Ku Simekiwa Ka Mavandla Lamantshwa

Xihondzo xo Rindza xa January 15, 2001, xi vike hi ndlela leyi hlelekeke, leyi Timbhoni ta Yehovha ti yaka emahlweni ha yona ni ntirho wa Mfumo emisaveni hinkwayo. Xi tlhele xi hlamusela ndlela leyi mavandla yo hambana-hambana ya swa nawu ma tirhisiwaka ha yona tanihi switirho swo hatlisisa ntirho wo chumayela mahungu lamanene. Mavandla yo tano i ya nkoka leswaku hi pfumelelana ni milawu ya ndhawu swin’we ni ya matiko hinkwawo, hilaha Rito ra Xikwembu ri lerisaka hakona. (Rhom. 13:1) Hikwalaho ka mintirho yo hambana-hambana leyi hi yi endlaka ni vukulu bya yona, Huvo leyi Fumaka yi nyike mpfumelelo wa leswaku ku simekiwa mavandla lama engetelekeke, leswaku ku ta khathaleriwa swilaveko swo karhi swa Timbhoni ta Yehovha eUnited States ni le matikweni man’wana. La Afrika Dzonga ni le matikweni yo tala lawa hi akelaneke na wona, ana se hi na tona tinhlangano ni mavandla ya swa nawu, leti tiviwaka hi mavito yo kota:

Jehovah’s Witnesses of South Africa

Jehovah’s Witnesses Botswana

Lesotho Association of Jehovah’s Witnesses

Jehovah’s Witnesses of Namibia

Swaziland Association of Jehovah’s Witnesses

Tinhlangano ni mavandla lawa swi tirha swin’we ni Watch Tower Bible and Tract Society of Pennsylvania. Enkarhini lowu taka, mapapila hinkwawo lama nga ta rhumeriwa emavandlheni ni le ka vahuweleri, adirese ya wona yi ta ku “Jehovah’s Witnesses of South Africa.” Loko u bela rhavi ra ka hina riqingho, la hlamulaka tinqingho u ta hlamula hi ku “Jehovah’s Witnesses.” Hi ta va hi vitaniwa kahle hi vito ra hina. Ku khomisana ka n’wina eka mindzulamiso leyi endliweke hi Huvo leyi Fumaka, leswaku yi hetisisa xiavelo xa yona xa ku khathalela swa N’wini wa yona, ku ta tlangeriwa swinene.—Mat. 24:45-47.