Mpfuxeto Wa Xikolo Xa Vutirheli Bya Le Tilweni
Swivutiso leswi landzelaka swi ta pfuxetiwa hi ku vulavurisana kunene eXikolweni xa Vutirheli bya le Tilweni hi vhiki leri sungulaka hi February 24, 2003. Mulanguteri wa xikolo u ta fambisa mpfuxeto wa timinete ta 30 lowu seketeriweke eka rungula ra tinkulumo leti nyikeriweke ku sukela eka vhiki ra January 6 ku ya eka February 24, 2003. [Xiya: Laha ku nga riki na swikombo endzhaku ka xivutiso swi ta lava leswaku u tikumela tinhlamulo hi ku tiendlela ndzavisiso.—Vona buku leyi nge Xikolo Xa Vutirheli, matl. 36-7.]
TINHLA TO TIRHELA EKA TONA
1. I Ntiyiso Kumbe I Mavunwa: Nchumu lowukulu lowu pfunaka ku hlaya kahle i ku endla leswaku leswi u swi hlayaka swi twala swi ri swona, hambiloko swi hambananyana ni leswi tsariweke. Hlamusela. [3, be-TS tl. 83] I Mavunwa. Leswi nga ha twalaka swi ri swona eka muhlayi a hi minkarhi hinkwayo swi nga swona hakunene. Leswaku a hlaya kahle, munhu u fanele a hlayela ehenhla leswi tsariweke ephepheni hi ku kongoma handle ko engetela marito, ku tlula marito, ku siya swin’wana emaritweni kumbe ku siva marito hi man’wana. Ku hlaya kahle swi katsa ni ku vitana marito hi ndlela ya kona.
2. Tata Xivandla Lexi Nga Riki Na Nchumu: Leswaku a hlaya kahle, munhu u fanele a titoloveta ku hlaya rungula hi ku phindha-phindha a hlayela ehenhla. [4, be-TS tl. 85]
3. Ha yini swi ri swa nkoka ku vula marito hi ndlela leyi twalaka? (1 Kor. 14:8, 9) [5, be-TS tl. 86] Loko u vula marito kahle, van’wana va ta kota ku twisisa leswi u swi vulaka. Marito lama vuriweke kahle hakanyingi ma ta tekiwa ya ri ya nkoka. (Mongo lowu fanaka.)
4. Hi swihi swilo swin’wana leswi nga endlaka leswaku marito ma nga twisiseki, naswona hi nga endla yini leswaku hi vulavula swi twala kahle? [6, be-TS matl. 87-8] Marito lama nga twaliki kahle ma nga va ma vangiwa hi loko nomu wu nga pfuriwi swinene, ku vulavula hi ku hatlisa kumbe ku siya mapeletwana. U nga antswisa hi ku hlaya u ololoxe nhloko, u pfula nomu kahle ni ku titoloveta ku tshama u ntshunxekile exikandzeni u tlhela u ntshunxa misiha ya nkolo. (Mongo lowu fanaka.)
5. Hi wahi marito man’wana lama tirhisiweke eka Xikolo xa Vutirheli bya le Tilweni eka tin’hweti timbirhi leti hundzeke lawa u vonaka leswaku u fanele u titoloveta ku ma vula kahle? [8, be-TS tl. 92] [Xitsundzuxo eka mulanguteri wa xikolo: Tsala marito lawa ma talaka ku vitaniwa hi ndlela leyi hoxeke. Handle ko khomisa van’wana tingana, ma hlaye hi ndlela ya kona. Hi xikombiso, u nga bula ni vayingiseri hi mavitanelo lamanene ya marito lama nge “matshalatshala,” “mphika-makaneta,” “rhumbyana” na “ntshunxeko.”]
NKULUMO NO. 1
6. I Ntiyiso Kumbe I Mavunwa: Matihlo ya hina ma nga hi pfuna ku yingisela. Hlamusela. [5, be-TS tl. 14] I Ntiyiso. Nyingiso wa hina wu lawuriwa swinene hi mahlo. Mahlo ya hina ma nga hi pfuna ku nyikela nyingiso hi ku tshama hi langute xivulavuri ni ku fambisana na xona loko xi hlaya matsalwa ya Bibele. Loko hi nga xi languti, hi nga lahlekeriwa hi swo tala swa leswi vuriwaka exitejini.
7. Tata Swivandla Leswi Nga Riki Na Nchumu: Misava, n’weti na dyambu hinkwaswo swi tirha tanihi swikomba-nkarhi leswi lunghiseleriweke hi Xikwembu. [7, si-TS tl. 279 ndz. 7]
8. Tata Swivandla Leswi Nga Riki Na Nchumu: Hi ku ya hi Bibele, rito leri nge “siku” ri nga vula nkarhi wo ringana 12 wa tiawara, 24 wa tiawara, 1 000 wa malembe, kumbe magidi ya malembe, hi ku ya hi mongo wa mhaka. [7, si-TS tl. 279 ndz. 8] (A swi bohi ku hlamula hi ku landzelelana ka swona.)
9. Xana swikombiso swa Hana, Marka na Eliya swi nga hi pfuna njhani leswaku hi hlula ku hela matimba? Hi nga swi tirhisa njhani swikombiso leswi ku pfuna van’wana? [3, w01-TS 2/1 matl. 20-3] Ematshan’weni yo hela matimba kumbe ku va ni xikhomela loko a hehliwa hi muprista lonkulu wa Israyele, Hana u n’wi hlamusele ntiyiso wa mhaka hi ku kongoma ni hi xichavo. Marka u ye emahlweni a chumayela hi ku hiseka, a famba na Barnaba ematshan’weni yo hetiwa matimba hileswi muapostola Pawulo a nga fambangiki na yena emaendzweni ya yena ya vurhumiwa. Eliya na yena u ve ni swiphiqo leswi n’wi tekeleke ntsako wa yena ku ringana nkarhinyana. Hambiswiritano u titshege hi Yehovha leswaku a n’wi kongomisa ni ku n’wi tiyisa leswaku a hetisisa ntirho wa yena wa vuprofeta. Swikombiso leswi swi nga hi pfuna ku khutaza lava heleriwaka hi matimba ya ku langutana ni swiphiqo swa vona, lava nga tiphiniki hi vutomi. (Mongo lowu fanaka.)
10. Xana ku twisisa mintlangu ya khale swi hi pfuna njhani leswaku hi twisisa tindzimana tin’wana ta Bibele? Xana rungula leri ri fanele ri byi khumba njhani vutomi bya hina? [2, w01-TS 1/1 matl. 28-31] Loko hi twisisa leswaku ‘a nga kona munhu loyi a a dume hi vugevenga loyi a a pfumeleriwa ku nghenela mphikizano’ eka mintlango ya khale ya Magriki, hi nga yi twisisa ku antswa nhlamuselo ya Pawulo leyi nga eka 2 Timotiya 2:5 ya leswaku munhu u fanele ku ‘namarhela milawu leyi vekiweke’ emphikizanweni wa vutomi. Ku tiva leswaku emintlangwini ya khale switsutsumi a swi nga tikiwi hi swiambalo kumbe switirho, swi hi pfuna ku twisisa marito ya Pawulo lama nga eka Vaheveru 12:1 malunghana ni ‘ku hluvula ntiko wun’wana ni wun’wana.’ Mimphikizano ya khale a yi lava ntamu ni ku tiyisela, naswona leswi swi hi pfuna ku twisisa marito lawa Pawulo a ma vuleke mayelana ni ku tsutsuma ni ku tiyisela. Sagwadi ra ku hlula eka mphikizano wo tsutsuma wa khale wa Magriki hakanyingi a ku ri harhi leyi endliweke hi swirhabyana swa murhi wa laurel, mutlhwari kumbe muphayini. Leswi swi hi pfuna ku twisisa nhlamuselo ya marito ya Pawulo lama kumekaka eka 1 Vakorinto 9:24, 25 lama vulaka leswaku ku hambana ni hakelo leyi kumiwaka hi switsutsumi emphikizanweni, hakelo ya ku tiyisela ka Vakreste i ya hilaha ku nga heriki. Xisweswo, muapostola Pawulo u byi hlamusele kahle vuyelo byo fikelela swilaveko swa Xikwembu, hi tshika moya wa ku rhandza swilo leswi vonakaka kutani hi lwela hakelo ya vutomi lebyi nga heriki. (Mongo lowu fanaka.)
KU HLAYA KA BIBELE KA VHIKI NI VHIKI
11. I Ntiyiso Kumbe I Mavunwa: Tanihi leswi Mfumo wa Xikwembu wu simekiweke etilweni hi 1914, a swa ha faneli ku khongela hi ku “Mfumo wa wena a wu te.” (Mat. 6:10) Hlamusela. [1, be-TS tl. 279; w96-TS 6/1 tl. 31] I Mavunwa. Swa ha fanela ku khongela hi ku “Mfumo wa wena a wu te” hikuva ku nga ri khale Mfumo wa Xikwembu lowu sweswi wu fumaka ematilweni wu ta teka goza laha misaveni enkarhini lowu taka, naswona leswi hi swona leswi hi anakanyaka swona loko exikhongelweni xa hina hi vula marito lama yelanaka ni ya Xikhongelo xa Hosi.
12. I Ntiyiso Kumbe I Mavunwa: Marito ya Yesu lama tsariweke eka Matewu 11:24 ma vula leswaku lava Yehovha a va loviseke hi ndzilo eSodoma ni le Gomora va ta pfuxiwa. Hlamusela. I Mavunwa. Yesu ngopfu-ngopfu a a nga vulavuli hi ku avanyiseriwa makumu ni ku pfuka ka vafi. A a vulavula hi ndlela leyi vanhu va le Korazini, Betsayida na Kapernawume a va nga yingisi ha yona, naswona a swi nga tshembisi leswaku va nga hundzuka. Ku vula leswaku a “swi ta tiyiseleka swinene” eka Tiri/Sidoni na Sodoma/Gomora hi “Siku ra Vuavanyisi” a ku ri xithathelo lexi Yesu a a nga lavi leswaku xi tekiwa xi ri mhaka ya xiviri. Ku engetela kwalaho, leswi Bibele yi tirhisaka Sodoma/Gomora ni Ndhambi tanihi swikombiso swa makumu ya mafambiselo yo biha ya sweswi, swi le rivaleni leswaku lava Xikwembu xi va heriseke eku avanyisiweni koloko loku hundzeke va loviseriwe makumu.—2 Pet. 2:4-9; Yudha 7. [2, w88-TS 6/1 matl. 30-1]
13. Hlawula Nhlamulo Leyi Nga Yona: Hlonga ro tshembeka ni ro tlhariha leri boxiweke hi Yesu eka Matewu 24:45-47 i (a) Huvo leyi Fumaka ya Timbhoni ta Yehovha; (b) ntlawa hinkwawo wa Vakreste lava totiweke laha misaveni; (c) Yesu Kreste hi byakwe. Hlonga leri ri lunghiselela swakudya swa moya hi nkarhi lowu faneleke ri swi phamela “va yindlu” lava va yimelaka (a) mutotiwa ha un’we; (b) tinyimpfu tin’wana; (c) vahlayi hinkwavo va minkandziyiso ya Vukreste. N’wini u veke hlonga leswaku ri langutela hinkwaswo leswi nga swa yena hi lembe ra (a) 1914; (b) 33 C.E.; (c) 1919. [5, w93-TS 5/1 matl. 16-18; nakambe vona w90-TS 3/15 tl. 14.]
14. Hlawula Nhlamulo Leyi Nga Yona: Rikoka leri ku vulavuriwaka ha rona exifanisweni xa Yesu lexi nga eka Matewu 13:47-50 ri kukute vandlha ra Vakreste lava totiweke na (a) Mfumo wa Xikwembu wa Vumesiya; (b) vanghana va vona va tinyimpfu tin’wana; (c) Vujagana. Rikoka ri yimela nchumu wa laha misaveni lowu tivulaka vandlha ra Xikwembu, ni lowu hlengeletaka “tinhlampfi” kumbe vanhu lava vulaka leswaku va landzela Kreste. Wu katse Vujagana lebyi hlengeleteke nhlayo leyikulu ya “tinhlampfi” leti nga riki tinene ni leti nga amukeriwangiki hi Xikwembu, wu tlhela wu katsa ni vandlha ra Vakreste lava totiweke, leri rona ri hambeteke ri hlengeleta ‘tinhlampfi letinene’ hi ku kongomisiwa hi tintsumi, hilaha Matewu 13:49 yi vulaka hakona. [3, w92-TS 6/15 tl. 20]
15. Hi ku ya hi marito ya Yesu lama tsariweke eka Matewu 5:24, xana u fanele u endla yini loko u vona leswaku u khunguvanyise mugandzeri-kuloni? [1, g96-TS 2/8 matl. 14-15] Loko ripfalo ra wena ri ku tsundzuxa leswaku u khunguvanyise mugandzeri-kuloni, u fanele u teka goza u burisana na yena hi moya wa rirhandzu ra Vukreste, hi xikongomelo xo lulamisa timhaka, laha hi ntolovelo u faneleke u kombela ku rivaleriwa.