Ku Nyika Yehovha Leswi Nga eMatimbeni Ya Hina
1 Nawu wa Yehovha lowu yaka eka Vaisrayele a wu lava leswaku swiharhi leswi nyikeriwaka eka yena tanihi gandzelo swi va leswi ‘hanyeke kahle.’ Xiharhi lexi lamaleke a xi nga amukeleki. (Lev. 22:18-20; Mal. 1:6-9) Ku tlula kwalaho, loko ku endliwa gandzelo, mafurha hinkwawo ya xiharhi a ma nyikiwa Yehovha. (Lev. 3:14-16) Leswi Yehovha a a ri Tatana ni N’wini Lonkulu wa Vaisrayele, a a faneriwa hi nchumu wo tlula hinkwaswo.
2 Ku fana ni khale ka khaleni, ninamuntlha Xikwembu xa wu tsakela swinene ntikelo wa magandzelo ya hina. Ntirho wa hina wu fanele wu kombisa leswaku hi xixima Yehovha hi ndlela leyi faneleke. I ntiyiso leswaku swiyimo swa vanhu a swi fani. Kambe, swi fanerile ku tikambisisa leswaku hi tiyiseka leswaku hi n’wi nyika leswi nga ematimbeni ya hina.—Efe. 5:10.
3 Ntirho Wa Mbilu Hinkwayo: Leswaku ntirho wa hina wu dzunisa Yehovha wu tlhela wu khumba timbilu, a hi fanelanga hi wu endlela ku hetisisa nawu ntsena. Timbilu ta hina leti phuphumaka hi ku tlangela ti fanele ti hi susumetela ku vulavula hi Xikwembu xa hina ni hi swikongomelo swa xona. (Ps. 145:7) Leswi swi kandziyisa nkoka wa ku va ni xiyimiso lexinene xa munhu hi yexe xa ku hlaya Bibele ni ku yi kambisisa.—Swiv. 15:28.
4 Ku endlela Yehovha leswi nga ematimbeni ya hina swi katsa ku va hi tekelela ndlela leyi a rhandzaka vanhu ha yona. (Efe. 5:1, 2) Ku rhandza vanhu swi ta hi susumetela leswaku rungula ra ntiyiso lowu hanyisaka hi ri byela vo tala hilaha hi nga kotaka hakona. (Mar. 6:34) Rirhandzu ri hi susumetela leswaku hi tsakela lava hi vulavulaka na vona. Ri hi endla hi tshama hi ri karhi hi anakanya ha vona endzhaku ka riendzo ra hina ro sungula, naswona ri hi endla hi hatla hi tlhelela eka vona. Ri hi susumetela ku endla hinkwaswo leswi hi nga swi kotaka leswaku hi va pfuna va endla nhluvuko hi tlhelo ra moya.—Mint. 20:24; 26:28, 29.
5 “Xitlhavelo Xa Ku Dzunisa”: Ndlela yin’wana leyi ha yona hi nyikaka Yehovha hinkwaswo leswi nga ematimbeni ya hina i ku gingiriteka entirhweni wa hina wo chumayela. Loko hi hlelekile naswona hi anakanyisisa hi vutirheli bya hina, hi nga endla ntirho lowukulu hi nkarhi lowu hi nga na wona. (1 Tim. 4:10) Ku lunghiselela kahle swi hi pfuna leswaku hi veka mhaka erivaleni naswona yi va leyi khorwisaka, hi ndlela yoleyo swi endla leswaku vanhu va tsakela. (Swiv. 16:21) Loko hi ri karhi hi byela van’wana mahungu lamanene, leswi hi swi vulaka swi ri karhi swi huma embilwini swi nga faneriwa hi ku vuriwa leswaku i “xitlhavelo xa ku dzunisa.”—Hev. 13:15.