Bokisi Ra Swivutiso

◼ Ntlawa wa ririmi leri nga tirhisiwiki ngopfu, wa ririmi rimbe kumbe wa ririmi ra mavoko wu fanele wu simekiwa loko swi te yini?

Loko nsimu leyi tirhiwaka hi vandlha yi ri ni vaaki vo tala lava vulavulaka ririmi leri nga tirhisiwiki ngopfu kumbe ririmi rimbe, vakulu va fanele va endla leswi nga ematimbeni ya vona leswaku va hlela ntirho wo chumayela hi ririmi rero. (km-TS 7/02 tl. 1; km-TS 2/98 matl. 3-4) Swi nga ha endleka leswaku vanhu lava vulavulaka ririmi leri nga tirhisiwiki ngopfu, ririmi rimbe kumbe ririmi ra mavoko va hangalakile eka masimu ya mavandlha mambirhi kumbe ku tlula, lawa mi vandzamaneke na wona. Eka xiyimo xo fana ni xexo, (va-)mulanguteri wa xifundzha u ta nyikela nkongomiso lowu lavekaka, xisweswo a pfuna mavandlha lama katsekaka leswaku ma khomisana entirhweni wo chumayela. Minkarhi yin’wana ku nga endliwa malunghiselelo yo nyikela nkulumo ya le rivaleni kumbe Dyondzo ya Xihondzo xo Rindza hi xikongomelo xo kumisisa leswaku i vanhu vangani lava vaka kona eminhlanganweni ya ririmi rero.

Ntlawa wu nga simekiwa loko ku fikeleriwe swilaveko leswi landzelaka: (1) Loko ku ri ni vahuweleri kumbe vanhu lava tsakelaka lava twisisaka mahungu lamanene ku antswa hi ririmi rero. (2) Loko ku ri ni nkulu kumbe nandza wa vutirheli la fanelekaka, loyi a nga ta rhangela ni ku fambisa hambi ko va nhlangano wun’we hi vhiki. (3) Loko huvo ya vakulu yi tsakela ku seketela ntlawa. Loko swilaveko leswi swi fikeleriwile, vakulu va fanele va tivisa hofisi ya rhavi leswaku ntlawa wu ta simekiwa ximfumo ku tlhela ku nyikeriwa vukongomisi lebyi engetelekeke.

Mintlawa yo tala yi sungula hi ku khoma Dyondzo ya Buku ya Vandlha vhiki ni vhiki. Endzhaku vakulu va nga ha nyika mpfumelelo wo engetela minhlangano yin’wana, yo tanihi Nhlangano wa le Rivaleni ni Dyondzo ya Xihondzo xo Rindza. Tinkulumo No. 2, 3 na 4 eka Xikolo xa Vutirheli bya le Tilweni ti nga ha nyikeriwa ekamareni rin’wana loko ku ri ni nkulu la fanelekaka kumbe nandza wa vutirheli la kotaka ku vulavula ririmi rero leswaku a va mutsundzuxi. Hambiswiritano, ntlawa wu ta hlangana ni vandlha eka nkulumo yo laya, tinhla ta Bibele ni Nhlangano wa Ntirho. Ntlawa wu nga ha tlhela wu hleleriwa minhlangano ya ntirho wa nsimu.

Rungula leri ri tlhela ri tirha ni le ku simekeni ka mintlawa leyi nga yoxe ensin’wini leyi averiweke vandlha ro karhi kumbe leyi nga aviwangiki. Swi nga va swinene loko vandlha ra le kusuhi ri khathalela mintlawa leyi, loko swi koteka.

Hinkwavo entlaweni va ta fambisana ni vulanguteri bya huvo ya vakulu. Vakulu va fanele ku nyikela nkongomiso lowu faneleke, va kombisa leswaku va khathala hi swilaveko swa ntlawa. Loko mulanguteri wa xifundzha a endzela vandlha leri pfunaka, u ta tlhela a hlela ku tirha ni ntlawa leswaku a wu aka hi tlhelo ra moya. Hikwalaho ka nkateko wa Yehovha, ntlawa lowu vulavulaka ririmi rimbe wu nga va vandlha hi ku famba ka nkarhi.