a nga si tshama a lovisa lavo biha swin’we ni lavo lulama, hilaha swi kombisiweke hakona hi ku ponisiwa ka Lota ni vana va yena.—2 Pet. 2:6-9.
4 Eliya u tshama a vona onge hi yena a ri yexe la gandzelaka Xikwembu xa ntiyiso. Kambe, Yehovha u n’wi tiyisekisile leswaku a a nga ri yexe nileswaku ntirho lowu a wu sunguleke a wu ta hetiseka. (1 Tih. 19:14-18) Ku vuriwa yini hi nkarhi wa hina?
5 Tshama U Khomekile eNtirhweni Wa Xikwembu: A hi swi tivi leswaku ntirho wo chumayela wa ha ta teka nkarhi wo tanihi kwihi wu ri karhi wu endliwa. Yehovha hi yena la kongomisaka ntirho lowu naswona u tirhisa tintsumi ta yena leswaku ti wu langutela. (Nhlav. 14:6, 7) Hi yena la tivaka leswaku matiko hinkwawo ma fanele ku chumayeriwa ku fikela rini. Loko Yehovha a swi rhandza, a nga endla leswaku rungula ra Mfumo ri chumayeriwa hi tindlela leti hi nga si ti anakanyaka leswaku vanhu lava engetelekeke va “twa rito ra mahungu lamanene kutani va kholwa.” (Mint. 15:7) Leswi Yehovha a nga ta swi endla swi ta pfumelelana hi ku helela ni vumunhu bya yena—ku nga Xikwembu xa rirhandzu, xa vutlhari ni lexi lulameke.
6 Hi nyikiwe lunghelo ro tirha hi ku pfumelelana ni ku rhandza ka Yehovha, hi endla hinkwaswo leswi nga emandleni ya hina leswaku un’wana ni un’wana a twa mahungu lamanene.—1 Kor. 9:16.