Vantshwa—Hlayani Rito Ra Xikwembu!

¹ Loko u ri muntshwa u langutana ni swiphiqo ni ku endla swiboho swo tika. Vo tala va n’wina vantshwa lava nga Vakreste, siku na siku mi langutana ni mintshikilelo leyi nga mi endlaka mi tlula milawu ya Xikwembu ya mahanyelo. Loko u nga si endla swiboho swa wena n’wini leswi nga ta ku pfuna vutomi hinkwabyo swa malunghana ni dyondzo, ntirho ni vukati, u fanele u rhanga hi ku tivekela tipakani ta swa moya. Tipakani leti u nga ti fikelelaka ta swa moya ti ta ku pfuna leswaku u endla swilo hi vutlharhi nileswaku swi ku fambela kahle evuton’wini. Loko u hlaya Rito ra Xikwembu u tlhela u anakanyisisa ha rona nkarhi hinkwawo, u ta susumeteleka ku hanya hi ku pfumelelana ni ndzayo ya rona leyi huhuteriweke, naswona matshalatshala ya wena lama faneleke ma ta humelela.—Yox. 1:8; Ps. 1:2, 3.

² Xana Ri Ta Ku Vuyerisa Njhani? Misava ya Sathana yi taleriwe hi swilo leswi yengaka munhu ku endla xidyoho. (1 Yoh. 2:15, 16) U nga ha va u tiva lava u dyondzaka na vona kumbe tintangha ta wena tin’wana leti ngheneke ekhombyeni hikwalaho ko hambukisiwa hi ntshikilelo wa tintangha. Ku namarhela ndzayo ya Bibele swi ta ku nyika matimba ya moya yo namarhela mahanyelo lamanene ni ku ala ndlela ya vudyoho. Ku tlula kwalaho, ndzayo ya Rito ra Xikwembu yi nga ku pfuna ku papalata mintlhamu leyi tumbeleke ya Sathana. (2 Kor. 2:11; Hev. 5:14) Ku famba endleleni ya Xikwembu swi ta ku tisela ntsako wa xiviri—ndlela leyi u hanyaka ha yona yi ta ku enerisa.—Ps. 119:1, 9, 11.

³ Misinya ya milawu leyi nga cinciki ya Rito ra Xikwembu yi byi tlula kule vutlhari bya munhu. (Ps. 119:98-100) Ku tiva misinya ya milawu ya Bibele ni ku anakanyisisa hi swikongomelo swa Yehovha leswi hlavuteriweke swin’we ni ku khongela hi mbilu hinkwayo swi ta ku pfuna ku aka vuxaka lebyikulu na Yehovha Xikwembu, Mutsari wa Bibele wa vutlhari hinkwabyo. Wa tshembisa: “Ndzi ta endla leswaku u va ni ku twisisa naswona ndzi ku letela hi ndlela leyi u faneleke u famba ha yona. Ndzi ta ku tsundzuxa ndzi veke tihlo ra mina ri ri ehenhla ka wena.”—Ps. 32:8.

⁴ Tivekele Nkarhi Wo Ri Hlaya: Muntshwa un’wana la nga Mukreste u tivekele pakani yo hlaya Bibele hinkwayo, naswona u yi hete hi lembe. U vuyeriwe njhani? Wa hlamusela: “Ndzi dyondze swo tala hi Yehovha—leswi endleke leswaku ndzi tshinela eka yena ni ku navela ku n’wi chava vutomi bya mina hinkwabyo.” (Yak. 4:8) Xana wena se u yi hlaye hinkwayo Bibele? Loko swi nga ri tano, ha yini u nga tivekeli pakani yo yi hlaya? Kunene Yehovha u ta katekisa matshalatshala ya wena, naswona u ta vuyeriwa swinene.