Mpfuxeto Wa Xikolo Xa Vutirheli Bya Le Tilweni
Swivutiso leswi landzelaka swi ta pfuxetiwa hi ku vulavurisana kunene eXikolweni xa Vutirheli bya le Tilweni hi vhiki leri sungulaka hi February 28, 2005. Mulanguteri wa xikolo u ta fambisa mpfuxeto wa timinete ta 30 lowu sekeriweke eka rungula ra tinkulumo leti nyikeriweke ku sukela eka vhiki ra January 3 ku ya eka February 28, 2005. [Xiya: Laha ku nga riki na swikombo endzhaku ka xivutiso swi ta lava leswaku u tikumela tinhlamulo hi ku tiendlela ndzavisiso.—Vona buku leyi nge Xikolo Xa Vutirheli, matl. 36-7.]
TINHLA TO TIRHELA EKA TONA
1. Hi nga endla njhani leswaku leswi hi swi vulaka swi twisiseka hi ku olova? [1, be-TS tl. 226 ndz. 1–tl. 227 ndz. 1] Hi nga swi endla hi ku tirhisa marito yo olova hilaha Yesu a endleke hakona eDyondzweni ya le Ntshaveni, hi tirhisa swiga swo koma, hi kandziyisa tinhla-nkulu ti nga ri tingani, hi hlela rungula ra hina, hi hlamusela marito lama nga tolovelekangiki naswona hi hlamusela tsalwa kahle, hi nga hatliseli ku tlulela eka rin’wana.
2. Hi wahi marito lama nga lavaka ku hlamuseriwa? [2, be-TS tl. 227 ndz. 2–tl. 228 ndz. 1] (1) I marito lama tiviwaka ntsena hi Timbhoni ta Yehovha, yo kota “phayona,” “mulanguteri wa xifundzha” na “Xitsundzuxo”; (2) marito lama tolovelekeke evanhwini kambe ma nga twisisiwi hi ndlela leyi faneleke, yo kota “moya-xiviri,” “Armagedoni” na “vumbhisa”; (3) marito ya le Bibeleni lawa a ma tirhisiwa eka mindhavuko ya khale ni loko ku pimiwa swilo, yo kota “xisungunu.”
3. Hi nga swi kotisa ku yini ku hlamusela mhaka hi ndlela leyi nga ta vuyerisa vayingiseri va hina hakunene? [6, be-TS tl. 231 tindz. 1-3] Hi fanele hi dzikisa mianakanyo ya hina emhakeni yoleyo hi ku tivutisa swivutiso leswi nge, yini, ha yini, rini, kwihi, mani na njhani. Ku ri ni ku tshembela eka tinhla leti hatlaka ti fika emianakanyweni ya hina kumbe hi phindha rungula leri vanhu ana se va ri tivaka, hi fanele hi kurisa vonelo ra hina hi ku endla ndzavisiso.
4. Hi nga ri hlaya njhani tsalwa leri tolovelekeke hi ndlela leyi dyondzisaka vayingiseri va hina? [7, be-TS tl. 231 tindz. 4-5] Hi fanele hi ri avanyisa hi swiyenge, hi hlawula leswi fambisanaka ni nhloko-mhaka ya hina. Hi xikombiso, loko hi hlaya Mikiya 6:8, hi nga ha vutisa, “Xana ‘vululami’ byi vula yini? Xana ku vulavuriwa hi misinya ya milawu ya vululami bya mani? Swi vula yini ‘ku kombisa vululami’?” Hi kona hi nga tirhisaka tsalwa ra hina hi ri karhi hi anakanya hi nhloko-mhaka ya hina, xikongomelo xa hina ni hi vayingiseri va hina.
5. Hi byihi vuyelo lebyi nga vaka kona loko hi khutaza vayingiseri va hina leswaku va dzikisa mianakanyo ya vona etimhakeni ta nkoka leti kumekaka eka rungula leri tolovelekeke ra Bibele? [9, be-TS tl. 232 tindz. 2-4] Vayingiseri va hina va ta ya va ri twisisa ku antswa tsalwa ra kona loko hi kombisa mongo wa rona, loyi a vulavulaka ni xiyimo lexi a xi ri kona loko ku tsariwa rungula rolero ra Bibele. Sweswo swi ta va pfuna leswaku va ya va ri hlaya hi vukheta Rito ra Xikwembu naswona va swi twisisa ku antswa swiendlakalo swa le Bibeleni. (Mat. 22:41-45; Luka 20:37, 38)
NKULUMO NO. 1
6. Ku “chava Xikwembu xa ntiyiso u hlayisa swileriso swa xona” swi katsa yini? (Ekl. 12:13) [1, be-TS tl. 272 ndz. 3–tl. 273 ndz. 1] Swi katsa ku dyondzisa vanhu leswaku Muvumbi wa matilo ni misava hi yena Xikwembu xa ntiyiso. Hi yena la kotaka ku profeta swa nkarhi lowu taka ivi swi endleka hilaha a endleke hakona enkarhini lowu hundzeke. Vanhu hinkwavo va tihlamulela eka yena. (Esa. 45:18, 21, 22; 55:10, 11; Mint. 17:30, 31)
7. Hi nga n’wi pfuna njhani munhu leswaku a nga tivi vito leri nge Yehovha ntsena, kambe a tiva ni leswi ri vulaka swona hi n’wini wa rona? (Yuw. 2:32) [3, be-TS tl. 274 tindz. 3-5] Loko hi ri karhi hi dyondzisa vanhu leswaku Muvumbi u ni vito, hi fanele hi endla leswaku va anakanyisisa hileswaku i Xikwembu xa njhani. (Eks. 34:6, 7) Loko hi ri karhi hi vulavula hi mikateko leyi nga ta tisiwa hi Mfumo, milawu ya Xikwembu ni leswi xi swi languteleke eka hina, hi fanele hi kombisa leswi swi hi byelaka swona hi timfanelo ta Yehovha. Xikongomelo xa hina i ku endla leswaku vanhu va va ni xichavo lexi faneleke hi Xikwembu, lexi ntshembo wa vutomi bya hina bya nkarhi lowu taka byi titshegeke ha xona. (Ps. 89:7; Rhom. 14:12)
8. I swa nkoka ku fikela kwihi ku kuma vutivi ha Yesu ni ku nyikela vumbhoni ha yena? (Yoh. 17:3) [5, be-TS tl. 276 ndz. 1] Leswaku hi kuma vutomi lebyi nga heriki, hi fanele hi va ni vutivi lebyi kongomeke ha Yesu Kreste. Ku rhandza ka Xikwembu hi leswaku vanhu hinkwavo va “twarisa erivaleni leswaku Yesu Kreste i Hosi.” (Filp. 2:9-11) Hikwalaho, leswi hi nga malandza ya Xikwembu lama tshembekaka, a hi nge swi papalati ku nyikela vumbhoni ha Yesu. (1 Tim. 2:3-7)
9. Hi yihi ndlela leyi ku va ni vuxaka ni Xikwembu ni ku twisisa Bibele swi fambisanaka ha yona ni ku tlangela xikhundlha xa Yesu? [6, be-TS tl. 276 ndz. 2] Hi ku ya hi Yohane 14:6, munhu u kota ku va la amukelekaka eka Xikwembu ni ku ta eka xona ha Yesu Kreste ntsena. Yehovha u endle leswaku swikongomelo swa Yena hinkwaswo swi hetiseka hi N’wana wa yena la tswariweke a ri swakwe. (Kol. 1:17-20) Vuprofeta bya Bibele byi kandziyisa mhaka leyi. (Nhlav. 19:10)
10. Hi nga kombisa hi ndlela yihi leswaku hi pfumela hi mbilu hinkwayo leswaku Yesu Kreste i Hosi? [8, be-TS tl. 277 ndz. 4] Hi seketela ripfumelo ra hina hi ku rhangisa timhaka ta Mfumo evuton’wini bya hina ni hi ku hisekela ntirho wo chumayela ni ku endla vadyondzisiwa. (Mat. 6:19-34; 24:14; 28:19, 20) Nakambe hi fanele hi tekelela Yesu hi ku va ni rirhandzu ra xiviri, hi pfumelelana ni “xileriso lexintshwa” lexi kumekaka eka Yohane 13:34, 35.
KU HLAYA KA BIBELE KA VHIKI NI VHIKI
11. Xana Tera tata wa Abrahama a a ri mugandzeri wa swifaniso? (Yox. 24:2) Eku sunguleni Tera a a nga gandzeli Yehovha Xikwembu. Swi nga endleka leswaku a a gandzela xikwembu xa n’weti lexi vuriwaka Sin—ku nga xikwembu lexi tolovelekeke eUra. Hi ku ya hi matimu ya Vayuda, swi nga ha endleka leswaku Tera a a ri muendli wa swifaniso. [2, w04-TS 12/1 “Tinhla-nkulu Ta Buku Ya Yoxuwa”]
12. Xana Gidiyoni a a chava ku endla ntirho lowu Yehovha a a n’wi nyike wona? Ha yini u hlamula tano? (Vaav. 6:25-27) Vaheveru 11:32-38 yi kombisa leswaku Gidiyoni a a ri ni xivindzi hikuva u hlayiwe eka vanhu lava a va ri ni “vurhena enyimpini.” Kambe hi nkarhi lowu fanaka ndlela leyi a endleke xiavelo xa yena ha yona yi kombisa leswaku a a titsongahatile naswona a a ri ni vuxiyaxiya. U endle ntirho wa yena nivusiku leswaku a nga voniwi hi munhu. Tlhandlakambirhi, u ve ni vuxiyaxiya hi ku teka malandza ya khume—kumbexana leswaku ku va ni lava rindzeke loko lavan’wana va ri karhi va hirimuxa alitari ni mhandzi yo kwetsima. [4, w00-TS 8/1 tl. 17 ndz. 12]
13. Hi dyondza yini eka ndlela leyi Gidiyoni a hlamuleke nyimba ya Efrayimi ha yona? (Vaav. 8:1-3) Hi marito yakwe lama anakanyisisiweke kahle, lama rhurisaka mbilu, Gidiyoni u papalate ku pfuxa nyimpi exikarhi ka tinxaka, leyi a yi ta vanga ku dlayeteriwa ka vanhu vo tala. Swi nga ha endleka leswaku vanhu va rixaka ra Efrayimi a va titeka va ri va nkoka naswona a va tikukumuxa. Kambe, sweswo a swi n’wi sivelanga Gidiyoni leswaku a kondletela ku rhula. Hilaha ku fanaka ninamuntlha, vanhu va nga hi karihela ivi va hi venga. Hi fanele hi twisisa ndlela leyi va titwaka ha yona ni ndlela leyi va vonaka swilo ha yona. [5, w00-TS 8/15 tl. 25 tindz. 3-4]
14. Ku ala ka vanhu va Gibiya ku rhurhela vaendzi a ku kombisa yini? (Vaav. 19:14, 15) Mukhuva wo tano a wu nga tolovelekanga nikatsongo emutini wa Vaisrayele. Ku ala ka vona ku rhurhela vaendzi a swi kombisa leswaku mahanyelo ya vanhu volavo a ma bihe ngopfu naswona sweswo swi humele erivaleni nivusiku. Vakreste va tsundzuxiwa ku “landzela ndlela ya malwandla.” (Rhom. 12:13) [8, w05-TS 1/15 “Tinhla-nkulu Ta Buku Ya Vaavanyisi”]
15. Leswi ‘un’wana ni un’wana a a tolovele ku endla leswi swi lulameke ematihlweni ya yena,’ xana sweswo swi vula leswaku a ku ri ni mpfilumpfilu? (Vaav. 21:25) Doo, hikuva Yehovha a a ri ni malunghiselelo yo tala yo kongomisa vanhu va yena. U nyike vanhu va yena Nawu ni lunghiselelo ra vaprista leswaku va va dyondzisa tindlela ta yena. Muprista lonkulu a a kota ku vulavula ni Xikwembu loko ku ri ni timhaka ta nkoka, a tirhisa Urimi ni Thumimi. (Eks. 28:30) Kasi muti wun’wana ni wun’wana a wu ri ni vakulukumba lava kotaka ku nyika ndzayo leyinene. Loko Muisrayele a tirhisa malunghiselelo lawa kutani a “endla leswi swi lulameke ematihlweni ya yena,” swilo a swi famba kahle. [8, w05-TS 1/15 “Tinhla-nkulu Ta Buku Ya Vaavanyisi”]